អាមេរិក៖វិបត្តិថវិកា Shutdown បានបិទបញ្ចប់ តែការត ថ្លៃគ្នាកំពុងបន្តមាន
នៅសហរដ្ឋអាមេរិក ក្រុមសមាជិកព្រឹទ្ធសភាមកពីគណបក្សសាធារណរដ្ឋ និងគណបក្សប្រជាធិបតេយ្យបានបោះឆ្នោតលើច្បាប់ថវិកានាថ្ងៃចន្ទ ទី២២ មករាដើម្បីបិទបញ្ចប់វិបត្តិថវិកា Shutdown។ បន្ទាប់ពីព្រឹទ្ធសភា ច្បាប់ថវិកាដដែលក៏បានបោះឆ្នោតដោយក្រុមអ្នកតំណាងរាស្រ្តក្នុងថ្ងៃតែមួយដែរ។ សូមជម្រាបជូនថា វិបត្តិថវិកាបានកើតមានរយៈពេល ៣ថ្ងៃ ពោលតាំងពីថ្ងៃសៅរ៍ ទី២០ មករា និងបានធ្វើឲ្យសេវាមួយចំនួនរបស់រដ្ឋាភិបាលសហព័ន្ធផ្អាកដំណើរការ។ ទោះជាយ៉ាងនេះក្តី កញ្ចប់ថវិកាដែលបានព្រមព្រៀងនឹងអាចចាយវាយត្រឹមថ្ងៃទី៨ កុម្ភៈប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៩
គេត្រូវរង់ចាំដល់ទៅ ៣ថ្ងៃទើបក្រុមអ្នកសាធារណរដ្ឋ និងក្រុមអ្នកប្រជាធិបតេយ្យអាចនិយាយចុះសម្រុងគ្នាក្នុងការបិទបញ្ចប់ Shutdown បាន។ ការព្រមព្រៀងគ្នានេះមិនមែនកើតចេញពីការធ្វើសម្បទានឲ្យគ្នាទៅវិញ ទៅមកទេ តែកើតចេញពីការត ថ្លៃ ដោះដូរ និងការដាក់ឱសានវាទឲ្យគ្នាទៅវិញ ទៅមក។ Shutdown ដែលបានកើតមានក្នុងរយៈពេល ៣ថ្ងៃកន្លងទៅ ជាវិបត្តិថវិកាមួយដែលបានធ្វើឲ្យប៉ះពាល់ខ្លាំងដល់ស្ថាប័នរដ្ឋាភិបាលសហព័ន្ធ តែវិបត្តិមួយនេះក៏មានបង្កប់ដោយរឿងនយោបាយយ៉ាងជ្រៅដែរ។ គណបក្សប្រឆាំងមិនញញើតនឹងយកវិបត្តិមួយនេះធ្វើជានុយ ឬជាគំនាបនយោបាយ។
សូមជម្រាបជូនថា Shutdown នេះធ្លាប់បានកើតមាននៅក្នុងជំនាន់លោកប្រធានាធិបតីបារ៉ាក់ អូបាម៉ាក្នុងឆ្នាំ ២០១៣ និងដែលបានអូសបន្លាយដល់ទៅ ១៦ថ្ងៃ ពោលមិនមែន ៣ថ្ងៃដូចពេលនេះទេ។ Shutdown ក្នុងជំនាន់លោកប្រធានាធិបតីអាមេរិកដូណាល់ ត្រាំបានចូលជាធរមាននៅរំលងអធ្រាត្រថ្ងៃសុក្រ ទី១៩ មករា ពោល ៣ថ្ងៃមុនខួបគម្រប់ ១ឆ្នាំនៃការកាន់តំណែងរបស់លោកដូណាល់ ត្រាំ។ អ៊ីចឹងហើយបានជាមានការលើកឡើងថា Shutdown ជាកាដូសម្រាប់លោកដូណាល់ ត្រាំ។ គួររម្លឹកជូនបន្តិចថា គឺនៅព្រឹទ្ធសភាដែលច្បាប់ថវិកាបានជាប់គាំងដោយគ្មានសម្លេងគាំទ្រគ្រប់គ្រាន់។
ក្រុមសមាជិកព្រឹទ្ធសភានៃគណបក្សប្រឆាំង គឺគណបក្សប្រជាធិបតេយ្យបានយករឿងជនអន្តោប្រវេសន៍ Dreamers ធ្វើជានុយត ថ្លៃជាមួយក្រុមសមាជិកព្រឹទ្ធសភានៃគណបក្សសាធារណរដ្ឋរបស់លោកដូណាល់ ត្រាំ។ ក្រុមសមាជិកព្រឹទ្ធសភាបក្សប្រជាធិបតេយ្យចង់ឲ្យក្រុមសមាជិកព្រឹទ្ធសភាបក្សសាធារណរដ្ឋលើកយករឿងជនអន្តោប្រវេសន៍ Dreamers ទៅជជែក។ បន្ទាប់ពីត ថ្លៃគ្នាយ៉ាងតឹងសរសៃ ក អស់ ៣ថ្ងៃមក សមាជិកព្រឹទ្ធសភាបក្សសាធារណរដ្ឋក៏យល់ព្រម ហើយក្រុមសមាជិកព្រឹទ្ធសភាបក្សប្រជាធិបតេយ្យក៏សុខចិត្តបោះឆ្នោតលើកញ្ចប់ថវិកាថ្មីបញ្ចប់ Shutdown។ ក៏ប៉ុន្តែ កញ្ចប់ថវិកាមួយនេះអនុញ្ញាតឲ្យរដ្ឋាភិបាលសហព័ន្ធអាចចាយវាយដល់ត្រឹមថ្ងៃទី៨ កុម្ភៈប៉ុណ្ណោះ។
គណបក្សសាធារណរដ្ឋមានប្រៀបលើគណបក្សប្រជាធិបតេយ្យ
គ្មានអ្នកឈ្នះ និងគ្មានអ្នកចាញ់ តែគណបក្សសាធារណរដ្ឋរបស់លោកដូណាល់ ត្រាំហាក់មានប្រៀបលើគណបក្សប្រជាធិបតេយ្យ។ មានប្រៀបនៅត្រង់ថា ក្រុមសមាជិកព្រឹទ្ធសភាបក្សប្រជាធិបតេយ្យបានទទួលត្រឹមតែពាក្យសន្យាពីក្រុមសមាជិកព្រឹទ្ធសភាបក្សសាធារណរដ្ឋ។ ពាក្យសន្យាថានឹងលើកយកសំណុំរឿងជនអន្តោប្រវេសន៍ខុសច្បាប់ Dreamers ទៅជជែក។ តែសំណួរដែលចោទនោះនៅត្រង់ថា ចុះបើក្រុមសមាជិកព្រឹទ្ធសភាបក្សសាធារណរដ្ឋមិនគោរពពាក្យសន្យា ឬមួយក៏ជជែកដែរ តែមិនទទួលបានលទ្ធផលអ្វីជុំវិញរឿងជនអន្តោប្រវេសន៍ខុសច្បាប់ Dreamers ពីពេលនេះដល់ថ្ងៃទី៨ កុម្ភៈនោះទេ តើក្រុមសមាជិកព្រឹទ្ធសភាបក្សប្រជាធិបតេយ្យអាចនឹងធ្វើអ្វីបាន។
ចម្លើយ Shutdown នឹងកើតមានជាថ្មីនៅក្រោយថ្ងៃទី៨ កុម្ភៈ ព្រោះចូរកុំភ្លេចថា កញ្ចប់ថវិកាដែលទើបអនុម័តរួមគ្នាគ្រាន់ជាកញ្ចប់ថវិកាបណ្តោះអាសន្ន។ ទោះជាយ៉ាងនេះក្តី សេតវិមាន និងរូបលោកដូណាល់ ត្រាំបានបញ្ចេញប្រតិកម្មរីករាយ និងបានចាត់ទុកការបិទបញ្ចប់ Shutdown ពេលនេះជាជោគជ័យមួយចំពោះគណបក្សសាធារណរដ្ឋ។ ចាប់ពីថ្ងៃនេះដល់ថ្ងៃទី៨ កុម្ភៈ គឺមានរយៈពេល ១៧ថ្ងៃគត់ដែលគណបក្សសាធារណរដ្ឋ និងគណបក្សប្រជាធិបតេយ្យគ្មានជម្រើសអ្វីក្រៅពីប្រញាប់ចរចាគ្នាដើម្បីរកឲ្យបាននូវកិច្ចព្រមព្រៀងមួយស្តីពីជនអន្តោប្រវេសន៍ខុសច្បាប់ Dreamers ទាំងជិត ៧០០ ០០០នាក់។
Dreamers កំពុងក្លាយជាប្រធានរឿងដ៏ចម្រូងចម្រាស
Dreamers គឺជាឈ្មោះដែលគេបានដាក់លើជនអន្តោប្រវេសន៍ខុសច្បាប់ជិត ៧០០ ០០០នាក់នៅអាមេរិក និងដែលភាគច្រើនជាជនជាតិម៉ិចស៊ិក។ ជនអន្តោប្រវេសន៍ទាំងអស់នេះបានរត់ទៅរស់នៅក្នុងទឹកដីអាមេរិកតំាងពីនៅវ័យក្មេងជាកុមារ។ រឿងរ៉ាវមួយនេះមិនមែនជារឿងថ្មី និងបានបន្តចោទឡើងនៅគ្រប់ជំនាន់ប្រធានាធិបតី មិនថាមកពីបក្សសាធារណរដ្ឋ ឬបក្សប្រជាធិបតេយ្យ។ នៅក្នុងជំនាន់លោកប្រធានាធិបតីបារ៉ាក់ អូបាម៉ា លោកអូបាម៉ាបានបង្កើតឲ្យមានកម្មវិធីមួយដែលផ្តល់សិទ្ធិស្របច្បាប់ឲ្យពួក Dreamers និងអនុញ្ញាតឲ្យពួកអាចសិក្សារៀនសូត្រ និងធ្វើការងារ។
កម្មវិធីរបស់លោកអូបាម៉ាមួយនេះបានទទួលការគាំទ្រដោយពលរដ្ឋអាមេរិកភាគច្រើន។ តែបែរជាត្រូវបានលោកដូណាល់ ត្រាំលប់ចោលក្នុងខែកញ្ញា ឆ្នាំ ២០១៧ ហើយលោកត្រាំបានបញ្ជូនសំណុំរឿងមួយនេះទៅឲ្យសភាជជែកដោះស្រាយយ៉ាងយូរបំផុតត្រឹមខែមីនា ឆ្នាំ ២០១៨។ បើគ្មានកិច្ចព្រមព្រៀងណាមួយពីពេលនេះដល់ខែមីនាខាងមុខទេ ពួក Dreamers ត្រូវប្រឈមនឹងការបណ្តេញចេញពីអាមេរិកឲ្យត្រឡប់ទៅកាន់ប្រទេសកំណើតរបស់គេវិញ។
ក្រៅពីបញ្ហាជនអន្តោប្រវេសន៍ Dreamers នៅមានរឿង ២ផ្សេងទៀតដែលគណបក្សសាធារណរដ្ឋចង់លើកទៅជជែកជាមួយគណបក្សប្រជាធិបតេយ្យ ទី១ ថវិកាសម្រាប់ចំណាយសាងសង់ជញ្ជាំងតាមព្រំដែនជាមួយប្រទេសម៉ិចស៊ិកដើម្បីទប់លំហូរជនអន្តោប្រវេសន៍ និងទី២ នយោបាយជួបជុំគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ