ប្រធានាធិបតី អូបាម៉ា បង្ហាញគំរោងត្រួតពិនិត្យអាវុធ
នៅថ្ងៃពុធម្សិលមិញ នៅសភាអាមេរិក ប្រធានាធិបតី អូបាម៉ា បានបង្ហាញនូវគំរោងត្រួតពិនិត្យអាវុធមួយ ជាមធ្យោបាយទប់ទល់នឹង គ្រោះថ្នាក់នៃការបាញ់សំលាប់ដោយកាំភ្លើងផ្សេងៗ ដែលតែងតែកើតឡើង ជាអចិន្ត្រៃយ៍ នៅសហរដ្ឋអាមេរិក។ លោក អូបាម៉ា បានចុះហត្ថលេខា លើវិធានការច្បាប់ចំនួន ២៣ ហើយបានជំរុញអោយសភា ខិតខំធ្វើយ៉ាងណា អោយច្បាប់ត្រួតត្រាអាវុធ មានការវិវត្តន៍ទៅមុខ បានឆាប់រហ័ស។គំរោងរបស់ប្រធានាធិបតីអាមេរិក ធ្វើឡើង តែមួយខែប៉ុណ្ណោះ ក្រោយពីមានសោកនាដកម្ម ដោយការសំលាប់រង្គាល លើសិស្ស និងគ្រូបង្រៀន នៅសាលាបឋមសិក្សា Newtown ក្នុងរដ្ឋ Connecticut កាលពីពាក់កណ្តាល ខែ ធ្នូ កន្លងមក ដែលធ្វើអោយមនុស្ស ២៦ នាក់ បាត់បង់ជីវិត ក្នុងនោះកូនសិស្ស ២០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កាលពីថ្ងៃពុធម្សិលមិញ ប្រធានាធិបតីអាមេរិក បានស្នើអោយសភា បង្កើតឡើងវិញ នូវច្បាប់ហាមឃាត់ មិនអោយមានការប្រើប្រាស់អាវុធ និងអោយមានការត្រួតមើល នូវប្រវត្តិអតីតកាលរបស់អ្នកដែលទិញកាំភ្លើង ប្រើប្រាស់។
ប្រធានាធិបតីអាមេរិក បានប្រាប់ថា លោកនឹងប្រកាសអោយប្រើវិធានការច្បាប់ ចំនួន២៣ ដែលសំរេចឡើង ដោយក្រិតប្រធានាធិបតី។ វិធានការច្បាប់ទាំងនេះ អនុញ្ញាតអោយមានការត្រួតពិនិត្យរាល់បុគ្គលដែលមានកាំភ្លើងប្រើប្រាស់ ពង្រឹងប្រព័ន្ធសន្តិសុខទាក់ទងនឹងអាវុធ ជួយដល់សាលារៀននានា អោយត្រៀមការប្រុងប្រយ័ត្នខ្ពស់ ក្នុងករណីមានការវាយប្រហារ។ ខ្លឹមសារសំខាន់លើសពីនេះ គឺការត្រួតពិនិត្យអាវុធ ធ្វើយ៉ាងណាកុំអោយធ្លាក់ដល់ដៃឧក្រិដ្ឋជន។ លោក អូបាម៉ា ក៏មានគំរោងបង្កើនថវិកា ជួយដល់ជនដែលមានបញ្ហាផ្លូវចិត្តផងដែរ។
ប៉ុន្តែ វិធានការដែលសំខាន់ជាងគេ ដែលសភានឹងសំរេចនោះ គឺការហាមឃាត់ប្រើប្រាស់កាំភ្លើងវែង បង់កាំភ្លើងដែលមានគ្រាប់ច្រើន និងការត្រួតពិនិត្យរាល់អ្នកដែលទិញអាវុធប្រើប្រាស់ ព្រោះថាអ្នកទិញអាវុធ ៤០ភាគរយ ទៅទិញកាំភ្លើងប្រើ តាមកន្លែងធ្វើអាវុធឯកជនផ្សេងៗ និងនៅតាមផ្សារខ្លះដែលមិនបានទាមទារ សួរព័ត៌មានទាក់ទងនឹងប្រវត្តិអតីតកាល របស់ពួកគេ។
គេរំពឹងមើលថា ការខិតខំរបស់ប្រធានាធិបតីអាមេរិក ប្រហែលជាពិបាកនឹងទទួលបាន ជោគជ័យណាស់ ដោយសារតែតំណាងរាស្ត្រមួយចំនួន នៅមានភាពរួញរា នៅចំពោះមុខវិធានការច្បាប់នេះ នៅឡើយ។ ទោះយ៉ាងណាក្តី លោក អូបាម៉ា បានសុំអោយប្រជាជនអាមេរិក ដាក់សម្ពាធ ទៅលើតំណាងរាស្ត្ររបស់ពួកគេ ដើម្បីអោយមានការអនុម័តនូវគំរោងនេះឡើង។
“ប្រសិនបើ ការកាត់បន្ថយហិង្សាបង្កឡើង ដោយកាំភ្លើង ជាការភ្នាល់មានលក្ខណៈពិបាកស្មុគ្រស្មាញ ការការពារកូនចៅយើង អោយរួចផុតពីគ្រោះថ្នាក់ មិនត្រូវក្លាយជាប្រធានបទ ដែលធ្វើអោយមានការខ្វែងគំនិតគ្នានោះទេ” នេះជាសំដីសង្កត់បន្ថែមរបស់ ប្រធានាធិបតីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ