Wikileaks គ្រោងនឹងចុះផ្សាយជាសាធារណៈរបាយការណ៍ថ្មីៗទៀត
លោកJulian Assange ជាអ្នកបង្កើតគេហទំព័រអាំងទែរនេតWikileaksបានបញ្ជាក់អះអាងនៅថ្ងៃ សៅរ៍ម្សិលមិញ១៤សីហាអំពីឆន្ទៈរបស់ខ្លួននឹងចុះផ្សាយ ចាប់ពីឥឡូវនេះទៅទល់ប៉ុន្មានសប្តាហ៍ទៀតសំណុំរឿងសម្ងាត់ដែលនៅ សេសសល់របស់ខ្លួនស្តីពីសង្គ្រាម នៅអាហ្វហ្កានិស្តង់។ ជាទង្វើធ្វើផ្ទុយពីឆន្ទៈរបស់មន្ទីរបញ្ចកោណ Pentagoneគឺក្រសួងការពារប្រទេសអាមេរិកាំងដែលបរិហារអាក្រាតទង្វើ ធ្វើដោយគ្មានស្មារតីទទួលខុសត្រូវដែលអាចធ្វើឱ្យមានគ្រោះថ្នាក់ ដល់ជីវិតមនុស្ស។លោកAssange ស្ថិតនៅប៉ុន្មានថ្ងៃនៅប្រទេសSuèdeជាទីដែលអង្គការរបស់គាត់ទទួល ការអនុញ្ញាតពីច្បាប់អនុគ្រោះចំពោះប្រភពព័ត៌មាននិងប្រើប្រាស់ Computerនៃក្រុមហ៊ុនព័ត៌មានវិទ្យាដ៏តូចមួយនៅជាយក្រុងStockholm។
ចុះផ្សាយនៅថ្ងៃ៖ កែប្រែថ្ងៃទី៖
វីនស្តុន រតនា រាយការណ៍ព័ត៌មាន
ទោះបីជាមានសំណូមពរសូមហើយសូមទៀតជាច្រើនលើកច្រើនដងពី មន្ទីរបញ្ចកោណPentagoneគឺក្រសួងការពារប្រទេសអាមេរិកាំងសូមឲ្យឈប់ចុះផ្សាយឯកសារសម្ងាត់យោធាស្តីពីអធិករណ៍នៅអាហ្វហ្កានិស្តង់ក្តី ក៏អ្នកបង្កើតគេហទំព័រអាំងទែរនេតWikileaks គ្មានចេតនានឹងឈប់ត្រឹមនេះទេ។ ឯកសារចំនួនប្រមាណជា ១ម៉ឺន៥០០០ នឹងច្បាស់ជាត្រូវចុះផ្សាយជាសាធារណៈទាំងស្រុងក្នុងប៉ុន្មានសប្តាហ៍ទៀត។
ការប្រកាសត្រូវបានធ្វើនៅទីក្រុង Stockholm ហើយពុំមែនដោយចៃដន្យឡើយ ដោយហេតុថា គឺនៅជាយក្រុងរដ្ឋធានីស៊ុយអែដនេះហើយជាទីស្ថិតនៅ Computer ដែលមានបង្កប់ទុកឯកសារដ៏សែនរសើបទាំងនេះ។ ប្រទេស ស៊ុយអែដល្បីឈ្មោះជាប្រទេសដែលអនុវត្តនយោបាយជួយសម្រួលឲ្យមានលទ្ធភាពអាចប្រើប្រាស់ដោយសេរីឯកសារជាផ្លូវការ។
លោក Assangeបានបញ្ជាក់ប្រាប់ថា ក្រុមរបស់គាត់នឹងធ្វើវិភាគដោយប្រុងប្រយ័ត្នយ៉ាងម៉ត់ចត់ ឃ្លាប្រយោគនីមួយៗ ដើម្បីការពារឈ្មោះខ្លះ។ ជាចម្លើយមួយតបចំពោះទឡ្ហីករណ៍សំដែងចេញជាមុនដោយក្រសួងការពារប្រទេសអាមេរិកាំង Pentagone។
គេហទំព័រអាំងទែរនេតអាមេរិកាំង បានចុះផ្សាយកាលពីចុងខែកក្កដាមុន នូវឯកសារសម្ងាត់ចំនួនរាប់ម៉ឺនដែលបណ្តាលឲ្យអាជ្ញាធរអាមេរិកាំងខឹងក្តៅក្រហាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ