កូឡុំប៊ីធ្វើប្រជាមតិដើម្បីអនុម័តកិច្ចព្រមព្រៀងសន្តិភាពជាមួយពួកឧទ្ទាមFarc
តើមានប្រទេសណា ដែលរៀបចំបោះឆ្នោតប្រជាមតិសួរយោបល់ប្រជាពលរដ្ឋ ថាចង់រស់ដោយសន្តិភាពឬអត់ ?! មាន ! គឺ កូឡុំប៊ី ! នៅថ្ងៃអាទិត្យនេះ ពលរដ្ឋកូឡុំប៊ីជាង ៣០លាននាក់ត្រូវចូលរួមបោះឆ្នោតប្រជាមតិ ព្រមទទួលយក កិច្ចព្រមព្រៀងសន្តិភាពជាប្រវត្តិសាស្ត្រ ដែលរដ្ឋាភិបាល បានចុះហត្ថលេខាកាលពីថ្ងៃទី ២៦ កញ្ញា ជាមួយនឹងពួកឧទ្ទាមប្រដាប់អាវុធបដិវត្តន៍កូឡុំប៊ី ឬហៅកាត់ថា Farc ឬក៏អត់។ ប្រជាមតិ នេះជាដំណាក់កាលដ៏សំខាន់ចុងក្រោយ នៃការបិទបញ្ចប់សង្គ្រាមបង្ហូរឈាមជាងកន្លះសតវត្សរ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ពលរដ្ឋកូឡុំប៊ី ត្រូវបញ្ចេញមតិ ថា ព្រម ឬមិនព្រម នឹងកិច្ចព្រមព្រៀង ដែលប្រធានាធិបតីកូឡុំប៊ី លោក សិនតូស និងមេក្រុមឧទ្ទាមFarc លោក ឡុងដូណូ ហៅ ទីម៉ូឆេនកូ បានចុះហត្ថលេខា កាលពីថ្ងៃចន្ទមុន។ ជាកិច្ចព្រមព្រៀងសន្តិភាព បិទបញ្ចប់ជម្លោះប្រដាប់អាវុធ និងស្ថាបនាប្រទេសឡើងវិញ ឱ្យមានស្ថិរភាពយូរអង្វែងនិងជានិរន្ត បន្ទាប់ពីឆ្លងកាត់ការចរចាអស់រយៈពេលជាងបួនឆ្នាំ និងមានគុយបាជាអន្តរការី។
ពលរដ្ឋកូឡុំប៊ីគ្រប់រូបសុទ្ធតែយល់ ការបោះឆ្នោតថ្ងៃនេះ ជាការបញ្ចេញសំឡេងដ៏សំខាន់បំផុត ក្នុងចំណោមការបោះឆ្នោតនារយៈពេល២៥ឆ្នាំចុងក្រោយនេះ។ តាមការស្ទង់មតិ មួយថ្ងៃក្រោយការចុះហត្ថលេខាភ្លាម ខាង “ព្រម” មានចំនួនប្រមាណពី ៥៥ ទៅ៦៦% ប៉ុន្តែដើម្បីឱ្យកិច្ចព្រមព្រៀងអាចមានសុពលភាពបាន លុះណាតែសំឡេងគាំទ្រ ឡើងបានដល់ទៅ ១៣% នៃចំនួនពលរដ្ឋកូឡុំប៊ី ៣៣លាននាក់មានឈ្មោះក្នុងបញ្ជីបោះឆ្នោត។ ហើយសូមកុំភ្លេចថា នៅកូឡុំប៊ី អត្រាអ្នកអវត្តមានមិនចូលរួមបោះឆ្នោត មានដល់ទៅជាង៥០%។
លោកស្រី អ៊ីងគ្រីត បេតង់គួ អតីតបេក្ខជនប្រធានាធិបតីកូឡុំប៊ី ដែលធ្លាប់ជាប់ជាចំណាប់ខ្មាំងរបស់ពួកFarc អស់រយៈពេល ៦ឆ្នាំ ក៏ត្រៀមនឹងបោះឆ្នោតទទួលយកកិច្ចព្រមព្រៀងសន្តិភាពដែរ បើទោះបីជាលោកស្រីពិបាកនឹងអត់ទោសឱ្យពួកគេក៏ដោយ។
អតីតប្រធានាធិបតីកូឡុំប៊ី អ៊ុយរីបេ ដែលស្ថិតនៅក្នុងបក្សប្រឆាំង បានធ្វើយុទ្ធនាការ “មិនព្រម” ទទួលយកកិច្ចព្រមព្រៀងនេះ ដោយយល់ថា ពួកឧទ្ទាមគួរត្រូវតែឆ្លងកាត់តុលាការ ចំពោះទង្វើឧក្រិដ្ឋកន្លងមក និងមិនគួរមានសិទ្ធិនៅក្នុងសភាឡើយ។ បើតាមកិច្ចព្រមព្រៀង ចលនាឧទ្ទាមFarc គ្រោងនឹងប្តូរលក្ខខន្តិកៈទៅជាបក្សនយោបាយមួយ អាចចូលប្រកួតប្រជែងតាមរយៈសន្លឹកឆ្នោត ក្នុងការបោះឆ្នោតប្រធានាធិបតី និងសភា នៅឆ្នាំ២០១៨ ព្រមទាំងធានាបានថាមានអាសនៈ១០ នៅក្នុងសភា ដោយមិនឆ្លងកាត់ការបោះឆ្នោតរហូតល់ឆ្នាំ ២០២៦។ ការិយាល័យបោះឆ្នោតនឹងត្រូវបិទនៅម៉ោង៤រសៀល ម៉ោងនៅកូឡុំប៊ី ហើយលទ្ធផលនឹងបានដឹងនៅពេលយប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ