អាមេរិក៖រដ្ឋបាលរបស់លោកដូណាល់ ត្រាំរឹតបន្តឹងការសុំសញ្ជាតិ និងសុំសិទ្ធិស្នាក់នៅរបស់ជនអន្តោប្រវេសន៍
នៅសហរដ្ឋអាមេរិក បន្ទាប់ពីវិធានការលើជនអន្តោប្រវេសន៍ខុសច្បាប់ លោកដូណាល់ ត្រាំបានផ្តើមចំណាត់ការលើជនអន្តោប្រវេសន៍ស្របច្បាប់ម្តង។ សេតវិមានបានប្រកាសឲ្យដឹងនាថ្ងៃចន្ទ ទី១២ សីហាថា ការសុំសញ្ជាតិអាមេរិកាំង និងការសុំសិទ្ធិស្នាក់នៅនឹងអាចបដិសេធចំពោះជនអន្តោប្រវេសន៍ស្របច្បាប់ណាដែលបានទទួលជំនួយសង្គម។ វិធានការមួយនេះត្រូវបានគេមើលឃើញថា រដ្ឋបាលរបស់លោកត្រាំចង់សំដៅលើក្រុមជនអន្តោប្រវេសន៍ដែលមិនអាចប្រកបរបបចិញ្ចឹមជីវិតដោយខ្លួនឯងបាន។ ក្រុមសមាគមន៍អ្នកការពារជនអន្តោប្រវេសន៍បញ្ចេញប្រតិកម្មខឹងសម្បារដោយចាត់ទុកវិធានការរបស់លោកត្រាំថាមានលក្ខណៈរើសអើង។
ចុះផ្សាយនៅថ្ងៃ៖
ស្តាប់ - ០២:០៧
តាមរយៈវិធានការមួយនេះ រដ្ឋបាលរបស់លោកដូណាល់ ត្រាំចង់ឲ្យជនអន្តោប្រវេសន៍ពឹងផ្អែកលើខ្លួនឯង និងមានការទទួលខុសត្រូវផ្ទាល់ខ្លួនជាជាងដេករង់ចាំជំនួយសង្គមពីរដ្ឋ។ វិធានការថ្មីមួយនេះបានសំដៅលើអ្នកដែលចង់សុំសិទ្ធិរស់នៅលើទឹកដីអាមេរិកាំង និងអ្នកដែលកំពុងរស់នៅលើទឹកដីអាមេរិកាំងស្រាប់។ ចំពោះបេក្ខជនដែលដាក់ពាក្យសុំទៅរស់នៅសហរដ្ឋអាមេរិក ប្រសិនបើបេក្ខជនរូបនោះមិនមានលទ្ធភាពដើម្បីអាចរស់នៅខ្លួនឯងដោយមិនពឹងលើជំនួយសង្គមពីរដ្ឋបានទេ ពាក្យសុំរបស់គេនឹងត្រូវបដិសេធ។ ចំណែកអ្នកដែលកំពុងមានវត្តមាននៅលើទឹកដីអាមេរិកាំងស្រាប់ និងកំពុងទទួលបានជំនួយសង្គមពីរដ្ឋ ដូចយ៉ាងជំនួយចំណីអាហារ ឬជំនួយស្នាក់នៅ ការសុំចូលសញ្ជាតិអាមេរិកាំង និងការសុំបន្តសិទ្ធិស្នាក់នៅរបស់រូបគេនឹងត្រូវបដិសេធ។
គួររម្លឹកថានៅសហរដ្ឋអាមេរិក ធនធានហិរញ្ញវត្ថុជាលក្ខខណ្ឌមួយក្នុងចំណោមលក្ខខណ្ឌជាច្រើនទៀតដែលរដ្ឋបាលអាមេរិកយកធ្វើជាមូលដ្ឋានសម្រាប់សិក្សាលើការសុំសិទ្ធិរស់នៅ ឬសុំសញ្ជាតិអាមេរិកាំងរបស់ជនអន្តោប្រវេសន៍ស្របច្បាប់។ តែអ្វីដែលលោកដូណាល់ ត្រាំចង់បាន គឺរឹតបន្តឹងបន្ថែមដើម្បីកាត់បន្ថយការចំណាយរបស់រដ្ឋ និងបន្តរក្សាជំនួយសង្គមសម្រាប់ពលរដ្ឋអាមេរិកាំងក្រីក្រ។ វិធានការមួយនេះរបស់លោកត្រាំដែលនឹងចូលជាធរមាននៅ ៦០ថ្ងៃខាងមុខកំពុងធ្វើឲ្យក្រុមសមាគមន៍អ្នកការពារជនអន្តោប្រវេសន៍ខឹងសម្បារយ៉ាងខ្លាំង។ សម្រាប់ពួកគេ វិធានការរបស់លោកត្រាំមានលក្ខណៈរើសអើង។
សមាគមន៍អ្នកការពារជនអន្តោប្រវេសន៍មួយចំនួនបានឲ្យដឹងថា វិធានការរបស់លោកត្រាំអាចនឹងប៉ះពាល់ដល់ជនអន្តោប្រវេសន៍ស្របច្បាប់ជិត ២៦លាននាក់ដែលកំពុងរស់នៅលើទឹកដីអាមេរិកាំង។ ក្រៅពីប្រតិកម្មខឹងសម្បាររបស់ក្រុមសមាគមន៍អ្នកការពារជនអន្តោប្រវេសន៍ ក៏មានការធ្វើអត្ថាធិប្បាយផ្សេងៗដែលថា អ្វីដែលលោកត្រាំបានធ្វើនេះគឺផ្ទុយនឹងរូបភាពរបស់សហរដ្ឋអាមេរិកដែលជាដែនដីតែងទទួលស្វាគមន៍ជនអន្តោប្រវេសន៍ដោយគ្មានការរើសអើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ