កូឡុំប៊ី៖ក្រោយអំពើភេរវកម្ម លោកអ៊ីវ៉ាន់ ឌុចបិទទ្វារចរចាសន្តិភាពជាមួយចលនាឧទ្ទាម ELN
នៅក្នុងប្រទេសកូឡុំប៊ី លោកប្រធានាធិបតីអ៊ីវ៉ាន់ ឌុចបានប្រកាសបិទទ្វារចរចាសន្តិភាពជាមួយចលនាឧទ្ទាមឈ្មោះ « កងទ័ពរំដោះជាតិ » ដែលហៅកាត់ ELN។ ការប្រកាសរបស់លោកអ៊ីវ៉ាន់ ឌុចយ៉ាងដូចនេះបានធ្វើឡើង ក្រោយពីមានអំពើភេរវកម្មសម្លាប់មនុស្សយ៉ាងតិច ២០នាក់ និងរបួសជាង ៦០នាក់នៅក្នុងសាលានគរបាលជាតិស្ថិតក្នុងទីក្រុងបូហ្គោតាកាលពីថ្ងៃព្រហស្បតិ៍ ទី១៧ មករា។ អំពើភេរវកម្មបង្ហូរឈាមមួយនេះត្រូវបានរដ្ឋាភិបាលចង្អុលមុខចលនា ELN។ តែមកទល់ពេលនេះ ELN នៅមិនទាន់ទទួលស្គាល់ ហើយក៏នៅមិនទាន់បដិសេធជាទង្វើរបស់ខ្លួនដែរ៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
មុននឹងសម្រេចចិត្តប្រកាសបិទទ្វារចរចាសន្តិភាពជាមួយចលនាឧទ្ទាម « កងទ័ពរំដោះជាតិ » ELN លោកអ៊ីវ៉ាន់ ឌុចបានចំណាយពេលពិគ្រោះយោបល់ជាមួយក្រុមរដ្ឋមន្រ្តី និងក្រុមយោធា។ ការប្រកាសរបស់លោកអ៊ីវ៉ាន់ ឌុធត្រូវបានធ្វើឡើងតាមកញ្ចក់ទូរទស្សន៍ដោយលោកបានបញ្ជូនសារត្រង់ទៅពួក ELN ដោយអះអាងថា ប្រទេសកូឡុំប៊ីឆ្អែតឆ្អន់នឹងទង្វើសម្លាប់ ការចាប់ជំរឹត និងអំពើភេរវកម្ម។ បន្ទាប់មក លោកអ៊ីវ៉ាន់ ឌុចបានបញ្ជាក់ពីការបិទបញ្ចប់លើការព្យួរដីការឃាត់ខ្លួនប្រតិភូ ១០នាក់របស់ចលនា ELN ដែលកំពុងមានវត្តមាននៅក្នុងប្រទេសគុយបា។ បន្ទាប់មកទៀត លោកអ៊ីវ៉ាន់ ឌុចបានស្នើសុំរដ្ឋាភិបាលគុយបាឲ្យចាប់ពួកភេរវជនទាំងអស់នោះបញ្ជូនទៅឲ្យប៉ូលិសកូឡុំប៊ី។
គួរបញ្ជាក់ថា គឺនៅក្នុងទឹកដីនៃប្រទេសគុយបាដែលមានការរៀបចំកិច្ចចរចាសន្តិភាពរវាងរដ្ឋាភិបាលកូឡុំប៊ី និងចលនាឧទ្ទាមនៃកម្លាំងប្រដាប់អាវុធបដិវត្តកូឡុំប៊ីហៅកាត់ថា FARC ហើយគឺនៅប្រទេសគុយបាដដែលនេះដែលមានកិច្ចចរចាសន្តិភាពរវាងរដ្ឋាភិបាលកូឡុំប៊ី និងចលនាឧទ្ទាម ELN។ តែខុសពីកិច្ចចរចាជាមួយចលនាឧទ្ទាម FARC ដែលទទួលបានកិច្ចព្រមព្រៀងសន្តិភាពចុះហត្ថលេខាក្នុងឆ្នាំ ២០១៦ កិច្ចចរចាជាមួយចលនាឧទ្ទាម ELN ដែលបានចាប់ផ្តើមជាមួយរដ្ឋាភិបាលមុនត្រូវបានផ្អាកតាំងពីការឡើងកាន់តំណែងប្រធានាធិបតីរបស់លោកអ៊ីវ៉ាន់ ឌុចកាលពី ៥ខែមុន។ ឥឡូវនេះ និងក្រោយភេរវកម្មបង្ហូរឈាមក្នុងថ្ងៃព្រហស្បតិ៍ ទី១៧ មករាមក លោកអ៊ីវ៉ាន់ ឌុចបានប្រកាសបិទទ្វារចរចាតែម្តង។
មកដល់ពេលនេះ ចលនាឧទ្ទាម ELN នៅមិនទាន់បានបញ្ចេញប្រតិកម្មអ្វីតបនឹងការសម្រេចចិត្តរបស់លោកអ៊ីវ៉ាន់ ឌុចនៅឡើយទេ។ គួរបញ្ជាក់ថា អំពើភេរវកម្មសម្លាប់មនុស្ស ២០នាក់ និងរបួសជាង ៦០នាក់នៅក្នុងសាលានគរបាលជាតិក្នុងទីក្រុងបូហ្គោតាត្រូវបានរដ្ឋាភិបាលទម្លាក់កំហុសដាក់ចលនា ELN។ តែចលនាឧទ្ទាមមួយនេះបន្តបិទមាត់ដោយនៅមិនទាន់ទទួលស្គាល់ ហើយក៏នៅមិនទាន់បដិសេធជាទង្វើរបស់ខ្លួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ