លោកដូណាល់ ត្រាំ ចោទបណ្តាញសង្គមថា លំអៀង បិទសំឡេងក្រុមអភិរក្សនិយម
មានអ្នកតាមជាវ ដល់៥៤លាននាក់ នៅលើបណ្តាញសង្គមTwitter ប្រធានាធិបតី អាមេរិក លោកដូណាល់ ត្រាំបានសរសេរសារ រិះគន់ក្រុមហ៊ុនបណ្តាញសង្គម ថា លំអៀង បិទខ្ទប់មិនឲ្យមានសំឡេងក្រុមអភិរក្សនិយមអាមេរិកាំង។ សម្រាប់អ្នកជំនាញ គេរកឃើញភស្តុតាង តិចតួចបំផុត ដែលថា បណ្តាញសង្គមលំអៀង ប៉ុន្តែ យ៉ាងណាក៏ដោយ ការលើកឡើង របស់លោកដូណាល់ ត្រាំ ត្រូវបានមនុស្សជាច្រើន ជាពិសេសក្រុមអភិរក្សនិយម អាមេរិកាំងកំពុងជឿលង់ស៊ុប ងើបមុខមិនរួច។
ចុះផ្សាយនៅថ្ងៃ៖
លោកដូណាល់ ត្រាំជឿជាក់ក្នុងចិត្តថា បណ្តាញសង្គមបានបំបិទសំឡេងរបស់ក្រុមអភិរក្សនិយមអាមេរិកាំង។ នៅក្នុងសារTwitter របស់លោក ដែលមានអ្នកតាមដានអាន ជាង៥៤លាននាក់ លោកដូណាល់ត្រាំ កាលពីថ្ងៃសុក្រ បានសរសេររិះគន់សាជាថ្មីថា ក្រុមហ៊ុន បណ្តាញសង្គមបានបិទខ្ទប់សំឡេងមនុស្សរាប់លាននាក់។ “ដោយគ្មានការត្រួតពិនិត្យ ហាមឃាត់ មនុស្សមានសិទ្ធិដឹង ថា អ្វីពិត និងអ្វីដែលមិនពិត។” នេះជាសារTwitter របស់លោកដូណាល់ ត្រាំ។
នេះជាលើកទី២ ដែលប្រធានាធិបតីអាមេរិករិះគន់ក្រុមហ៊ុនបណ្តាញសង្គមថា លំអៀង។ នៅប៉ុន្មានថ្ងៃមុននេះ លោកបានសរសេរសារTwitterថា បណ្តាញសង្គមរើសអើងប្រឆាំងខ្លាំងនឹងសំលេងរបស់ក្រុមសាធារណរដ្ឋ ក្រុមអភិរក្សនិយមអាមេរិកាំង។
ក្រុមហ៊ុនហ្វេសប៊ុក ដែលមានអ្នកប្រើប្រាស់ ជាង ២ពាន់ លាននាក់ (២,២៣ពាន់លាននាក់) និងTwitter ដែលមានសមាជិក៣៣៥លាននាក់ បានបដិសេធការចោទប្រកាន់របស់ប្រធានាធិបតីអាមេរិក និងបានអះអាងថា ក្រុមហ៊ុនគ្មាននយោបាយលំអៀង ទៅរកបក្សណាមួយនោះទេ។
ការសិក្សាជាច្រើនបានបង្ហាញថា ផ្ទុយពីការលើកឡើងរបស់លោកដូណាល់ ត្រាំ ក្រុមអភិរក្សនិយម គឺបានបញ្ចេញសំឡេងច្រើន នៅលើបណ្តាញសង្គម។ យ៉ាងណាក៏ដោយ ការស្រាវជ្រាវរបស់វិទ្យាស្ថានអាមេរិកមួយ Pew research Center កាលពីខែមិថុនាកន្លងទៅបានបង្ហាញថា ជនជាតិអាមេរិកាំង ៤៣ភាគរយជឿថា ក្រុមហ៊ុនបណ្តាញសង្គមអាមេរិកាំងគាំទ្រក្រុមសេរី ច្រើនជាងក្រុមអភិរក្សនិយម។ មួយវិញទៀត ៧២ភាគរយនៃមនុស្សដែលគេបានសម្ភាសន៍ បាននិយាយយល់ស្របនឹងគំនិតដែលថា នៅលើបណ្តាញសង្គម រាល់គំនិត ទស្សនៈ ប្រឆាំងនឹងគណបក្សនយោបាយណាមួយ ត្រូវបានហាមឃាត់ មិនឲ្យមានចេញផ្សាយ។ ការសម្រេច ថ្មីៗនេះ របស់ ហ្វេសប៊ុក Twitter ហើយនិងApple ក្នុងការបិទ មិនឲ្យលោកAlex Jones ដែលជាម្ចាស់វិបសៃតិ៍ និយាយច្រើនពីទ្រឹស្តីផែនការក្បត់ ចូលប្រើបណ្តាញសង្គម គឺ បានជំរុញឲ្យគេជឿកាន់តែខ្លាំងថា ពិតជាមានការបិទខ្ទប់ហាមឃាត់ពីខាងក្រុមហ៊ុនបណ្តាញសង្គម។
ប្រតិកម្មវាយបករបស់Alex Jones បានធ្វើឲ្យសភាអាមេរិក សម្រេចបើកការសួរដេញដោលមួយដើម្បី និយាយពីភាពមិនលំអៀងរបស់បណ្តាញសង្គម។ នៅថ្ងៃសុក្រ គណៈកម្មការស៊ើបអង្កេតរបស់សភាអ្នកតំណាងរាស្រ្តបានប្រកាសថា នឹងកោះហៅ អគ្គនាយករបស់ក្រុមហ៊ុនTwitter និងក្រុមហ៊ុនផ្សេងទៀត ឲ្យចូលឆ្លើយបំភ្លឺ នៅថ្ងៃទី ៩កញ្ញាខាងមុខ។ ប្រធានរបស់Twitter លោកJack Dorsey ធ្លាប់បានផ្តល់បទសម្ភាសន៍ដល់ទូរទស្សន៍ CNN ថា ក្រុមហ៊ុនរបស់លោកមានជំហរគាំទ្រទៅរកក្រុមឆ្វេងនិយម ប៉ុន្តែ នៅលើបណ្តាញសង្គម ក្រុមហ៊ុនប្រកាន់ជំហរអព្យាក្រិត្យ គឺមិនបានអនុវត្តតាមមនោគមវិជ្ជា ឬទស្សនៈផ្ទាល់ខ្លួននោះទេ។
សម្រាប់អ្នកជំនាញ គេរកបានភស្តុតាងតិចតួចណាស់ដែលបង្ហាញថា បណ្តាញសង្គមមានលក្ខណៈលំអៀង ប្រកាន់បក្សពួកទៅតាមការចោទប្រកាន់របស់ ក្រុមអភិរក្សនិយម។ ប៉ុន្តែ ទោះជាយ៉ាងនេះក្តី ការបញ្ចេញសំលេង តវ៉ា ជាញឹកញាប់របស់ប្រធានាធិបតីអាមេរិក លោកដូណាល់ ត្រាំ ចង់ ឬមិនចង់ នឹងជះឥទ្ធិពលទៅលើមតិសាធារណៈដែលនឹងអាចជឿថា ក្រុមហ៊ុនបណ្តាញសង្គមលំអៀងទៅរកក្រុមឆ្វេងនិយម។ ម្យ៉ាងទៀត ការតវ៉ាជាញឹកញយពីប្រធានាធិបតី និងក្រុមអ្នកគាំទ្ររបស់លោក នឹងអាចដាក់សម្ពាធលើក្រុមហ៊ុនបណ្តាញសង្គមដែលនឹងអាចអនុវត្តគោលការណ៍ រឹតបន្តឹងខ្លាំងជាងមុន លើខ្លឹមសារផ្សព្វផ្សាយ របស់អ្នកប្រើប្រាស់បណ្តាញសង្គម។
កន្លងមក ក្រុមអភិរក្សនិយម មកពីគណបក្សសាធារណរដ្ឋ ធ្លាប់បានតវ៉ាចោទប្រកាន់រួចហើយថា ប្រព័ន្ធផ្សព្វផ្សាយនៅអាមេរិកភាគច្រើន គឺកាន់ជើងក្រុមសេរី។ ពេលនេះ គឺដល់វេនបណ្តាញសង្គមម្តង ដែលក្រុមអភិរក្សនិយម ទម្លាក់កំហុស ថា លំអៀង និងជាឧបករណ៍ផ្សព្វផ្សាយរបស់ក្រុមឆ្វេងនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ