ហ្វីដែលកាស្រ្តូស្លាប់ បារាំងស្នើឱ្យលើកទណ្ឌកម្មទាំងស្រុងចេញពីគុយបា
ក្រោយសេចក្តីប្រកាសមរណភាពរបស់លោក ហ្វីដែល កាស្ត្រូ ពិភពលោកបានផ្តើមបញ្ចេញប្រតិកម្មជាបន្តបន្ទាប់។ តាំងពីថ្នាក់នយោបាយកំពូលដល់ប្រជាពលរដ្ឋសាមញ្ញ។ មេដឹកនាំរុស្ស៊ី ចិន សុទ្ធតែបានលើកសរសើរអំពីវីរភាពរបស់លោក ហ្វីដែល កាស្ត្រូ។ លោកអូបាម៉ា បានសម្តែងសាមគ្គីភាពជាមួយប្រជាពលរដ្ឋគុយបា និងសូមឱ្យប្រវត្តិសាស្ត្រជាវាយតម្លៃអំពីទង្វើរបស់លោកហ្វីដែល កាស្ត្រូ។ ឯចំណែកលោក ហ្វ្រង់ស័រ ហូឡង់ ប្រធានាធិបតីបារាំងវិញយល់ថា ដល់វេលាដែលត្រូវលើកទណ្ឌកម្មសេដ្ឋកិច្ចពីគុយបាហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
“ឈ្មោះសមមិត្ត ហ្វីដែលកាស្ត្រូ នឹងនៅជាអមតៈ” នេះជាប្រសាសន៍របស់លោក ប្រធានធិបតីចិន ស៊ីជិនពីង តាមកញ្ចក់ទូរទស្សន៍ នៅពេលបានទទួលដំណឹងមរណភាពរបស់លោកហ្វីដែល កាស្ត្រូភ្លាម។ លោក វ្លាដេមៀ ពូទីន ប្រធានាធិបតីរុស្ស៊ី បានប្រកាសថា លោកហ្វីដែល កាស្ត្រូ គួរតែជានិម្មិត្តរូបនៃប្រវត្តិសាស្ត្រពិភពលោកសម័យថ្មី និងបានចាត់ទុកលោក ហ្វីដែល កាស្ត្រូ ជាមិត្តដ៏ស្មោះត្រង់និងគ្មានងាករេរបស់រុស្ស៊ី។
ប្រមុខដឹកនាំរដ្ឋ និងរដ្ឋាភិបាលជាច្រើន សុទ្ធតែបានចាត់ទុកមរណភាពរបស់លោក ហ្វីដែល កាស្ត្រូ ថាជាការបាត់បង់ឥស្សរជនម្នាក់ ដែលបានបម្រើជាតិមាតុភូមិ និងពលរដ្ឋ។ ហ្វីដែល កាស្ត្រូ បានផ្តល់ក្តីសង្ឃឹម និងការអស់សង្ឃឹម ដល់ពលរដ្ឋក្នុងការធ្វើបដិវត្ត និងការអនុវត្ត។ នេះជាប្រសាសន៍លោកប្រធានាធិបតីបារាំង ហ្វ្រង់ស័រ ហូឡង់ ដែលបន្ថែមទៀតថា លោកហ្វីដែលកាស្ត្រូ ជាតួអង្គមួយក្នុងសង្គ្រាមត្រជាក់ តែក៏ជាតំណាងមោទនភាពរបស់គុយបា ដែលមិនបណ្តោយឱ្យមានការគ្របដណ្តប់មកពីខាងក្រៅ។
ឆ្លៀតក្នុងឱកាសនេះដែរ លោកប្រធានាធិបតីបារាំង ក៏បានអំពាវនាវ ឱ្យមានការលើកទណ្ឌកម្មទាំងស្រុងចេញពីគុយបា។ លោក ហ្វីដែល កាស្ត្រូ បានលាចាកលោកហើយ គេគួរតែលើកទណ្ឌកម្មចេញ ដើម្បីឱ្យប្រជាពលរដ្ឋគុយបា បានក្លាយជាចំណែកមួយនៃសហគមន៍អន្តរជាតិ។ សម្រាប់លោកប្រធានាធិបតីបារាំង ទណ្ឌកម្ម គឺជាសេចក្តីជាឯកតោភាគី ដែលមិនអាចទទួលយកបានឡើយ។
សូមបញ្ជាក់ថា កាលពីឆ្នាំ២០១៥ នាឱកាសបំពេញទស្សនកិច្ចនៅគុយបា ប្រធានាធិបតីបារាំង លោក ហ្វ្រង់ស័រ ហូឡង់ បានក្លាយជាប្រមុខរដ្ឋបស្ចឹមប្រទេសដំបូងគេ ដែលបានទទួលជួបលោក ហ្វីដែល កាស្ត្រូ រយៈពេលជិតមួយម៉ោងនៅទីក្រុងឡាហាវ៉ាន និងក៏ធ្លាប់បានអំពាវនាវឱ្យលើកទណ្ឌកម្មអាមេរិកចេញពីគុយបាដែរ។
ដោយឡែក ប្រតិកម្មរីករាយបានផ្ទុះឡើងនៅសហរដ្ឋអាមេរិក។ ពលរដ្ឋអាមេរិកដើមកំណើតគុយបា ដែលបានរងទុក្ខពីរបបកាស្ត្រូ និងបង្ខំនិរទេសខ្លួនចេញពីប្រទេសកំណើត បានសម្តែងការអបអរ នាំគ្នាស្រែកជ័យឃោស « គុយបាមានសេរីភាព” ជយោសេរីភាព។ ការប្រមូលផ្តុំតាមដងផ្លូវ នាក្រុងមីអាមី បានផុសឡើងដោយគ្មានណាត់ គ្រាន់តែបានឮដំណឹងមរណភាពរបស់ហ្វីដែល កាស្ត្រូភ្លាម។ មានជនជាតិគុយបាប្រមាណជាងពីរលាននាក់ រស់នៅអាមេរិក ៧០%រស់នៅក្នុងរដ្ឋផ្លរីដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ