បច្ចេកវិទ្យា-សហរដ្ឋអាមេរិក

នៅពេលសេវាដឹកជញ្ជូនម្ហូបអាហារធ្វើឡើងដោយមនុស្សយន្ត

តើអ្នកណាខ្លះដែលចង់ភ្លក់ម្ហូបអាហារ ដឹកជញ្ជូនដល់ផ្ទះដោយមនុស្សយន្ត? ទីក្រុងបច្ចេកវិទ្យា សាន់ ហ្វ្រាន់ស៊ីស្កូ បានក្លាយជាទីក្រុងទី១ ក្នុងលោក ដែលបានចាប់សាកល្បងប្រើប្រាស់មនុស្សយន្តសម្រាប់បម្រើសេវាដឹកជញ្ជូនអាហារដល់ផ្ទះ។ នៅថ្ងៃពុធម្សិលមិញ ក្រុមហ៊ុនអាមេរិកាំង Marble បានសហការចាប់ដៃ ជាមួយ ក្រុមហ៊ុនបញ្ជាទិញម្ហូបតាមអ៊ីនធ័រនែត(Yelp Eat24) ដើម្បីប្រើមនុស្សយន្តឲ្យដឹកម្ហូបដល់ផ្ទះរបស់អតិថិជន។

ចុះផ្សាយនៅថ្ងៃ៖ 12/04/2017 - 17:15កែប្រែថ្ងៃទី៖ 13/10/2017 - 10:57

ចាប់ពីថ្ងៃទី ១២មេសា ទីក្រុងសាន់ ហ្វ្រាន់ស៊ីស្កូ មានមនុស្សយន្តសម្រាប់ដឹកអាហារដល់ផ្ទះ ©Glenn CHAPMAN / AFP

ដោយ៖ ឈាង បុប្ផា

ផ្សាយពាណិជ្ជកម្ម

ក្រុមហ៊ុនអាមេរិកាំង Marble នៅថ្ងៃពុធម្សិលមិញ បានចាប់ផ្តើមប្រើមនុស្សយន្ត ឲ្យដឹកជញ្ជូនម្ហូបពីភោជនីយដ្ឋាន ទៅដល់ផ្ទះអតិថិជន នៅក្នុងសង្កាត់តូចមួយ ក្នុងទីក្រុងសាន់ ហ្វ្រាន់ស៊ីស្កូ។ “ដោយប្រើកម្មវិធីYelp Eat24 ដើម្បីបញ្ជារ ទិញម្ហូបស្រាប់ ពីភោជនីយដ្ឋាន អតិថិជននឹងទទួលបានសារមួយដែលសួរថា តើអ្នកចង់ឲ្យមនុស្សយន្តដឹកជញ្ជូនម្ហូបអ្នកដល់ផ្ទះដែរឬទេ?” នេះបើតាមការរៀបរាប់របស់លោកMatthew Delaney ប្រធាន និងស្ថាបនិក ក្រុមហ៊ុនMarble។

ដើម្បីផលិតមនុស្សយន្ត ដឹកជញ្ជូនម្ហូប ដល់ផ្ទះ ក្រុមហ៊ុនMarble បានប្រើបច្ចេកវិទ្យាដូចគ្នានឹងរថយន្តស្វ័យប្រវត្តិ។ វាមានបំពាក់ដោយ ប្រាជ្ញាសិប្បនិម្មិត Intelligence artificielle កាម៉េរ៉ា មានផែនទី សម្រាប់សំគាល់ផ្លូវ សំគាល់សង្កាត់ និងអាចធ្វើដំណើរលើចិញ្ចើមថ្នល់ ក្នុងល្បឿនរបស់មនុស្សដើរ។ មនុស្សយន្តអាចធ្វើដំណើរតែម្នាក់ឯង ក្រោមការត្រួតពិនិត្យពីចំងាយ ពីទីស្នាក់ការកណ្តាលរបស់ក្រុមMarble ដែលអាចអន្តរាគមន៍នៅពេលមនុស្សយន្ត ជួបមានបញ្ហា។

មនុស្សយន្តរបស់Marble អាចផ្ទុកដឹកម្ហូបបានបួនចំណែក។ ទៅដល់មុខទ្វារផ្ទះ អតិថិជនបានទទួលសារ ដែលមានលេខកូដ សម្រាប់ដោះសោរ បើកយកអាហារដែលខ្លួនទិញបញ្ជារទិញពីភោជនីយដ្ឋាន។ Shalin Sheth ប្រធានសេវាដឹកជញ្ជូនម្ហូប របស់កម្មវិធីYelp Eat 24ដែលបានសហការប្រើមនុស្សរបស់ក្រុមហ៊ុន Marble បាននិយាយថា ក្រុមហ៊ុនបន្តស្វែងរកយុទ្ធសាស្រ្ត ដើម្បីធានាសេវាប្រកបដោយប្រសិទ្ធិភាពផង និងដែលមាតម្លៃសមរម្យផង។ សម្រាប់ប្រធានក្រុមហ៊ុន Marble ទិសដៅរបស់ក្រុមហ៊ុន ទៅអនាគតគឺកាត់បន្ថយកម្រៃក្នុងការដឹកជញ្ជូន និងធ្វើយ៉ាងណាឲ្យមនុស្សយន្តប្រភេទនេះត្រូវបានគេប្រើច្រើន នៅក្នុងពិភពលោក។ ក្រៅតែពីច្នៃ បង្កើតមនុស្សយន្តឲ្យទៅជំនួសមនុស្ស ដែលធ្វើការដឹកជញ្ជូនម្ហូបដល់ផ្ទះ ហើយ ក្រុមហ៊ុន Marbleនៅមានគម្រោងផងដែរ ទៅថ្ងៃអនាគត ផលិតមនុស្សយន្ត ដែលអាចដឹកជញ្ជូន ឥវ៉ាន់ និងទំនិញតាមហាង ដែលគេបញ្ជារទិញតាមអ៊ីនធ័រនែត៕