អាមេរិកអំពាវនាវឱ្យក្រុមហ៊ុនអ៊ីនធ័រនែតព្យួរគណនីប្រព័ន្ធសង្គមរបស់មេដឹកនាំអ៊ីរ៉ង់
បាតុកម្មហិង្សាប្រឆាំងនឹងការឡើងថ្លែប្រេងយ៉ាងគំហុក បានបិទបញ្ចប់ហើយ ប៉ុន្តែពលរដ្ឋ អ៊ីរ៉ង់ត្រូវបានកាត់ផ្តាច់ពីពិភពលោកខាងក្រៅ តាំងពីជាងមួយសប្តាហ៍មកហើយ។ ប្រឈមនឹងស្ថានភាពបែបនេះ សហរដ្ឋអាមេរិកបានអំពាវនាវឱ្យក្រុមហ៊ុនហ្វេសប៊ុក អាំងស្តាក្រាម ព្យួរគណនីរបស់មេដឹកនាំអ៊ីរ៉ាក់ដែរ រហូតទាល់តែប្រទេសព្រមភ្ជាប់បណ្តាញអ៊ីនធ័រនែតជូនប្រជាជនត្រឹមត្រូវឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
រដ្ឋាភិបាលអ៊ីរ៉ង់ បានភ្ជាប់បណ្តាញអ៊ីនធ័រនែតតាមផ្ទះខ្លះៗវិញហើយ តែនៅមានការបិទខ្ទប់វិបសៃត៍មួយចំនួន។ ចំណែកប្រព័ន្ធទូរស័ព្ទនិងអ៊ីនធ័រនែតចល័ត នឹងចាប់ដំណើរការឡើងវិញនៅថ្ងៃអាទិត្យនេះ។ នេះបើតាមការសន្យារបស់រដ្ឋាភិបាល។
សូមបញ្ជាក់ថា បណ្តាញអ៊ីនធ័រនែតអ៊ីរ៉ង់ត្រូវបានកាត់ផ្តាច់ស្ទើរទាំងស្រុងតាំងពីជាងមួយសប្តាហ៍មកហើយ។ ពលរដ្ឋអ៊ីរ៉ង់ត្រូវបានកាត់ផ្តាច់ពីពិភពលោកខាងក្រៅ តែរដ្ឋាភិបាលវិញ នៅតែអាចបន្តប្រើប្រព័ន្ធសង្គមនេះបានទៀត។ ពិតជារបបអាត្មានិយមណាស់ ! នេះជាការបរិហាររបស់អន្តរការីអាមេរិកទទួលបន្ទុកកិច្ចការអ៊ីរ៉ង់លោក Brian Hook នៅក្នុងបទសម្ភាសន៍ជាមួយបណ្តាញBloomberg ដោយបានជំរុញ នៅល្ងាចមិញឱ្យក្រុមហ៊ុនអ៊ីនធ័រនែតអាមេរិក ដូចជា ហ្វេសប៊ុក អាំងស្តាក្រាម និងទ្វីតទ័រ ព្យួរគណនីរបស់អគ្គមគ្គុទេសក៍អ៊ីរ៉ង់ ខាមេណី រដ្ឋមន្ត្រីក្រសួងការបរទេស លោក ហ្សាវ៉ាដ ហ្សារីហ្វ និងប្រធានាធិបតី ហាសាន់ រ៉ូហានី មួយរយៈ រហូតទាល់តែប្រជាពលរដ្ឋមានសេរីភាពផ្នែកអ៊ីនធ័រនែតពេញលេញ។
ក្រុមហ៊ុនហ្វេសប៊ុក និងអាំងស្តារក្រាម បានគូសបញ្ជាក់ថាមិនអាចផ្តល់ចម្លើយនឹងសំណួរក្រុមអ្នកសារព័ត៌មានបារាំងបានទេ។ រីឯ ទ្វីតទ័រវិញ ប្រាប់ថាគ្មានអ្វីត្រូវធ្វើអត្ថាធិប្បាយទេ។
អ៊ីរ៉ង់បានធ្លាក់ក្នុងវិបត្តិនៅថ្ងៃទី ១៥វិច្ឆិកា ពីរបីម៉ោងក្រោយរដ្ឋាភិបាលប្រកាសធ្វើកំណែទម្រង់វិធីផ្តល់ជំនួយឧបត្ថម្ភប្រេង ដើម្បីជួយគ្រួសារយ៉ាប់យឺន ប៉ុន្តែកំណែទម្រង់នេះបានធ្វើឱ្យតម្លៃប្រេងឡើងថ្លៃយ៉ាងខ្លាំងទៅវិញ។ មួយថ្ងៃក្រោយមក រដ្ឋាភិបាលបានចាត់វិធានការហាមឃាត់ និងបិទខ្ទប់មិនឱ្យមានការផ្សព្វផ្សាយរូបភាពបង្ក្រាបបាតុករ ដោយបានកាត់ផ្តាច់ប្រព័ន្ធអ៊ីនធ័រនែត។ ពលរដ្ឋអ៊ីរ៉ង់ ត្រូវកាត់ផ្តាច់ពីពិភពលោក។
សម្រាប់អន្តរការីអាមេរិកប្រចាំអ៊ីរ៉ង់ រដ្ឋាភិបាលផ្តាច់អ៊ីនធ័រនែត ដើម្បីបិទបាំងចំនួនបាតុករស្លាប់ និងសោកនាដកម្មលើបាតុកររាប់សិបពាន់នាក់នៅទូទាំងប្រទេស ពីក្រសែភ្នែកអន្តរជាតិ។ បាតុកម្មដែលបានបង្កឱ្យស្លាប់ពលរដ្ឋស៊ីវិល៥នាក់ បើតាមតួលេខផ្លូវការ តែជាង១០០នាក់បើតាមអង្គការAmnesty International។
កាលពីថ្ងៃសុក្រ សហរដ្ឋអាមេរិកបានសម្រេចដាក់ទណ្ឌកម្មប្រឆាំងនឹងរដ្ឋមន្ត្រីក្រសួងទូរគមនាគមន៍ ដែលបានចេញបញ្ជាឱ្យបិទអ៊ីនធ័រនែតក្នុងប្រទេស។ នៅក្នុងសារទ្វីត ជាភាសាពែក្ស រដ្ឋមន្ត្រីការបរទេសអាមេរិកបានប្រាប់បាតុករអ៊ីរ៉ង់ឱ្យបញ្ជូនមកអាមេរិកនូវរាល់ភស្តុតាងបញ្ជាក់អំពីសកម្មភាពរបស់តេអេរ៉ង់ ដើម្បីឱ្យពួកគេបានទទួលទណ្ឌកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ