ព្រះរាជបុត្រស្នងរាជ្យអារ៉ាប៊ីសាអូឌីតយាងទៅបំពេញទស្សនកិច្ចនៅសហរដ្ឋអាមេរិក
ព្រះរាជបុត្រស្នងរាជ្យនៃរាជាណាចក្រអារ៉ាប៊ីសាអួឌីត ព្រះអង្គម្ចាស់ Mohammed ben Salmane នៅថ្ងៃចន្ទនេះបានយាងចាកចេញពីប្រទេសដើម្បីឆ្ពោះទៅកាន់សហរដ្ឋអាមេរិក។ នៅទីនោះព្រះអង្គម្ចាស់ Mohammed ben Salmane នឹងត្រូវជួបប្រាស្រ័យជាមួយលោក Donald Trump នៅក្នុង”ទស្សនកិច្ចការងារមួយ” ដែលនឹងត្រូវចាប់ផ្តើមនៅថ្ងៃព្រហស្បតិ៍ខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ព្រះរាជបុត្រស្នងរាជរបស់អារ៉ាប៊ីសាអូឌីត Mohammed ben Salmane ដែលមានព្រះជន្ម ៣១ព្រះវស្សា ក៏ជារដ្ឋមន្ត្រីក្រសួងការពារជាតិ ក៏ព្រមទាំង ជាអ្នកទទួលខុសត្រូវជាន់ខ្ពស់បំផុតមួយរូបរបស់អារ៉ាប៊ីសាអ៊ូឌីតដែលនឹងត្រូវជួបពិភាក្សាជាមួយលោក Donald Trump ចាប់តាំងពីលោក Trump បានចូលកាន់មុខតំណែងប្រធានាធិបតីបន្តពីលោក Barack Obama តាំងពីខែមករាមក។
យោងតាមប្រភពព័ត៌មានផ្លូវការអារ៉ាប៊ីសាអូឌីត SPA ព្រះអង្គម្ចាស់ Mohammed ben Salmane នឹងត្រូវជួបពិភាក្សាជាមួយលោក Trump នៅថ្ងៃព្រហស្បតិ៍ខាងមុខនិងក្រុមអ្នកទទួលខុសត្រូវអាមេរិកជាច្រើនរូបទៀត ដើម្បីពិភាក្សាគ្នានៅលើបញ្ហារឹតចំណងទំនាក់ទំនងទ្វេភាគីរវាងប្រទេសទាំងពីរនិងបញ្ហាផលប្រយោជន៍រួមនៅក្នុងតំបន់។
គួរបញ្ជាក់ថាតាមលំដាប់ថ្នាក់ ព្រះអង្គម្ចាស់ Mohammed ben Salmane គឺ ជាបុត្រស្នងរាជទីពីរនិងក៏ជាអ្នកកំណែទម្រង់ដ៏ល្បីល្បាញមួយរូបនៃរាជាណាចក្រអារ៉ាប៊ីសាអូឌីត។
ដោយហេតុថា ព្រះអង្គម្ចាស់រូបនេះ បានតាក់តែងឡើងកំណែទម្រង់នយោបាយសេដ្ឋកិច្ចថ្មីដ៏ធំធេងមួយក្រោមឈ្មោះថា”ទស្សនវិស័យឆ្នាំ២០៣០” ក្នុងគោលដៅដើម្បីគិតគូររិះរកប្រាក់ចំណូលតាមវិធីថ្មីៗផ្សេងទៀតនិងក៏ដើម្បីកាត់បន្ថយការពឹងផ្អែករបស់ខ្លួនតែនៅលើប្រេង។ប្រេង អារ៉ាប៊ីសាអូឌីត ដែលកន្លងមក បានធ្លាក់ចុះថ្លៃយ៉ាងខ្លាំងនិងជម្រុញឲ្យប្រទេសនេះ ជួបនឹងវិបត្តិឧនភាពថវិការរហូតដល់ការអនុម័តការរឹតបន្តឹងថវិកា។
នៅលើទំនាក់ទំនងរវាងអារ៉ាប៊ីសាអូឌីតនិងហរដ្ឋអាមេរិកដែលជាសម្ព័ន្ធមិត្តតាំងតែពីជាង៧ទស្សវត្សរ៍មកហើយ មានលក្ខណៈកាន់តែយ៉ាប់យឺនខ្លាំនៅក្រោមរដ្ឋបាលរបស់លោកអូបាម៉ាជាអាទិ៍នៅលើសំណុំរឿងស៊ីរី ដែលទីក្រុងវ៉ាស៊ីនតោន បានបដិសេធពុំចូលរួមអន្តរាគមយោធានៅក្នុងទ្រង់ទ្រាយធំ។
ទោះជាយ៉ាងនេះក្តី រដ្ឋមន្ត្រីការបរទេសអារ៉ាប៊ីសាអ៊ូឌីត បានថ្លែងថា លោកមានទំនុកទុកចិត្តច្រើននៅលើរដ្ឋបាលរបស់លោក Donald Trump នៅក្នុងការចូលរួមបានច្រើនជាងមុននៅក្នុងតំបន់ជាពិសេសដើម្បីទប់បង្ក្រាបប្រទេសអ៊ីរ៉ង់។ ពីព្រោះអារ៉ាប៊ីសាអូឌីត តែងតែចោទថា អ៊ីរ៉ង់ បានលូកដៃចូលជ្រៀតជ្រែតនៅក្នុងកិច្ចការផ្ទៃក្នុងរបស់បណ្តាប្រទេសអារ៉ាប ដូចជានៅប្រទេសយេមែនជាដើមដោយតេអេរ៉ង់ បានគាំទ្រពួកឧទ្ទាម Houthis និកាយ Chiites នៅក្នុងការប្រឆាំងទល់នឹងរដ្ឋាភិបាលយេមែនស្របច្បាប់ដែលសហគមន៍អន្តរជាតិទទួលស្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ