ឃាតកម្មលើអ្នកកាសែតនៅVirginie បំផុសជាថ្មីការតស៊ូមតិស្តីពីច្បាប់គ្រប់គ្រងអាវុធអាមេរិក
ការបាញ់សម្លាប់ ដោយមូលហេតុសងសឹង គំនុំ ឬការប្រកាន់ពូជសាសន៍ នៅរដ្ឋVirginie ដែលអ្នកកាសែតស្ត្រីម្នាក់ និងអ្នកថតរូបម្នាក់បានស្លាប់ ទាំងកំពុងផ្សាយបន្តផ្ទាល់ក្នុងកញ្ចក់ទូរទស្សន៍ក្នុងស្រុក ពីសំណាក់អតីតបុគ្គលិកទូរទស្សន៍នោះផ្ទាល់តែម្តង បានឆ្លុះបញ្ចាំងជាថ្មីឱ្យឃើញអំពីបន្ទាន់នៃការត្រួតពិនិត្យចរាចរណ៍អាវុធ នៅសហរដ្ឋអាមេរិក។ ជាប្រធានបទចាស់ មានការតស៊ូមតិជាញយដង មានបន្តស្លាប់ជាហូរហែ តែមិនដែលបានសម្រេចបង្កើតជាច្បាប់តឹងរ៉ឹងបានសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ដោយមិនបង្អង់ ជាមួយនឹងការថ្លែងរំលែកទុក្ខចំពោះឃាតកម្មលើអ្នកកាសែតទាំងពីរ កាលពីម្សិលមិញ ក្នុងបទសម្ភាសន៍មួយ លោកប្រធានាធិបតីអាមេរិក បារ៉ាក់អូបាម៉ា បានអំពាវនាវឱ្យសភា ពង្រឹងច្បាប់ស្តីពីការគ្រប់គ្រងអាវុធនៅសហរដ្ឋ។ លោកអូបាម៉ា បានសង្កត់ធ្ងន់ថា ចំនួនមនុស្សស្លាប់ ព្រោះមានពាក់ព័ន្ធនឹងការប្រើប្រាស់អាវុធនិងបាញ់កាំភ្លើង នៅក្នុងទឹកដីអាមេរិក ច្រើនជាងចំនួនជនរងគ្រោះក្នុងអំពើភេរវនិយមទៅទៀត។
សម្រាប់លោកស្រី ហ៊ីលឡារី គ្លីនតុន អតីតរដ្ឋមន្ត្រីក្រសួងការបរទេស និងជាបេក្ខជនប្រធានាធិបតីអាមេរិក ដែលកំពុងចេញធ្វើយុទ្ធនាការនៅរដ្ឋ Oawa ជាឥស្សរជននយោបាយទីមួយ ដែលបានស្នើសុំចាត់វិធានការ ដើម្បីបញ្ឈប់សកម្មភាពហិង្សាបណ្តាលមកពីការប្រើអាវុធ។
“យើងត្រូវតែធ្វើអ្វីមួយ ដើម្បីប្រយុទ្ធប្រឆាំងនឹងចរាចរណ៍អាវុធនៅអាមេរិក ! ខ្ញុំនឹងវាយលុកលើប្រធានបទនេះ ! មានមនុស្សច្រើននាក់បានដឹងស្គាល់បញ្ហានេះ ប៉ុន្តែរារែកមិនហ៊ានលូកដៃ ព្រោះជាសំណុំរឿងដ៏លំបាក។ ជាប្រធានបទដែលមានលក្ខណៈនយោបាយខ្លាំង និងស្មុគស្មាញបំផុតនៅសហរដ្ឋអាមេរិក”។ នេះជាប្រសាសន៍អះអាងរបស់លោកស្រី គ្លីនតុន។
អភិបាលរដ្ឋ Virginie លោក Terry McAuliffe ក៏បានទទូចឱ្យអាមេរិកបោះបង់ចោលដំណើរចរាចរណ៍អាវុធយ៉ាងទូលំទូលាយនៅក្នុងប្រទេស ប៉ុន្តែVirginie របស់លោក ជារដ្ឋមួយក្នុងចំណោមរដ្ឋធូររលុងខ្លាំងផ្នែកត្រួតពិនិត្យអាវុធ។ ក្រុមអ្នកប្រឆាំងនឹងការប្រើប្រាស់អាវុធ បានឱ្យដឹងថា ក្នុងមួយថ្ងៃៗ មានជីវិតមនុស្ស៨៩នាក់បានស្លាប់ ព្រោះគ្រាប់សំណរកាំភ្លើង ហើយ៤០%នៃការទិញដូរអាវុធ ប្រព្រឹត្តទៅគ្មានការផ្ទៀងផ្ទាត់ប្រវត្តិអ្នកទិញជាមុនទេ ដូចមានចែងក្នុងច្បាប់ទេ៕
អ្នកសារព័ត៌មាន ២នាក់ របស់ស្ថានីយ៍ទូរទស្សន៍ WDBJ នៅក្នុងរដ្ឋ Virginia សហរដ្ឋអាមេរិក ត្រូវបានបុរសម្នាក់ឈ្មោះ Bryce Williams បាញ់សម្លាប់ ខណៈកំពុងរាយការណ៍ព័ត៌មានផ្សាយផ្ទាល់ឲ្យទូរទស្សន៍ នៅផ្សារទំនើប Bridgewater Plaza ជិតតំបន់ Moneta។ រូបភាពបាញ់សម្លាប់អ្នកកាសែតទាំងពីរ ត្រូវបានគេមើលឃើញដោយផ្ទាល់ តាមកញ្ចក់ទូរទស្សន៍ និងតាម Online មុនបង្ហោះដោយខ្មាន់កាំភ្លើង Bryce Williams ដែលជាកូនកាត់អាមេរិកស្បែក និង ជាអតីតអ្នកសារព័ត៌មានរបស់ស្ថានីយទូរទស្សន៍ WDBJនោះដែរ។ ជនរងគ្រោះទាំងពីរនាក់ ម្នាក់ឈ្មោះ Alison Parker ភេទស្រី អាយុ ២៤ឆ្នាំ ជាអ្នករាយការណ៍ព័ត៌មាន និងម្នាក់ទៀតឈ្មោះ Adam Ward ភេទប្រុស វ័យ២៧ឆ្នាំជាអ្នកកាន់កាមេរ៉ា។
បើតាមឯកសារ២៣ទំព័រដែលបានផ្ញើទៅកាន់ទីភ្នាក់ងារសារព័ត៌មាន ABC news បានបង្ហាញថា មូលហេតុដែលលោក Bryce Williams បាញ់សម្លាប់អ្នកកាសែតទាំងពីរនេះ គឺជាការសងសឹកទៅនឹងភាពអយុត្តិធម៌នៃការរើសអើសពូជសាសន៍។ Bryce Williams ទើបត្រូវបានបណ្តេញពីការងារកាលពីពីរឆ្នាំ ដោយយកនាង Alison Parker មកជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ