JO-២០១៦ បិទបញ្ចប់ដោយក្តីរីករាយនិងមោទនភាពរបស់ប្រទេសម្ចាស់ផ្ទះ
ការប្រកួតកីឡាអូឡាំពិកឆ្នាំ២០១៦ នៅទីក្រុងរីយ៉ូ រយៈពេល១៦ថ្ងៃ ត្រូវបិទបញ្ចប់នៅថ្ងៃអាទិត្យទី ២១ សីហានេះ ជាមួយនឹងការវាយតម្លៃជាទូទៅ ថាល្អ ប្រេស៊ីលធ្វើបានសក្តិសមនឹងសមត្ថភាពខ្លួន។ ប៉ុន្តែ ប្រេស៊ីលខ្លួនឯងមានមោទនភាពបំផុត ពីព្រោះប្រទេសជាម្ចាស់ផ្ទះប្រេស៊ីល បានទទួលមេដាយមាស នៅក្នុងវិញ្ញាសាកីឡាបាល់ទាត់ ដែលជាកីឡាដ៏សំខាន់ជាងគេបំផុត សម្រាប់ក្រសែភ្នែកពលរដ្ឋប្រេស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ស្ថិតនៅក្នុងលំដាប់ទី១៤ ក្នុងចំណាត់ថ្នាក់ប្រទេសចូលរួមប្រកួតកីឡាអូឡាំពិកទាំងអស់ ក៏មិនថ្វី ! សំខាន់គឺប្រេស៊ីលដណ្តើមមេដាយមាសក្នុងវិញ្ញាសាបាល់ទាត់ ! នៅប្រេស៊ីល គ្មានមេដាយមាសអូឡាំពិកណាមានតម្លៃស្មើនឹងមេដាយមាស ដែលបានមកពីការឈ្នះការប្រកួតបាល់ទាត់ឡើយ ! បានងារជាជើងឯកអូឡាំពិក ប្រេស៊ីល ប្រទេសម្ចាស់ផ្ទះបានបិទបញ្ចប់ការប្រកួតកីឡាអូឡាំពិក ប្រកបដោយមោទនភាពបំផុត និងដោយក្តីរីករាយគ្មានអ្វីប្រៀប។
នៅថ្ងៃបង្ហើយនេះ ដូចតាមទម្លាប់ មានការប្រកួតរត់ប្រណាំងបុរសចម្ងាយ៤២គីឡូម៉ែត្រ ជាកិច្ចចាប់ផ្តើម បន្ទាប់មកនឹងមានការប្រគល់ពានរង្វាន់មេដាយមាសទី ៣០៦ ដល់កីឡាករបាល់បោះ ដែលគ្មាននរណាក្រៅពីកីឡាករអាមេរិកនោះឡើយ។ អាមេរិកបានទទួលមេដាយច្រើនជាងគេ ទីពីរគឺអង់គ្លេស ឯចិនស្ថិតនៅចំណាត់ថ្នាក់ត្រឹមលេខបី ពោលគឺជាលទ្ធផលដ៏អាក្រក់បំផុត ដែលចិនមិនជួបប្រទះឡើយក្នុងការប្រកួតកីឡាអូឡាំពិក។
ភ្លើងទៀនអូឡាំពិកនឹងត្រូវបានពន្លត់ នៅទីក្រុងរីយ៉ូ ! ទង់ជាតិអូឡាំពិក នឹងត្រូវបានប្រគល់ទៅឱ្យតូក្យូ ប្រទេសអ្នករៀបចំការប្រកួតកីឡាអូឡាំពិកនៅឆ្នាំ២០២០ នៅយប់ថ្ងៃអាទិត្យទី ២១ សីហា អមដោយបទភ្លេង និងការបាញ់កាំជ្រួច បិទបញ្ចប់កម្មវិធី ដោយមិនភ្លេចទេការហែក្បួនលារបស់ក្រុមកីឡាករអូឡាំពិកមកពីគ្រប់ប្រទេស ប៉ុន្តែមិនសូវមានលំដាប់លំដោយដូចការបើកកម្មវិធីទេ។
នៅលើវេទិកាកិត្តិយស មានប្រមុខរដ្ឋ-រដ្ឋាភិបាលតែ៧រូបបានបង្ហាញវត្តមាន ក្បែរលោកនាយករដ្ឋមន្ត្រីជប៉ុន។ អវត្តមាន គួរឱ្យកត់សម្គាល់បំផុត គឺម្ចាស់ផ្ទះ ! ប្រធានាធិបតីស្តីទីប្រេស៊ីលដែលត្រូវហ្វូងមហាជនស្រែកឱ្យកាលបើកកម្មវិធីគ្មានមុខទេ។ សមាជិកគណៈកម្មការអូឡាំពិកម្នាក់ ក៏គ្មានវត្តមានដែរ ព្រោះត្រូវប៉ូលិសចាប់ឃុំឃាំង ក្នុងពន្ធនាគារកាលពីបីថ្ងៃមុន ពីបទជាប់សង្ស័យក្នុងបណ្តាញលក់សំបុត្រខុសច្បាប់ដែលធ្វើខាតប្រាក់អស់យ៉ាងតិច២,៨លានអឺរ៉ូ។ នេះបើតាមប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ