អង្គការរដ្ឋអ៊ីស្លាមនៅក្រោយការវាយប្រហារក្នុងរដ្ឋតិចសាសនិងបន្តគំរាមអាមេរិក
អង្គការរដ្ឋអ៊ីស្លាម បានអះអាងនៅលើរលកវិទ្យុរបស់ខ្លួននៅថ្ងៃអង្គារម្សិលមិញថា អំពើភេរវកម្មនៅក្នុងរដ្ឋ តិចសាសកាលពីថ្ងៃអាទិត្យគឺជាទង្វើរបស់ក្រុមជីហាតរបស់ពួកគេ។ នេះជាការថ្លែងជាផ្លូវការលើកដំបូងបង្អស់របស់អង្គការរដ្ឋអ៊ីស្លាម ចំពោះការវាយប្រហារនៅបច្ចឹមប្រទេស ប្រឆាំងទៅនឹងចលនាដែលពួកគេចាត់ទុកថា ជាការស្អប់ខ្ពើមនឹងអ្នកកាន់សាសនាអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ការវាយប្រហារកាលពីថ្ងៃអាទិត្យកន្លងទៅនេះបានកើតឡើងនៅក្នុងជាយក្រុងនៃទីក្រុង Dallas ជាកន្លែង ដែលការប្រារព្ធការប្រកួតគូររូបត្លុករបស់ Mohamet តំណាងឲ្យព្រះក្នុងសាសនាអ៊ីស្លាមដែលរៀបចំដោយ សមាគមមួយមានឈ្មោះថា ការផ្តួចផ្តើមនៃកិច្ចការពារសេរីភាពអាមេរិក ដែលអង្គការរដ្ឋអ៊ីស្លាមបានចាត់ទុកថាជាចលនានៃការស្អប់ខ្ពើមនឹងអ្នកកាន់សាសនាអ៊ីស្លាម។
អង្គការរដ្ឋអ៊ីស្លាមបានប្រកាសនៅលើរលកវិទ្យុផ្លូវការរបស់ខ្លួនថា ជាទង្វើនៃទាហានពីររូបរបស់ទាយាទព្រះដែលបានដឹកនាំការវាយប្រហារទៅលើហ្វូងអ្នកចូលរួមតាំងពិពណ៌រូបត្លុក។ ភ្លាមៗនោះបុរស ជាទាហានប្រដាប់ដោយអាវុធធុនធ្ងន់ទាំងពីរនាក់នោះត្រូវបាននគរបាលម្នាក់បានបាញ់សម្លាប់នៅនឹងកន្លែងបន្ទាប់ពីពួកគេទាំងពីរបានព្យាយាមបាញ់រះលើហ្វូងអ្នកចូលរួមនាឱកាសមិនបានសម្រេច ក្រៅតែពីធ្វើឲ្យអ្នកសន្តិសុខម្នាក់មានរបួសស្រាលប៉ុណ្ណោះ។
យោងតាមប្រព័ន្ធផ្សព្វផ្សាយពត៌មានក្នុងស្រុកបានឲ្យដឹងថា ជនសង្ស័យអ៊ីស្លាមនិយមជ្រុលទាំងពីរនាក់ នោះមានម្នាក់ឈ្មោះ Elton Simpson អាយុ ៣១ ឆ្នាំនិងម្នាក់ទៀតឈ្មោះ Nadir Soofi អាយុ ៣៤ឆ្នាំ គេទាំងពីរស្នាក់នៅរួមគ្នាក្នុងផ្ទះល្វែងមួយនៅទីក្រុង Phoenix រដ្ឋ Arizona (ភាគនិរតី) នេះបើយោងតាមកាសែត Los Angeles Times។
នេះជាលើកដំបូងហើយដែលក្រុមជ្រុលនិយមអង្គការរដ្ឋអ៊ីស្លាមនិកាយស៊ុននីត បានឡើងមកថ្លែងជាផ្លូវការទទួលខុសត្រូវចំពោះអំពើព្រៃផ្សៃ ដែលបានប្រព្រឹត្តនៅប្រទេសលោកខាងលិចមួយនេះ។ គួររំលឹកថាអង្គការរដ្ឋអ៊ីស្លាមក៏ធ្លាប់ត្រូវបានអង្គការសហប្រជាជាតិចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិផងដែរ។
លើសពីនេះ នៅក្នុងព្រឹត្តិបត្រវិទ្យុប្រចាំថ្ងៃរបស់ពួកគេ អង្គការរដ្ឋអ៊ីស្លាមក៏បានគំរាមបន្តធ្វើការវាយប្រហារកាន់តែសាហាវបន្ថែមទៀតលើសហរដ្ឋអាមេរិក ដោយថ្លែងថា៖ « យើងចង់និយាយទៅកាន់អាមេរិកថា៖ អ្វីដែលកំពុងតែរៀបចំនឹងមានទំហំកាន់តែធំធេង និងកាន់តែល្វីងជូរចត់។ អ្នកនឹងឃើញអំពើដ៏អាក្រក់ៗ ដែលនឹងដឹកនាំធ្វើដោយទាហាននៃអង្គការរដ្ឋអ៊ីស្លាម»។
គួររំលឹកផងដែរថាសហរដ្ឋអាមេរិកបានដឹកនាំកងទ័ពសម្ព័ន្ធមិត្តបើកការវាយប្រហារទំលាក់គ្រាប់បែក លើទីតាំងសំខាន់ៗគ្រប់គ្រងដោយអង្គការរដ្ឋអ៊ីស្លាមនៅប្រទេសស៊ីរីនិងអ៊ីរ៉ាក់ចាប់តាំងពីឆ្នាំ២០១៤ មកម្ល៉េះ។ វាគឺជាសង្រ្គាមដែលអាចមានរយៈពេលវែងបន្តទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ