រដ្ឋមន្ត្រីក្រសួងយុត្តិធម៌ បដិសេធមិនឆ្លើយសំណួរជាច្រើនរបស់ព្រឹទ្ធសភាអាមេរិក
នៅក្នុងការឆ្លើយបំភ្លឺទៅកាន់គណៈកម្មការព្រឹទ្ធសភាអាមេរិក រយៈពេលជិតបីម៉ោង រដ្ឋមន្ត្រីក្រសួងយុត្តិធម៌អាមេរិក លោក Jeff Sessions បានអះអាងជាច្រើនលើកច្រើនសា អំពីភាពបរិសុទ្ធរបស់លោក និងបានបដិសេធ ដោយលើកដៃស្បថលើទ្រូងផងថា លោកគ្មានពាក់ព័ន្ធនឹងរុស្ស៊ីទេ។ ប៉ុន្តែទន្ទឹមគ្នានេះ លោក ក៏បានប្រើសិទ្ធិ មិនឆ្លើយតបទៅនឹងសំណួរជាច្រើនរបស់គណៈកម្មការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ភាពអាថកំបាំងក្នុងសំណុំរឿងអង្កេតរុស្ស៊ី មិនធ្លាយទេ ! សម្រាប់លោករដ្ឋមន្ត្រីក្រសួងយុត្តិធម៌ ការដកខ្លួនចេញសំណុំរឿងនេះ មិនមែនមានន័យថាលោកចង់សារភាពទោសឡើយ ! តែជាសាកល្បងធ្វើគ្រប់យ៉ាងដើម្បីបង្ហាញ និងផ្តល់ចម្លើយអំពីភាពបរិសុទ្ធរបស់លោក។
លោក Jeff Sessions បានបញ្ជាក់អំពីការព្រួយបារម្ភរបស់លោក ខមី James Comey ថាអតីតនាយកទីភ្នាក់ងារFBI ពិតជាមិនចង់ជួបតែម្នាក់ឯងមួយទល់នឹងមួយជាមួយប្រធានាធិបតីត្រាំមែន។ តែលោក ខមី ក៏មិនបានប្រាប់អ្វីលម្អិតមកលោកដែរ។
ចំពោះសំណួរទាក់ទងនឹងតួនាទីរបស់លោកក្នុងការទម្លាក់នាយកFBI លោករដ្ឋមន្ត្រីអេះអុញណាស់។ ជាច្រើនលើកច្រើនសា លោក បានបដិសេធមិនឆ្លើយ ដោយសំអាងថាជាកិច្ចសន្ទនាសម្ងាត់ជាមួយប្រធានាធិបតី។ លោក Jeff Sessions ក៏មិនព្រមឆ្លើយនឹងសំណួរជាច្រើនផ្សេងទៀត ក្រោមហេតុផលថាលោកភ្លេច លោកមិនចាំ។
ប៉ុន្តែលោក Jeff Sessions ប្រឹងការពារខ្លួនណាស់ ដោយបានសាកល្បងប្រើភាពសិ្នទ្ធស្នាលជាមួយក្រុមព្រឹទ្ធសផា ជាមួយនឹងពាក្យរំលឹកថា លោកជាមនុស្សក្នុងក្រុមតែមួយជាគ្នា « មិត្តអើយ ខ្ញុំមិនដែលជួប ឬមិនដែលបាននិយាយអ្វីសោះជាមួយជនជាតិរុស្ស៊ី ឬភ្នាក់ងារបរទេសណាម្នាក់ ក្នុងយុទ្ធនាការឃោសនាបោះឆ្នោតប្រធានាធិបតីអាមេរិក។ មិនដឹងថាមានកិច្ចសន្ទនាបែបនេះ ដោយនរណា ដែលជាក្រុមការងាររបស់លោកត្រាំទេ។ ខ្ញុំជាមិត្តរួមការងាររបស់អ្នក តាំងពី ២០ឆ្នាំហើយ។ ខ្ញុំបម្រើជាតិ មានកិត្តិយសលើកតម្កើងប្រជាធិបតេយ្យ ឱ្យអាមេរិក ៣៥ឆ្នាំមកហើយ រឿងអ្វីខ្ញុំត្រូវទៅពាក់ព័ន្ធ ជាមួយរុស្ស៊ីឱ្យមកជ្រៀតជ្រែតប្រទេសខ្ញុំ ! គឺជាពាក្យភូតភដ៏រន្ធត់និងគួរឱ្យស្អប់ខ្ពើម។ »
ជាសរុប ក្រោយការឆ្លើយបំភ្លឺបីម៉ោង សាធារណជន នៅតែគ្មានបានដឹងអ្វីថ្មី ទាក់ទងនឹងការអង្កេតដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ