សម្តេចប៉ាបថាហ៊ីរ៉ូស្ហ៊ីម៉ាជានិមិត្តរូបនៃសមត្ថភាពបំផ្លិចបំផ្លាញរបស់មនុស្ស
នៅថ្ងៃអាទិត្យ នៅក្នុងពេលដែលប្រជាជនជនជប៉ុននាំគ្នារំឭកខួប ៧០ឆ្នាំ នៃការទម្លាក់គ្រាប់បែកនុយក្លេអ៊ែរលើទីក្រុងណាហ្កាសាគី សម្តេចប៉ាបហ្វ្រង់ស័របានធ្វើការកត់សម្គាល់ថា អ្វីដែលបានកើតឡើងនៅហ៊ីរ៉ូស្ហ៊ីម៉ា និងណាហ្កាសាគី កាលពី៧០ឆ្នាំមុន គឺជានិមិត្តរូបនៃអំណាចដ៏ខ្លាំងក្លារបស់មនុស្ស គឺអំណាចក្នុងការបំផ្លិចបំផ្លាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅចំពោះហ្វូងមនុស្សដែលប្រមូលផ្តុំគ្នា ក្នុងបុរីវ៉ាទីកង់ នៅរសៀលថ្ងៃអាទិត្យ សម្តេចប៉ាបបានលើកឡើងថា ការវាយប្រហារដោយគ្រាប់បែកនុយក្លេអ៊ែរទៅលើទីក្រុងហ៊ីរ៉ូស្ហ៊ីម៉ា និងណាហ្កាសាគី កាលពីថ្ងៃទី៦ និងទី៩ ខែសីហា ឆ្នាំ១៩៤៥ គឺជាសោកនាដកម្មដ៏គួរឲ្យព្រឺខ្លាច និងគួរឲ្យស្អប់ខ្ពើម ហើយវាជានិមិត្តរូបនៃសមត្ថភាពនៃការបំផ្លិចបំផ្លាញរបស់មនុស្ស នៅពេលដែលមនុស្សយកភាពជឿនលឿននៃវិទ្យាសាស្រ្តទៅប្រើប្រាស់នៅក្នុងផ្លូវខុស។
គួរបញ្ជាក់ថា នេះមិនមែនជាលើកទីមួយទេ ដែលសម្តេចប៉ាបធ្វើការរិះគន់ការប្រើភាពរីកចម្រើននៃវិទ្យាសាស្រ្តនៅក្នុងផ្លូវខុស។ កាលពីពេលថ្មីៗនេះ សម្តេចប៉ាបហ្វ្រង់ស័រក៏ធ្លាប់បានសរសេររិះគន់ផងដែរថា មនុស្សជាតិកំពុងតែប្រើប្រាស់បច្ចេកវិទ្យាដែលមានភាពកាន់តែទំនើបឡើងពីមួយថ្ងៃ ទៅបង្កឲ្យមានការខូចខាតធ្ងន់ធ្ងរដល់បរិស្ថាន ហើយថា មនុស្សកំពុងតែបំផ្លាញខ្លួនឯង នៅពេលដែលមនុស្សគិតតែពីប្រយោជន៍ខ្លួនឯង ហើយមិនគិតគូរពីការការពារធម្មជាតិ។
នៅថ្ងៃអាទិត្យ សម្តេចប៉ាបបានធ្វើការអំពាវនាវឲ្យមនុស្សជាតិនៅទូទាំងពិភពលោករួមសំឡេងគ្នាតែមួយ ដើម្បីប្រឆាំងនឹងសង្រ្គាម និងការប្រើអំពើហិង្សា ដោយងាកមកដោះស្រាយបញ្ហាដោយសន្តិវិធីតាមរយៈការជជែកចរចាគ្នា។ “ទីណាក៏ដោយឲ្យតែមានសង្រ្គាម គឺមានតែបរាជ័យ។ មានមធ្យោបាយតែមួយគត់ ដើម្បីឈ្នះសង្រ្គាម គឺកុំធ្វើសង្រ្គាម”។
គួររំឭកឡើងវិញថា គ្រាប់បែកនុយក្លេអ៊ែរ២គ្រាប់ ដែលអាមេរិកទម្លាក់លើទីក្រុងហ៊ីរ៉ូស្ហ៊ីម៉ា និងណាហ្កាសាគី កាលពីខែសីហា ឆ្នាំ១៩៤៥ បានសម្លាប់មនុស្សរហូតដល់ទៅប្រមាណជា ២សែននាក់ ទាំងអ្នកស្លាប់ភ្លាមៗ និងអ្នកស្លាប់ក្រោយៗមកទៀតដោយរងធាតុវិទ្យុសកម្ម។
បច្ចុប្បន្ននេះ ចំនួនក្បាលគ្រាប់នុយក្លេអ៊ែរនៅទូទាំងពិភពលោកមានរហូតដល់ទៅជាង ១ម៉ឺន៦ពាន់គ្រាប់ ដោយមួយគ្រាប់ៗមានកម្លាំងផ្ទុះខ្លាំងជាងគ្រាប់បែកទម្លាក់នៅហ៊ីរ៉ូស្ហ៊ីម៉ា និងណាហ្កាសាគី រហូតដល់ទៅរាប់ពាន់ដងឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ