អូបាម៉ាលុបចោលគម្រោងសាងសង់បំពង់បង្ហូរប្រេងជាមួយកាណាដាដើម្បីអាកាសធាតុ
ជាសំណុំរឿងដ៏ចម្រូងចម្រាសតាំងពីជាច្រើនឆ្នាំមកហើយ ប៉ុន្តែនៅល្ងាចមិញលោក ប្រធានាធិបតីអាមេរិក បារ៉ាក់ អូបាម៉ា បានចេញមុខអារកាត់សេចក្តី ច្រានចោលគម្រោងសាងសង់ បំពង់បង្ហូរប្រេង Keystone XL ដ៏ធំបំផុតមួយជាមួយកាណាដា។ ការបដិសេធនេះបានធ្វើឱ្យកាណាដាមិនសប្បាយចិត្ត ប៉ុន្តែបានសបញ្ជាក់ឱ្យឃើញអំពីចេតនាពិតរបស់អាមេរិកថាជាអ្នកដើរតួនាទីដ៏សំខាន់ ក្នុងការប្រយុទ្ធប្រឆាំងនឹងប្តូរផ្លាស់អាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
“ត្រូវតែបញ្ចេញសកម្មភាពភ្លាម ! នៅថ្ងៃនេះ មិនចាំស្អែកទេ !” អនុម័តលើគម្រោងសាងសង់បំពង់បង្ហូរប្រេងនេះនឹងធ្វើឱ្យភាពជាអ្នកដឹកនាំរបស់អាមេរិកស្តីអាកាសធាតុត្រូវចុះខ្សោយ។ នេះជាការអះអាងរបស់លោកអូបាម៉ា នៅល្ងាចមិញ ដោយបានបញ្ជាក់បន្ថែមថា គម្រោងនេះ ប៉ះពាល់តិចតួចណាស់ ដល់សេដ្ឋកិច្ចអាមេរិក មិនបានបញ្ចុះតម្លៃប្រេងនៅក្នុងប្រទេស ហើយការដឹកប្រេងឆៅ ប្រេងកខ្វក់ឆ្លងកាត់ប្រទេសមិនបានពង្រឹងសុវត្ថិភាពថាមពលអាមេរិកទេ។
គម្រោងសាងសង់បំពង់បង្ហូរប្រេងពីខេត្តអាល់បែរតាភាគខាងលិចកាណាដាទៅកាន់រដ្ឋណេប្រាស្កាអាមេរិក ប្រវែងសរុប១៩០០គីឡូម៉ែត្រ (១៤០០គីឡូម៉ែត្រនៅសហរដ្ឋអាមេរិក) ដើម្បីអាចភ្ជាប់ទៅដល់រោងចក្រចម្រាញ់ប្រេងអាមេរិកនៅឈូងសមុទ្ទម៉ិចស៊ិក ត្រូវបានក្រុមហ៊ុនកាណាដាស្នើសុំ តាំងពីជាង៦ឆ្នាំមុន។ ប៉ុន្តែទើបត្រូវបានលោកប្រធានាធិបតីអាមេរិក អារកាត់សេចក្តី ក្រោមក្រសែភ្នែកក្តៅក្រហាយរបស់អ្នកសារធារណរដ្ឋ ក្នុងខណៈដែលសន្និសីទអន្តរជាតិស្តីអំពីអាកាសធាតុ ក្រុងប៉ារីស នឹងត្រូវចាប់ផ្តើម នៅរវាងបីសប្តាហ៍ទៀតខាងមុខ។ សន្និសីទដែលមានកម្មវត្ថុសម្រេចឱ្យបានកិច្ចព្រមព្រៀងកំណត់ការបញ្ចេញឧស្ម័នផ្ទះកញ្ចក់ ទប់ស្កាត់កុំឱ្យឡើងកំដៅនៃភពផែនដី និងដែលលោកអូបាម៉ាផ្ទាល់ត្រូវចូលរួមជាលើកទីមួយ។
ជាមួយនឹងការផ្តល់ចម្លើយអវិជ្ជមាននេះ លោកអូបាម៉ា បានក្លាយជាប្រមុខដឹកនាំប្រទេសទីមួយ ដែលហ៊ានច្រានចោលគម្រោងមួយ ដោយមូលហេតុអqកាសធាតុ។ អ្នកការពារបរិស្ថាន និងអ្នកប្រជាធិបតេយ្យ ស្វាគមន៍យ៉ាងខ្លាំងសេចក្តីសម្រេចចិត្តនេះ ព្រោះការទាញប្រេងឆៅពីតំបន់វាលខ្សាច់ស៊ីថាមពលខ្លាំងណាស់។ ខាងភាគីកាណាដា លោកនាយករដ្ឋមន្ត្រីថ្មីបានសម្តែងការសោកស្តាយយ៉ាងខ្លាំងការលុបគម្រោងនេះ ប៉ុន្តែយល់ថាទំនាក់ទំនងអាមេរិក-កាណាដា មិនមែនកំណត់ត្រឹមគម្រោងមួយទេ។ ប្រមុខរដ្ឋាភិបាលកាណាដាថ្មីនេះមានជំហរទន់ភ្លន់ជាងនាយករដ្ឋមន្ត្រីចាស់ ដែលការពារគម្រោងសាងសង់បំពង់ប្រេងនិងការទាញប្រេងឆៅនៅខេត្តអាល់បែរតាយ៉ាងមុតមាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ