ពាក់ព័ន្ធនឹងបញ្ហាអ៊ីរ៉ង់ ទីក្រុងតែលអាវីវនឹងធ្វើសេចក្តីសម្រេចចិត្តដោយខ្លួនឯង
លោក Avigdor Lieberman រដ្ឋមន្ត្រីក្រសួងការបរទេសអ៊ីស្រាអែល បានប្រកាសនៅថ្ងៃអាទិត្យនេះឲ្យដឹងថា ពាក់ព័ន្ធនឹងបញ្ហាអ៊ីរ៉ង់ ប្រទេសអ៊ីស្រាអែលនឹងធ្វើសេចក្តីសម្រេចចិត្តដោយខ្លួនឯង ក្នុងឋានៈខ្លួនជា “រដ្ឋឯករាជ្យ” ។ ទាំងនេះមុននឹងលោកនាយករដ្ឋមន្ត្រីអ៊ីស្រាអែល Netanyahu មានជំនួបពិភាក្សាជាមួយលោកប្រធានាធិបតីអាមេរិកបារ៉ាក់ អូបាម៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
“ជាការពិតហើយដែលសហរដ្ឋអាមេរិកជាប្រទេសមហាអំណាចដ៏ធំជាងគេក្នុងលោក ហើយក៏ជាមិត្តដ៏សំខាន់របស់ប្រទេសអ៊ីស្រាអែល ក៏ប៉ុន្តែពាក់ព័ន្ធនឹងសំណុំរឿងនុយក្លេអ៊ែរអ៊ីរ៉ង់ ទីក្រុងតែលអាវីវត្រូវធ្វើសេចក្តីសម្រេចចិត្តដោយខ្លួនឯង ក្នុងឋានៈខ្លួនជារដ្ឋឯករាជ្យ ហើយទាំងនេះ ដើម្បីឲ្យសមស្របតាមស្ថានការណ៍ »។ នេះជាសេចក្តីប្រកាសរបស់រដ្ឋមន្ត្រីក្រសួងការបរទេសអ៊ីស្រាអែល Avigdor Lieberman នាឱកាសសម្ភាសន៍តាមរយៈវិទ្យុសាធារណៈអ៊ីស្រាអែល។
សេចក្តីប្រកាសខាងលើនេះ អ៊ីស្រាអែលចង់ថ្លែងឲ្យដឹងពីការវាយប្រហារជាយថាហេតុដោយកងកម្លាំងយោធាអ៊ីស្រាអែលទៅលើទីតាំងនុយក្លេអ៊ែររបស់ប្រទេសអ៊ីរ៉ង់។ គួរកត់សម្គាល់ថា នារយៈពេលប៉ុន្មានសប្តាហ៍ចុងក្រោយនេះ អ៊ីស្រាអែលបានប្រើធម៌ក្តៅផងនិងធម៌ត្រជាក់ផង ដើម្បីសម្តែងឲ្យឃើញពីលទ្ធភាពនៃការទម្លាក់គ្រាប់បែកទៅលើទីតាំងនុយក្លេអ៊ែររបស់ប្រទេសអ៊ីរ៉ង់។
“បើសហគមន៍អន្តរជាតិគ្មានសមត្ថភាពនឹងបញ្ឈប់ការសម្លាប់រង្គាលនៅប្រទេសស៊ីរី តើពាក្យសន្យារបស់សហគមន៍អន្តរជាតិថានឹងធានាសន្តិសុខឲ្យប្រទេសអ៊ីស្រាអែលមានតម្លៃដែរឬទេ?” នេះជាការចោទសួររបស់លោក Avigdor Lieberman រដ្ឋមន្ត្រីក្រសួងការបរទេសអ៊ីស្រាអែល។
ចំណែកឯលោកនាយករដ្ឋមន្ត្រីអ៊ីស្រាអែល Netanyahu វិញ មុននឹងធ្វើដំណើរទៅជួបលោកប្រធានាធិបតីអាមេរិកបារ៉ាក់អូបាម៉ាបានថ្លែងប្រាប់នៅថ្ងៃសុក្រកន្លងទៅថា “អ៊ីស្រាអែលនឹងរក្សាសិទ្ធិសេរីភាពរបស់ខ្លួនក្នុងការដោះស្រាយបញ្ហាជាមួយប្រទេសអ៊ីរ៉ង់”។
រីឯសហរដ្ឋអាមេរិកនិងប្រទេសអឺរ៉ុបសំខាន់ៗវិញ បានដាក់សម្ពាធទៅលើប្រទេសអ៊ីស្រាអែល កុំឲ្យធ្វើការវាយប្រហារទៅលើប្រទេសអ៊ីរ៉ង់ ដោយត្រូវទុកឱកាសឲ្យទណ្ឌកម្មអន្តរជាតិដាក់សម្ពាធទៅលើទីក្រុងតេហេរ៉ង់ បង្ខំឲ្យប្រទេសអ៊ីរ៉ង់បោះបង់ចោលកម្មវិធីនុយក្លេអ៊ែររបស់ខ្លួន។
គួរបញ្ជាក់ថា នាឱកាសជំនួបនៅថ្ងៃចន្ទខាងមុខនេះ លោកប្រធានាធិបតីអាមេរិកបារ៉ាក់អូបាម៉ានឹងខិតខំបញ្ជាក់ប្រាប់ លោកនាយករដ្ឋមន្ត្រីអ៊ីស្រាអែល Netanyahu ពីការគាំទ្រប្រទេសអ៊ីស្រាអែលដោយសហរដ្ឋអាមេរិក ហើយនិងខិតខំឃាត់ឃាំងទីក្រុងតែលអាវីវកុំឲ្យធ្វើការវាយប្រហារទៅលើទីតាំងនុយក្លេអ៊ែររបស់ប្រទេសអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ