សង្រ្គាមស៊ីរី៖ ស្របពេលដែលការចរចាជាប់គាំង អាមេរិកបញ្ជូនកងកុម្ម៉ង់ដូទៅស៊ីរី
សង្រ្គាមនៅស៊ីរី នៅតែជាចំណុចក្តៅបំផុត នៃនយោបាយការបរទេសអន្តរជាតិ ព្រោះវាបានធ្វើឲ្យ តំបន់ដើមបូព៌ាទាំងមូល រង្គោះរង្គើរ។ កិច្ចចរចា ដែលបានធ្វើឡើងនៅទីក្រុងវីយែន កាលពីថ្ងៃសុក្រ បានបិទបញ្ចប់ទៅ ដោយមិនបានលទ្ធផលអ្វី ដោយសារតែភាគីទាំងអស់និយាយមិនចុះសម្រុងគ្នា ទាក់ទិននឹងអនាគត របស់ប្រធានាធិបតីស៊ីរីបច្ចុប្បន្ន លោក បាស្ហា អាល់អាសាដ។ ស្របពេលគ្នានេះ សហរដ្ឋអាមេរិក ទើបបានប្រកាសផងដែរ ថានឹងបញ្ជូន កម្លាំងពិសេស ទៅស៊ីរី ដើម្បីជួយក្រុមឧទ្ទាមប្រឆាំងរដ្ឋាភិបាល ដែលនេះគឺជា ការផ្លាស់ប្តូរយុទ្ធសាស្ត្រថ្មី របស់អាមេរិក ព្រោះកន្លងមក លោកអូបាម៉ា បាននិយាយហើយ និយាយទៀតថា អាមេរិក មិនបញ្ជូនទ័ពថ្មើរជើង ទៅស៊ីរីជាដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤១
ការចរចានៅវីយែន ជាជោគជ័យជំហានដំបូង ថ្វីត្បិតតែគ្មានលទ្ធផល៖
វាជាលើកទីមួយហើយ ដែលមានការចរចា ទ្រង់ទ្រាយធំ និងជាផ្លូវការ ដើម្បីស្វែងរកសន្តិភាពនៅស៊ីរី។ ដូចយើងដឹងស្រាប់ថា សង្រ្គាមនៅស៊ីរី បានអូសបន្លាយ៥ឆ្នាំមកហើយ ហើយអ្វីដែលគេព្រួយបារម្ភខ្លាំងនោះ គឺថា ក្រុមជីហាដអង្គការរដ្ឋអ៊ីស្លាម កំពុងតែឆក់ឱកាសនេះ ដើម្បីពង្រីកកម្លាំង និងដែនដីរបស់ពួកវា ដែលនេះជាការគម្រាមកំហែងធំណាស់ សម្រាប់តំបន់ដើមបូព៌ា និងពិភពលោកយើងទាំងមូល។
ការប្រជុំនៅទីក្រុងវីយែន ប្រទេសអូទ្រីស កាលពីម្សិលមិញ បានប្រព្រឹត្តិទៅ រយៈពេល៨ម៉ោងឯណោះ ប៉ុន្តែមិនបានបិទបញ្ចប់ទៅ ដោយមានលទ្ធផលអ្វីជាក់លាក់ទេ។ ក៏ប៉ុន្តែ នេះជាជំហានដំបូង ដែលយើងអាចចាត់ទុកថា ជាជោគជ័យមួយដែរ ដោយសារកិច្ចប្រជុំនេះ បានប្រមូល ប្រទេសទាំងអស់ ១៧ ដែលមានចំណែកដឹងឮ និងជាប់ពាក់ព័ន្ធ នឹងវាសនារបស់ស៊ីរី ហើយក្នុងនោះ ក៏ជាលើកដំបូងដែរ ដែលអាមេរិក បានអនុញ្ញាតិ ឲ្យមានវត្តមាន របស់អ៊ីរ៉ង់ នៅក្នុងតុចរចា។ ការប្រមូលគ្នា មកនិយាយចរចា ត្រង់ទៅត្រង់មក បែបនេះ វាជាជោគជ័យ ជាបឋមហើយ។
ទុកបាស្ឆា អាល់អាសាដ រឺមិនទុក?
ត្រឡប់មកនិយាយអំពីមូលហេតុ ដែលភាគីទាំងអស់ នៅមិនទាន់ចុះសម្រុងនឹងគ្នា គឺពាក់ព័ន្ធសំខាន់ ទៅលើវាសនា និងតួនាទី របស់ប្រធានាធិបតីស៊ីរីបច្ចុប្បន្ន គឺលោក បាស្ឆា អាល់អាសាដ។ ក្រុមប្រទេសលោកខាងលិច ដែលដឹកនាំដោយបារាំង និងអាមេរិក រួមជាមួយប្រទេសអារ៉ាប់មួយចំនួនផង បានទាមទារថា ត្រូវបញ្ចប់អំណាចរបស់បាស្ឆា អាល់អាសាដ ហើយរៀបចំកសាងស៊ីរីសាជាថ្មី។ បារាំង អាមេរិក បានទាំងសំណូមពរឲ្យដាក់ ជាកាលបរិច្ឆេទច្បាស់លាស់ ជាដំណាក់កាល ដើម្បីបញ្ចប់អំណាច របស់បាស្ឆា អាល់អាសាដ។ ក៏ប៉ុន្តែ សំណើរនេះ ត្រូវបានអ៊ីរ៉ង់ និងរុស្ស៊ី ទាត់ចោលទាំងស្រុង។
យ៉ាងណា ក៏ដោយភាគីទាំងអស់ មានទំនោរដូចគ្នាមួយ គឺរក្សាបូរណភាព និងឯកភាពជាតិស៊ីរីតែមួយ មិនឲ្យពុះច្រៀកស៊ីរី ជាចំណែក ដើម្បីដោះស្រាយបញ្ហានោះទេ។ ហើយមួយទៀត បើទោះជាមិនទាន់មានការព្រមព្រៀងគ្នា ជាក់លាក់ក៏ដោយ ក៏ភាគីធំៗ មានអាមេរិក បារាំង រុស្ស៊ី និងអ៊ីរ៉ង់ ទំនងជាស្របគ្នា ក្នុងការសម្រេច ប្រគល់តួនាទី ទៅឲ្យអង្គការសហប្រជាជាតិ ចាត់ឲ្យមានការទម្លាក់អាវុធពីគ្រប់ភាគី ដើម្បីរៀបចំការបោះឆ្នោតទូទៅមួយនៅស៊ីរី ហើយនិង ធ្វើការតាក់តែងរដ្ឋធម្មនុញ្ញថ្មី។
ទាក់ទិននឹងការបោះឆ្នោតនេះឯង ដែលភាគីទាំងអស់នៅនិយាយគ្នាមិនត្រូវ ព្រោះបារាំង អង់គ្លេស និងអាមេរិក មិនព្រមឲ្យបាស្ឆា អាល់អាសាដ ត្រលប់ចូលឆាកនយោបាយ ជាដាច់ខាត ប៉ុន្តែអ៊ីរ៉ង់ និងរុស្ស៊ី ដែលកាន់ជើងអាសាដ បានទាមទារថា ទុកឲ្យប្រជាជនស៊ីរី គេជាអ្នកសម្រចចិត្ត។ យ៉ាងណាក៏ដោយ ប្រធានាធិបតី ម្នាក់ដែលមិនញញើត នឹងទម្លាក់គ្រាប់បែក សម្លាប់ប្រជាជនខ្លួនឯង ដើម្បីរក្សាអំណាច គេមិនគួរទុកឲ្យនៅ កាន់តំណែង តទៅទៀតទេ។
អាមេរិកប្តូរយុទ្ធសាស្ត្រ បញ្ជូនកម្លាំងពិសេស៥០នាក់ ទៅជួយក្រុមឧទ្ទាមស៊ីរី៖
យើងអាចចាត់ទុកថា វាជាការផ្លាស់ប្តូរយុទ្ធសាស្ត្រថ្មី របស់អាមេរិកក៏ថាបាន។ ដូចយើងដឹងស្រាប់ថា អាមេរិក បាក់ស្បាតបន្ទាប់ពីបរាជ័យ នៅអាហ្វហ្គានីស្ថាន នឹងនៅអ៊ីរ៉ាក់ ស្លាប់ទាហានរាប់ពាន់អ្នក។ អញ្ចឹងហើយ បានជានៅឆ្នាំ២០១៤ លោកអូបាម៉ា បានសម្រេចថា អាមេរិក នឹងធ្វើប្រតិបត្តិការកម្ទេចពួកជីហាដនៅស៊ីរី និងអ៊ីរ៉ាក់ តែពីលើអាកាសតែប៉ុណ្ណោះ ព្រោះថាបើបញ្ជូនកម្លាំងកងទ័ពជើងគោក ទៅដោយផ្ទាល់ គឺចំណាយច្រើន ហើយប្រឈមមុខនឹងគ្រោះថ្នាក់ខ្លាំងណាស់។ ក៏ប៉ុន្តែ កន្លងមកនេះ អាមេរិក នៅតែមានកងកម្លាំងពិសេស បន្តិចបន្តួច ប្រចាំនៅអ៊ីរ៉ាក់ គ្រាន់តែថា កងកម្លាំងនេះ អត់មានតួនាទីធ្វើប្រតិបត្តិការវាយប្រហារទេ គឺមានបេសកកម្ម គ្រាន់តែ ជួយសម្របសម្រួល ធ្វើការចាត់ចែងបែងចែកជំនួយ ព្រមទាំងជួយហ្វឹកហាត់ជាដើម។
ការសម្រេចបញ្ជូនកម្លាំង ទៅស៊ីរីនាពេលនេះ វាថ្មីមែន ប៉ុន្តែវាមិនមែនជាការផ្លាស់ប្តូរយុទ្ធសាស្ត្រ អ្វីធំដុំទេ។ កម្លាំងពិសេស ដែលអាមេរិកនឹងបញ្ជូនទៅ នៅខែក្រោយនេះ មានចំនួន តែ៥០នាក់តែប៉ុណ្ណោះ ហើយតួនាទី របស់កម្លាំងពិសេសនេះ មិនមែនទៅប្រយុទ្ធទេ គឺទៅដើម្បីជួយសម្របសម្រួល ដល់ក្រុមឧទ្ទាមស៊ីរី ដែលកំពុងប្រយុទ្ធ ជាមួយទាហានរដ្ឋាភិបាលអាសាដផង និងក្រុមជីហាដរដ្ឋអ៊ីស្លាមផង។ ការជួយសម្របសម្រួលនេះ គឺមានជាអាទិ៍ ដូចជាជួយចាត់ចែង ធ្វើការបែងចែក ជំនួយស្បៀង សម្ភារៈ និងអាវុធ ដែលកងទ័ពអាមេរិកបានទំលាក់តាមយន្តហោះ ហើយធ្វើយ៉ាងណា បែងចែក និងប្រើប្រាស់ជំនួយទាំងអស់នេះ ឲ្យចំទិសដៅ និងមានប្រសិទ្ធិភាព។
លោក Josh Earnest អ្នកនាំពាក្យសេតវិមាន បានបញ្ជាក់ហើយថា បើអាមេរិកចង់បញ្ជូនទ័ពទៅប្រយុទ្ធនៅលើដីស៊ីរី គេប្រាកដជាបញ្ជូនទៅ រាប់រយរាប់ពាន់នាក់ មិនមែន៥០នាក់អញ្ចឹងទេ។ លោកបន្តថា កងទ័ពអាមេរិកដឹងយ៉ាងច្បាស់ ថា សមរភូមិស៊ីរី និងអ៊ីរ៉ាក់ មានគ្រោះថា្នក់ណាស់ ហើយកម្លាំងពិសេស៥០នាក់នេះ គឺទៅដើម្បីជួយហ្វឹកហាត់ និងផ្តល់ប្រឹក្សាយុទ្ធសាស្ត្រដល់ក្រុមកម្លាំងឧទ្ទាមតែប៉ុណ្ណោះ មិនមែនទៅធ្វើការប្រយុទ្ធ នៅសមរភូមិដោយផ្ទាល់ទេ។ ដោយឡែក អាមេរិក កំពុងពិចារណាផងដែរ អំពី ការបន្ថែមកម្លាំងពិសេសរបៀបនេះ នៅអ៊ីរ៉ាក់ដែរ។ ហើយចំណែក ការធ្វើប្រតិបតិ្តការតាមផ្លូវអាកាសវិញ អាមេរិក នៅតែបន្តធ្វើ ហើយទើបបានសម្រេចបញ្ជូនយន្តហោះចម្បាំង ប្រភេទ F-15 និង A-10 ទៅមូលដ្ឋាននៅតួកគីបន្ថែមទៀត។
អាមេរិកចង់ស្តារមុខមាត់ តែគ្មានយុទ្ធសាស្ត្រច្បាស់លាស់៖
បើនិយាយទៅ ការសម្រេចបញ្ជូនកម្លាំងពិសេស៥០នាក់នេះ ធ្វើឡើងក្នុងន័យនយោបាយ ជាជាងយុទ្ធសាស្ត្រយោធា។ ព្រោះថា ៥០ នាក់វាតិចណាស់ មិនដឹងជាធ្វើអ្វីកើតទេ។ ហេតុអ្វីបានជាថានេះជាទិសដៅនយោបាយ ដោយសារតែអាមេរិក ខ្លាចបាក់មុខ។ បញ្ជូនទ័ពពិសេសទៅ នាពេលនេះ ដើម្បីបង្ហាញថាគេខំប្រឹងប្រែងណាស់ដែរ មិនមែនមានតែរុស្ស៊ីនោះទេ។ កន្លងមកប៉ុន្មានឆ្នាំនេះ រដ្ឋាភិបាលលោកអូបាម៉ា មិនសូវជាស្វះស្វែង រឿងបញ្ជូនទ័ពទៅអន្តរាគមន៍នៅខាងក្រៅទេ។ ការដែលធ្វើកន្លងមកនេះ គឺតិចតួចណាស់ ហើយធ្វើគ្រាន់តែបង្រ្គប់កិច្ចតែប៉ុណ្ណោះ។
យ៉ាងណាក៏ដោយ ផលវិជ្ជាមានខាងយុទ្ធសាស្ត្រយោធា ក៏មានខ្លះដែរ មិនអត់ទេ។ ការដែលបញ្ជូនកម្លាំងអាមេរិក ឲ្យទៅនៅក្នុងមូលដ្ឋានរបស់ក្រុមឧទ្ទាមកណ្តាលនិយមនេះ មានន័យថា រុស្ស៊ីត្រូវតែពិចារណា ឲ្យច្បាស់ មុននឹងទម្លាក់គ្រាប់បែក ពីលើក្រុមឧទ្ទាម។ ព្រោះថាបើទម្លាក់មិនប្រយ័ត្ន ស្លាប់ទាហានអាមេរិក ដែលនៅទីនោះ នោះប្រាដកជាមានរឿងជាមិនខាន។
តាមពិតទៅ វាចង់យឺតពេលទៅហើយ ដែលអាមេរិកចង់ស្តារមុខមាត់ និងស្ថានការណ៍នៅស៊ីរី ហើយដល់បញ្ជូនកម្លាំងទៅ គឺទៅតែមួយតំបរស្វា អញ្ចឹង គឺថាមិនរសើបទេ។ កាលពីដើមខែតុលានេះ អាមេរិក ប្រកាសថាកាត់បន្ថយជំនួយ ក្នុងកម្មវិធីបង្វឹកហាត់ក្រុមឧទ្ទាមកណ្តាលនិយមនៅស៊ីរី ដោយសារតែក្រុមនេះ នៅតែវាយមិនឈ្នះគេដដែល។ ហើយដល់ឥឡូវប្រកាសថា បញ្ជូនកម្លាំង៥០នាក់ ទៅជួយ ក្រុមឧទ្ទាម។ សរុបមកយើងឃើញថា ដូចដែលសមាជិកព្រឹទ្ធសភា ខាងគណបក្សសាធារណរដ្ឋអាមេរិកគេរិះគន់ គឺថារដ្ឋាភិបាលលោកអូបាម៉ា អត់មានយុទ្ធសាស្ត្រអី្វមួយ ច្បាស់លាស់ទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ