ដំណើរទស្សនកិច្ចមិនធ្លាប់មានរបស់សម្តេចប៉ាប ហ្វ្រង់ស័រ នៅសហរដ្ឋអាមេរិក
បន្ទាប់ពីទស្សនកិច្ចបួនថ្ងៃនៅគុយបា ក្នុងអត្ថន័យផ្សះផ្សា ទស្សនកិច្ចនៅសហរដ្ឋអាមេរិក៦ថ្ងៃរបស់សម្តេចប៉ាប ហ្វ្រង់ស័រ ទំនងជាមានលក្ខណៈស្មុគស្មាញជាង។ ម្សិលមិញ សម្តេចប៉ាបបានជួបពិភាក្សាជាមួយលោកប្រធានាធិបតីអាមេរិក បារ៉ាក់អូបាម៉ា នៅសេតវិមាន។ ថ្ងៃព្រហស្បតិ៍នេះ ជាថ្ងៃនយោបាយបំផុតសម្រាប់ដំណើរទស្សនកិច្ចលើកដំបូងបង្អស់របស់សម្តេចនៅលើទឹកដីសហរដ្ឋ ដោយសម្តេចប៉ាប ត្រូវថ្លែងសុន្ទរកថា ជាប្រវត្តិសាស្ត្រនៅមុខសភានិងព្រឹទ្ធសភាអាមេរិក។ ថ្វីបើពលរដ្ឋអាមេរិកពីរភាគបីគោរពស្រឡាញ់សម្តេចប៉ាបមែន ប៉ុន្តែទស្សនៈច្បាស់លាស់ ផ្នែកសង្គម ផ្នែកអាកាសធាតុ បានធ្វើឱ្យក្រុមអ្នកអភិរក្សនិយម ក្រុមអ្នកសាធារណរដ្ឋ និងក្រុមអ្នកសេដ្ឋកិច្ចសេរីនិយមមិនពេញចិត្តទេ។
ចុះផ្សាយនៅថ្ងៃ៖
ស្តាប់ - ០៦:១៥
លោកប្រធានាធិបតីអាមេរិក និងភរិយា ព្រមទាំងកូនស្រីទាំងពីរ គ្រួសារលោក ចូ ដៃឌិន អនុប្រធានាធិបតី បាននាំគ្នាធ្វើគារកិច្ចទទួលសម្តេចប៉ាបដល់ដណ្តើរយន្តហោះ។ សហរដ្ឋអាមេរិក បានទទួលស្វាគមន៍សម្តេចប៉ាបយ៉ាងកក់ក្តៅ ! បើទោះបីជាអាមេរិកមិនមែនជាប្រទេសកាតូលិកក៏ដោយ។
ពលរដ្ឋអាមេរិកភាគច្រើនជាអ្នកកាន់សាសនាប្រូតេស្តង់។ លោកប្រធានាធិបតីបារ៉ាក់ អូបាម៉ា ផ្ទាល់ ក៏ជាប្រូតេស្តង់។ ប៉ុន្តែសម្តេចប៉ាប ហ្វ្រង់ស័រ មានប្រជាប្រិយភាពខ្លាំងណាស់ ! មានពលរដ្ឋអាមេរិក ដល់ទៅ ៧០% និងគ្រិស្តសាសនិកជន ដល់ទៅ៨៦% គោរពស្រឡាញ់ព្រះអង្គ។ អ្នកកាន់សាសនាកាតូលិក តំណាងឱ្យជាង២១%ប៉ុណ្ណោះ។ ជាងនេះទៅទៀត ចំនួនគ្រិស្តសាសនិកជន បានធ្លាក់ចុះជាលំដាប់ នារយៈពេលប៉ុន្មានឆ្នាំចុងក្រោយនេះនៅសហរដ្ឋអាមេរិក(បាត់អស់ប្រមាណពី១ទៅបីលាននាក់)។
មិនមែនជាប្រទេសកាតូលិក ប៉ុន្តែអ្នកកាតូលិកមានកម្លាំងនយោបាយខ្ពស់ នៅលំដាប់ទីពីរ បន្ទាប់ពីប្រូតេស្តង់ នៅក្នុងសភា ដោយមានតំណាងជាប់ឆ្នោតដល់ទៅ ១៦៤អាសនៈ ពោលគឺស្មើនឹង៣០% ដែលអាចប្រៀបផ្ទឹមនឹងកម្លាំងអ្នកសាធារណរដ្ឋ និងប្រជាធិបតេយ្យបាន។ គួរឱ្យភ្ញាក់ផ្អើលជាងនេះទៅទៀត គឺក្នុងចំណោមចៅក្រមរបស់តុលាការកំពូលអាមេរិកទាំង៩នាក់ មាន៦ជាអ្នកកាន់សាសនាកាតូលិក បីនាក់ទៀតជាជ្វីហ្វ។ លោកអនុប្រធានាធិបតីអាមេរិក ចូបៃឌិន និង « Speaker » របស់បក្សសាធារណរដ្ឋនៅសភា ក៏ជាគ្រិស្តសាសនិកជនដែរ។
និន្នាការនយោបាយអ្នកកាតូលិក
បើមើលតួលេខនេះ កាតូលិកមានកម្លាំង អាចប្រឈមនឹងការតស៊ូមតិនយោបាយ និងការវិវឌ្ឍន៍ក្នុងសង្គមអាមេរិកដោយគ្មានការលំបាកអ្វីទេ។ ប៉ុន្តែក្នុងនយោបាយវាដូច្នេះទេ ! ក្រុមអ្នកកាន់សាសនាកាតូលិក បែងខ្ញែកគ្នាខ្លាំងណាស់ មិនដូចក្រុមប្រូតេស្តង់ឡើយ។ អ្នកប្រូតេស្តង់អាមេរិកមានសណ្តាប់ធ្នាប់ជាង និងបែងចែកយ៉ាងច្បាស់លាស់ ខាងវិហារស្បែកសជាអ្នកអភិរក្សគាំទ្របក្សសាធារណរដ្ឋ និងខាងប្រូតេស្តង់ខ្មៅ ដួលទៅខាងបក្សសាធារណរដ្ឋ។
ឯក្រុមអ្នកកាន់សាសនាកាតូលិក គឺផ្អៀងផ្អងប្តូរបក្ស ទៅតាមបេក្ខជនប្រធានាធិបតី។ ប្រពៃណីពីមុន អ្នកកាតូលិកច្រើនតែជាអ្នកប្រជាធិបតេយ្យ តែកាតូលិកជំនាន់ក្រោយៗមួយភាគបានងាកទៅជិតដិតនឹងអ្នកអភិរក្សនិយម លើបញ្ហាសេដ្ឋកិច្ច ឬបញ្ហាបរិស្ថាន។
បរិស្ថាន អន្តោប្រវេសន៍ ប្រធានបទក្តៅនៃសុន្ទរកថារបស់សម្តេចប៉ាបនៅសភាអាមេរិក
សម្តេចប៉ាប មិនបានរង់ចាំដល់ពេលឡើងថ្លែងសុន្ទរកថា សម្រាប់បញ្ជាក់ជំហរព្រះអង្គ លើប្រធានបទផ្សេងៗដែលអ្នកប្រជាធិបតេយ្យ និងសាធារណរដ្ឋអាមេរិក មិនចុះសម្រុងនឹងគ្នាទេ។ តាំងពីថ្ងៃទីមួយនៃការផ្តើមទស្សនកិច្ចភ្លាម និងក្នុងពេលថ្លែងជាសាធារណៈនៅសេតវិមាន ម្សិលមិញ សម្តេចប៉ាប បានរំលឹក អំពីភាពចាំបាច់ក្នុងការគិតគូរដោះស្រាយវិបត្តិអន្តោប្រវេសន៍ និងវិបត្តិអាកាសធាតុ ដោយស្នើសុំឱ្យវិហារកាតូលិកអាមេរិកចូលរួមចំណែកឱ្យបានកាន់តែច្រើននិងខ្លាំង។
ដំណើរទស្សនកិច្ចជាលើកទីមួយក្នុងនាមជាសម្តេចសង្ឃកាតូលិក និងជាលើកដំបូងក្នុងជីវិតរបស់សម្តេច លើទឹកដីអាមេរិក សម្តេចប៉ាបហ្វ្រង់ស័រ មានបំណងលើកទឹកចិត្តរដ្ឋបាលអូបាម៉ា ចំពោះនយោបាយជាមួយគុយបា និងពិសេសចំពោះការខិតខំប្រឹងប្រែង របស់លោកប្រធានាធិបតីអាមេរិក ក្នុងកាត់បន្ថយការបញ្ចេញឧស្ម័នបំពុលបរិស្ថាន ។ សម្រាប់សម្តេចប៉ាប ការប្រែប្រួលអាកាសធាតុ មិនមែនបង្កផលវិបាកដល់ត្រឹមសត្វខ្លាឃ្មុំស នៅតំបន់ប៉ូលទេ តែវាបានប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់ពលរដ្ឋក្រីក្រ។ អ្នកក្រីក្ររងគ្រោះខ្លាំងព្រោះគ្មានមធ្យោបាយទប់ទល់នឹងបំលាស់ប្តូរអាកាសធាតុ។ ដូច្នេះគេត្រូវតែបញ្ចេញសកម្មភាពភ្លាមជាបន្ទាន់។ តែក្រុមអ្នកសាធារណរដ្ឋអាចស្តាប់មិនចូលត្រចៀក ព្រោះយល់ថាសម្តេចប៉ាប ជាអ្នកសង្គមជ្រុល និងមិនទុកចិត្តលើការបញ្ចេញសកម្មភាពដើម្បីបរិស្ថាន។
សម្តេចប៉ាបបានតាំងខ្លួនជាកូនអន្តោប្រវេសន៍ ស្វាគមន៍ការស្ថាបនាប្រទេសដោយទទួលយកគ្រួសារមកពីគ្រប់ជ្រុងនៃភពផែនដី។ ជាសង្ឃដីកា ដែលអាចនឹងធ្វើសភាអាមេរិកពុះកញ្ជ្រោលខ្លាំង ព្រោះថាក្រុមអ្នកប្រជាធិបតេយ្យចង់ផ្តល់សញ្ជាតិដល់អ្នកអត់ក្រដាសស្នាមនៅអាមេរិក ឯក្រុមអ្នកសាធារណរដ្ឋចង់បិទព្រំប្រទល់ ហើយបញ្ជូនជនភៀសខ្លួនខុសច្បាប់ទៅភូមិកំណើតដើមវិញ។ ទាក់ទងនឹងប្រធានបទសង្គម ដូចជាសីលធម៌ផ្លូវភេទ គ្រូសារ ក្រុមអ្នកប្រជាធិបតេយ្យអាចមិនពេញចិត្ត។
ប៉ុន្តែភាពចម្រូងចម្រាសនិងទស្សនៈមិនចុះសម្រុងគ្នានេះ គ្មានផលរំខានអ្វីឡើយ សូម្បីតែប្រធានក្រុមអភិរក្សនៅសភា ដែលជាអ្នកអញ្ជើញសម្តេចប៉ាប ក៏មានជំហរផ្ទុយនឹងសម្តេចប៉ាបហ្វ្រង់ស័រដែរក្នុងប្រធានបទអន្តោប្រវេសន៍ ! គ្រប់សមាជិកសភានិងព្រឹទ្ធសភាអាមេរិក ចូលរួមស្តាប់សុន្ទរកថាជាប្រវត្តិសាស្ត្ររបស់សម្តេចប៉ាបនេះ ដោយសឹងតែគ្មានអាក់ខានម្នាក់ឡើយ។ សុន្ទរកថានៅចំពោះមុខសភា ដែលអាមេរិកតែងផ្តល់កិត្តិយសដល់ប្រមុខរដ្ឋ-រដ្ឋាភិបាលជាមិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ