កូនប្រសាររបស់លោកដូណាល់ ត្រាំ ស្ថិតក្នុងរ៉ាដាស៊ើបអង្កេតរបស់ប៉ូលិសFBI
ការស៊ើបអង្កេតទៅលើការលូកដៃរបស់រុស្ស៊ី នៅក្នុងការបោះឆ្នោតអាមេរិកបានរាលដាលទៅដល់កូនប្រសាររបស់លោកដូណាល់ ត្រាំ។ តាមប្រព័ន្ធផ្សព្វផ្សាយអាមេរិកាំង ប៉ូលិសសហព័ន្ធFBI កំពុងតម្រង់ទិសទៅស៊ើបអង្កេតលោកJared Kushner កូនប្រសារ និងជាទីប្រឹក្សាជាន់ខ្ពស់របស់លោកដូណាល់ ត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
លោក Jared Kushner កំពុងអមដំណើរឪពុកក្មេក គឺលោកប្រធានាធិបតីដូណាល់ ត្រាំ នៅក្នុងដំណើរទស្សនកិច្ចក្រៅប្រទេស។ នៅថ្ងៃនេះ លោកត្រូវចូលរួមជាមួយលោកដូណាល់ ត្រាំ ក្នុងកិច្ចប្រជុំកំពូលប្រទេសមហាឧស្សាហកម្ម G៧ នៅទីក្រុងស៊ីស៊ីល ប្រទេសអ៊ីតាលី។ ប៉ុន្តែ នៅក្នុងស្រុកវិញ នៅសហរដ្ឋអាមេរិក ឈ្មោះរបស់ Jared Kushner ដែលជាកូនប្រសារ និងជាទីប្រឹក្សាជាន់ខ្ពស់របស់ប្រធានាធិបតី ដូណាល់ ត្រាំ កំពុងក្លាយជាទីដៅស៊ើបអង្កេតរបស់ប៉ូលិសសហព័ន្ធ FBI។
តាមកាសែត The Washington Post ហើយនិងទូរទស្សន៍ NBC កូនប្រសារប្រុសរបស់លោកដូណាល់ ត្រាំ កំពុងស្ថិតនៅក្រោមការស៊ើបអង្កេតរបស់FBI ដោយសារលោកធ្លាប់មានទាក់ទងជាមួយមន្រ្តី និងអ្នកជំនួញរុស្ស៊ី។ តាមការចុះផ្សាយរបស់កាសែត នៅខែធ្នូ ឆ្នាំ ២០១៦ ពោលគឺនៅមួយខែលោកដូណាល់ ត្រាំ ឈ្នះឆ្នោតប្រធានាធិបតី លោក Jared Kushnerធ្លាប់បានជួបប្រាស្រ័យទាក់ទងជាមួយ ឯកអគ្គរដ្ឋទូតរុស្ស៊ីប្រចាំអាមេរិក ហើយនិងប្រធានធនាគាររដ្ឋរុស្ស៊ី Vnesh Econom Bank ដែលស្ថិតនៅក្នុងបញ្ជីដាក់ទណ្ឌកម្មរបស់រដ្ឋបាលលោកអូបាម៉ា។
សូមអាន៖តើរុស្ស៊ីអាចមានទំនាក់ទំនងជាមួយក្រុមលោកដូណាល់ ត្រាំ ដូចគេសង្ស័យដែរទេ?
រហូតមកដល់ពេលនេះ ទាំងប៉ូលិសFBI ហើយនិងសេតវិមានមិនទាន់បានចេញមុខធ្វើអត្ថាធិប្បាយលើព័ត៌មាននេះនៅឡើយទេ ប៉ុន្តែ មេធាវីម្នាក់របស់លោក Jared Kushnerបាននិយាយប្រាប់កាសែតThe Post ថា លោក Jared Kushnerនឹងសហការ ចូលខ្លួនទៅពន្យល់ នៅគណៈកម្មការសភា បើសិនមានការកោះហៅ។ តាមទូរទស្សន៍NBC ដែលបានដកស្រង់សំដីរបស់មន្រ្តីអាមេរិក (សុំមិនបញ្ចេញឈ្មោះ) ការស៊ើបអង្កេតទៅលើការជាប់ពាក់ព័ន្ធរវាងរុស្ស៊ី ហើយនិងក្រុមឃោសនាបោះឆ្នោតរបស់លោកដូណាល់ ត្រាំ ត្រូវបានពង្រីក រាលដាលដល់លោក Jared Kushnerមែន ប៉ុន្តែ មិនមែនមានន័យថា គេជាប់សង្ស័យលោក Jared Kushner ថាបានប្រព្រឹត្តបទឧក្រិដ្ឋនោះទេ។
សូមអាន៖អាមេរិក៖ហេតុអ្វីបានជាទីប្រឹក្សាសន្តិសុខជាតិរបស់លោកដូណាល់ ត្រាំបង្ខំចិត្តចុះចេញពីតំណែង?
ករណីរបស់ Jared Kushner គឺខុសពីលោកMichael Flynn អតីតទីប្រឹក្សាសន្តិសុខជាតិ និងលោកPaul Manafort ប្រធានយុទ្ធនាការឃោសនារបស់លោកដូណាល់ ត្រាំ ដែលទាំង២នាក់ ជាមុខសញ្ញាសំខាន់នៃការស៊ើបអង្កេតរបស់ប៉ូលិសFBI ហើយនិងគណៈកម្មការសភា។ ការស៊ើបអង្កេតទៅលើការលូកដៃ របស់រុស្ស៊ី ក្នុងការបោះឆ្នោតអាមេរិក និងជួយឲ្យលោកដូណាល់ ត្រាំឈ្នះឆ្នោតប្រធានាធិបតី បានចាប់រីកមុខកាន់តែធំ បន្ទាប់ពីលោកដូណាល់ ត្រាំ បានដកតំណែងយ៉ាងទាន់ហន់ ប្រធានប៉ូលិសFBI លោកJames Comey។ នៅសប្តាហ៍មុន លោកដូណាល់ ត្រាំបាននិយាយថា លោកជាជនរងគ្រោះនៃការតាមប្រមាញ់យាយធ្មប់ ក្នុងប្រវត្តិនយោបាយអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ