កូឡុំប៊ី៖លោកប្រធានាធិបតីសម្រេចបន្តបទឈប់បាញ់រហូតដល់ដំណាច់ឆ្នាំ ២០១៦
នៅក្នុងប្រទេសកូឡុំប៊ី លោកប្រធានាធិបតីសង់តូសបានប្រកាសឲ្យដឹងពីការបន្តបទឈប់បាញ់ដែលត្រូវអស់សុពលភាពនៅដំណាច់ខែតុលានេះរហូតដល់ថ្ងៃទី៣១ ធ្នូចុងឆ្នាំ ២០១៦។ លោកសង់តូសបានពន្យល់ថា លោកចង់បន្តព្យាយាមរកកិច្ចសម្របសម្រួលមួយជាមួយបក្សប្រឆាំងក្នុងការដាក់ឲ្យអនុវត្តន៍ជាផ្លូវការនូវកិច្ចព្រមព្រៀងសន្តិភាពដែលលោកបានចុះហត្ថលេខាជាមួយចលនាឧទ្ទាម FARC។ តែលោកសង់តូសបានបញ្ជាក់ច្បាស់ៗថា ជម្រើសថ្ងៃទី៣១ ធ្នូមិនមែនជាការដាក់ឱសានវាទ ឬមួយថ្ងៃដាក់កំហិតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
« ខ្ញុំបានសម្រេចចិត្តបន្តកិច្ចព្រមឈប់បាញ់ទ្វេភាគីរហូតដល់ថ្ងៃទី៣១ ធ្នូ។ ខ្ញុំចង់បញ្ជាក់ឲ្យទាំងអស់គ្នាយល់ច្បាស់ថា នេះមិនជាការដាក់ឱសានវាទ ឬមួយជាការកំណត់ថ្ងៃខែទេ តែខ្ញុំសង្ឃឹមថា នីតិវិធីស្វែងរកដំណោះស្រាយមួយជាមួយបក្សប្រឆាំងក្នុងការដាក់ឲ្យអនុវត្តន៍នូវកិច្ចព្រមព្រៀងសន្តិភាពដែលចុះហត្ថលេខាជាមួយចលនាឧទ្ទាម FARCនឹងរកបាននៅមុនថ្ងៃទី៣១ ធ្នូ។ ដូចដែលនិស្សិតម្នាក់បាននិយាយនៅថ្ងៃនេះថា គេត្រូវតែស្វះស្វែងរកសន្តិភាពដើម្បីជួយមនុស្សឲ្យផុតពីសេចក្តីស្លាប់ ព្រោះពេលវេលាមិនបានរង់ចាំយើងទេ។
ជនរួមជាតិជាទីមេត្រី យើងនឹងសម្រេចបាន យើងនឹងទទួលបានសន្តិភាព។ យើងនឹងទទួលបានជោគជ័យក្នុងការបញ្ចប់អំពើហិង្សាជាស្ថាពរ និងទទួលបានជោគជ័យក្នុងការរៀបចំដំណើរវិលចូលស្រុកកំណើតវិញរបស់ពលរដ្ឋដែលបានភៀសខ្លួនគេចពីតំបន់ជម្លោះ។ ដូចដែលទាំងអស់គ្នាបានទទួលស្គាល់រួចហើយថា នៅពេលដែលប្រទេសមានសុខសន្តិភាព ពលរដ្ឋកូឡុំប៊ីគ្រប់រូបស្គាល់ភាពសុខសាន្ត ភាពចម្រុងចម្រើន ការអភិវឌ្ឍ និងមានការងារធ្វើ។
យើងពិតជាមិនអាចទុកឲ្យឱកាសដ៏ប្រពៃមួយនេះកន្លងផុតទៅបានទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ