បាញ់រះនៅLas Vegas៖ នគរបាលមិនជឿថា ឃាតករ គឺជាបណ្តាញរបស់ក្រុមជីហាតអង្គការរដ្ឋអ៊ីស្លាម
សហរដ្ឋអាមេរិកកំពុងស្ថិតក្នុង ការភ័យខ្លាច និងក្រៀមក្រំបំផុត បន្ទាប់ពីហេតុការណ៍បាញ់រះសម្លាប់មនុស្ស នៅទីក្រុង Las Vegas កាលពីយប់ថ្ងៃទី១ តុលា។ ឃាតករម្នាក់ បានបាញ់រះ ពីលើបន្ទប់សណ្ឋាគារ សំដៅសម្លាប់អ្នកចូលរួមមើលការប្រគុំតន្ត្រីហាលវាល ដែលបានបណ្តាលឲ្យមនុស្សយ៉ាងហោចណាស់ ៥៩នាក់ស្លាប់ និងជាង៥០០នាក់រងរបួស។ ក្រុមជីហាតអង្គការរដ្ឋអ៊ីស្លាម បានចេញមុខប្រកាសថា ឃាតករគឺជាបណ្តាញបក្សពួករបស់ខ្លួន។ តែយ៉ាងណា អាជ្ញាធរនរគបាលអាមេរិក អះអាងថា គេពុំមានអ្វីមកបញ្ជាក់ថា នេះជាអំពើភេរវកម្មអ៊ីស្លាមទេ។
ចុះផ្សាយនៅថ្ងៃ៖ កែប្រែថ្ងៃទី៖
នេះគឺជាអំពើឃាតកម្មបាញ់រះ ដ៏សាហាវបំផុតនៅសហរដ្ឋអាមេរិក។ ភ្លាមៗ ក្រោយហេតុការណ៍ សំណួរបានចោទសួរថា តើឃាតករនោះជានរណា មានបំណងអ្វី ហើយថាតើនេះ ជាអំពើភេរវកម្មអ៊ីស្លាមជ្រុលនិយមដែរឬទេ?
ឃាតករឈ្មោះ Stephen Craig Paddock ភេទប្រុសអាយុ ៦៤ឆ្នាំ។ ក្រុមជីហាតអង្គការរដ្ឋអ៊ីស្លាមចេញមុខមកប្រកាសថា ឃាតករ គឺជាមនុស្សរបស់បណ្តាញខ្លួន។ តែអ្វីដែលចំលែកបំផុត នៅក្នុងការប្រកាសរបស់ក្រុមជីហាតអង្គការរដ្ឋអ៊ីស្លាមនេះ ហើយដែលធ្វើឲ្យអាជ្ញាធរអាមេរិក មានការងឿងឆ្ងល់ គឺក្រុមនេះឆ្លៀតបញ្ជាក់បន្ថែមថា ឃាតករនេះ ទើបតែបានងាកទៅចូលសាសនាអ៊ីស្លាម ត្រឹមតែប៉ុន្មានខែ ចុងក្រោយនេះប៉ុណ្ណោះ។ ប៉ុន្តែ បើតាមប្រភព ពីនគរបាល Las Vegas មកត្រឹមពេលនេះ គេនៅមិនទាន់រកឃើញអ្វីមួយ មកសំអាងថា ជននេះ មានទំនោរទៅរកទ្រឹស្តីអ៊ីស្លាមជ្រុលនិយមទេ។ ដូច្នេះអាជ្ញាធរ សង្ស័យថា ការប្រកាសទទួលស្គាល់របស់ក្រុមជីហាត វាអាចគ្រាន់តែជាការឆក់ឱកាស ចង់បានឈ្មោះល្បីតែប៉ុណ្ណោះ។
មេបញ្ជាការនគរបាល Las Vegas បានអះអាងថា គាត់មិនជឿថាជននេះ ជាបណ្តាញភេវកម្មអ៊ីស្លាមទេ។ តែលោកជឿថាជននេះ ជាមនុស្សរោគចិត្ត ហើយធ្វើសកម្មភាពតែម្នាក់ឯងប៉ុណ្ណោះ។ សមត្ថកិច្ចបានឲ្យដឹងថា អ្វីដែលគេប្រាកដនោះ គឺឃាតករ បានត្រៀមរៀបចំផែនការរបស់ខ្លួន បានយ៉ាងល្អិតល្អន់។ ជននេះ បានជួលបន្ទប់ដ៏ធំមួយ នៅសណ្ឋាគារMandalay Bay ដែលមានបង្អួចបែរទៅជ្រុងពីរផ្សេងគ្នា ចំពីលើទីលាន ដែលមានការប្រគុំតន្ត្រី។ ឃាតករ បានចាប់ផ្តើមបាញ់រះ នៅវេលាម៉ោងប្រម៉ាណជា ១០យប់។ បន្ទាប់មកឃាតករ បានបាញ់សម្លាប់ខ្លួនឯង មុននឹងសមត្ថកិច្ចឡើងទៅដល់។
នៅក្នុងបន្ទប់សណ្ឋាគារ គេបានរកឃើញ កាំភ្លើងទំនើប១៦ដើម ដែលភាគច្រើនជាប្រភេទកំភ្លើងAssaut Automatique។ នៅក្នុងរថយន្តរបស់ឃាតករនេះ គេបានរកឃើញម្សៅ នីត្រា អាម៉ូនីញ៉ូម ដែលម្សៅប្រភេទនេះ អាចយកទៅកែច្នៃ ធ្វើជាគ្រាប់បែកផ្ទុះបាន។ ចំណែក នៅផ្ទះទាំង២ របស់ជននេះវិញ សមត្ថកិច្ចបានបញ្ជាក់ថា គឺមិនខុសពីឃ្លាំងស្តុកអាវុធឡើយ។
ប្រភពពីនគរបាលដដែល បញ្ជាក់ថា ជននេះជាអ្នកចូលនិវត្តន៍ ធ្លាប់ធ្វើការជាអ្នកជំនាញគណនេយ្យ។ ឃាតករ មានបណ្ណបើកបរយន្តហោះ និងបណ្ណអនុញ្ញាតឲ្យកាន់អាវុធប្រមញ្ញសត្វ ដែលចេញដោយរដ្ឋAlaska។ ជននេះ ពុំមានជាប់ក្នុងបញ្ជីឈ្មោះ របស់នគរបាលឡើយ។ ប្អូនប្រុសរបស់ឃាតករ បានឲ្យដឹងថា បងប្រុសរបស់ខ្លួន មិនទំនងជាមនុស្សងប់ងុលនឹងសាសនាអ្វីទេ។ តែបងប្រុសខ្លួន គឺជាមនុស្សដែលចូលចិត្តសប្បាយហ៊ឺហា ដើរចាយ និងលេងល្បែងស៊ីសង តាមកាស៊ីណូជាដើម។
យ៉ាងណាមិញ អំពើឃាតកម្មបាញ់រះ ដ៏សាហាវនេះ បានធ្វើឲ្យសាធារណៈមតិអាមេរិក កំពុងពិចារណាឡើងវិញ អំពីសិទ្ធិកាន់កាប់អាវុធ នៅតាមរដ្ឋមួយចំនួន ក្នុងសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ