សក្ខីកម្មស្ត្រីកូឡុំប៊ី ជនរងគ្រោះពីទង្វើពួកឧទ្ទាម តែចង់បានកិច្ចព្រមព្រៀងសន្តិភាព
ក្រោយប្រជាមតិ ច្រានចោលកិច្ចព្រមព្រៀងសន្តិភាពជាមួយពួកឧទ្ទាមហ្វាក គណៈកម្មការចរចាជាតិ ដែលមានបក្សប្រឆាំងចូលរួមដែរ នឹងត្រូវបង្កើតឡើង ដើម្បីសាកល្បងស្វែងរកដំណោះស្រាយ ទម្លាយភាពទ័លច្រកនយោបាយ។ អ្នកខ្លះសង្ឃឹមថា ភាពខុសគ្នា និងការខ្វែងគំនិតនយោបាយ នឹងមិនសើរើលទ្ធផលនៃខិតខំប្រឹងប្រែងរហូតបានក្លាយជាកិច្ចព្រមព្រៀង បិទបញ្ចប់ជម្លោះប្រដាប់អាវុធឡើយ។ មានកូនប្រុសម្នាក់ស្លាប់ ក្នុងភេរវកម្មរបស់ពួកឧទ្ទាមហ្វាក ហើយកូនប្រុសម្នាក់ទៀត ត្រូវរងរបួសមានភាពពិការជាប់ខ្លួនរហូតមកទល់នឹងពេលបច្ចុប្បន្នមែន តែម៉ាថា លុហ្ស អារ៉ូម៉ូហ្សូ បានបោះឆ្នោតគាំទ្រ ប្រជាមតិកាលពីថ្ងៃអាទិត្យ ទាំងការឈឺចុកចាប់ផ្ទាល់ខ្លួនមិនអាចរសាយបាន។ អ្នកស្រីសង្ឃឹមថា ភាគីបក្សដិបក្ខនឹងចាប់ផ្តើមចរចាគ្នាឡើយវិញ។
ចុះផ្សាយនៅថ្ងៃ៖
ស្តាប់ - ០១:២៥
“កាលពីឆ្នាំ២០០៣ កូនប្រុសខ្ញុំ អាឡេហាដ្រូ អាយុ២០ឆ្នាំ បានមកដល់ទីនេះ ចំពេលមានភេរវកម្មបំផ្ទុះគ្រាប់បែក និងបានស្លាប់ភ្លាមមួយរំពេច នៅនឹងកន្លែង។ ចំណែកហ័នកាឡូសកូនប្រុសខ្ញុំម្នាក់ទៀត ដែលកំពុងអង្គុយរង់ចាំបងក្នុងហាងកាហ្វេ បានរងរបួសជាទម្ងន់ ដោយសារធ្នឹមធ្លាក់បាក់រលំសង្កត់ ឱ្យសន្លប់ធំបាត់ស្មារតីរយៈពេល១៣ថ្ងៃ។ ហេតុការណ៍បានកើតឡើងកាលពី១៤ឆ្នាំមុន ! ប៉ុន្តែទោះបីជាយ៉ាងដូច្នេះក្តី ក៏ខ្ញុំគិតថាឱកាសនៃការប្តូរផ្លាស់បានមកដល់ ត្រូវឆក់ឱ្យបានដើម្បីកុំឱ្យហេតុការណ៍អាក្រក់នេះកើតឡើងបានទៀត។
សម្រាប់ជនរងគ្រោះសំណងដ៏ថ្លៃថ្លាមានមួយគត់ គឺសូមកុំរឿងអាក្រក់នោះកើតឡើងជាថ្មី ! គេមិនអាចសងកូនយើងមកវិញបានទេ ! យើងមានអារម្មណ៍ក្រៀមក្រំបំផុត នៅពេលបានឃើញការគាំទ្រកិច្ចព្រមព្រៀងសន្តិភាព ជាអ្នកចាញ់ក្នុងប្រជាមតិ។ ប៉ុន្តែអ្វីដែលលំបាក មិនមែនស្ថិតត្រង់ ថាអ្នកគាំទ្រចាញ់ អ្នកប្រឆាំងឈ្នះនោះទេ។ សម្រាប់ខ្ញុំ អ្វីដែលឈឺចាប់ខ្លាំងបំផុតនោះ គឺហេតុអ្វីបានពលរដ្ឋកូឡុំប៊ីដល់ទៅជាង៦០% អវត្តមានមិនទៅបោះឆ្នោត ប្រជាមតិ នេះ ?! ថ្វីបើយើងមិនដឹងនឹងមានអ្វីកើតឡើងឱ្យប្រាកដនៅពេលខាងមុខ ប៉ុន្តែនេះឱកាសហុចឱ្យហើយ ! ហើយពេលនេះជនរងគ្រោះ ក៏អាចចូលរួមចំណែកស្ថាបនាប្រទេសឡើងវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ