បាញ់រះនៅរដ្ឋកាលីហ្វ័រញ៉ា ស្លាប់១៤នាក់
ហេតុការណ៍បាញ់រះ សម្លាប់មនុស្សនៅក្នុងមជ្ឈមណ្ឌលផែនការគ្រួសារ នៃរដ្ឋខូឡូរ៉ាដូ មិនទាន់រំលងផុតបានមួយសប្តាហ៍ផង មានហេតុការណ៍បាញ់រះថ្មីមួយទៀត នៅក្រុង សាន់ ប៊ែកណាឌីណូ រដ្ឋកាលីហ្វ័រញ៉ា ដែលបណ្តាលឲ្យស្លាប់មនុស្សចំនួន ១៤នាក់។ ជនសង្ស័យពីរនាក់ ត្រូវបានប៉ូលីសបាញ់សម្លាប់ នៅពេលដែលពួកគេ ព្យាយាមបើកឡានរត់គេច និងបាញ់តបតជាមួយនឹងប៉ូលីស។ ករណីបាញ់រះសម្លាប់មនុស្ស បានកើតឡើងជាញឹកញាប់ នៅសហដ្ឋអាមេរិក ដែលធ្វើឲ្យលោកបារ៉ាក់អូបាមា អត់ទ្រាំលែងបាន ហើយទាមទារឲ្យសភា រឹតបន្តិងច្បាប់ គ្រប់គ្រងអាវុធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
យ៉ាងហោចណាស់ មានមនុស្ស១៤ នាក់ បានស្លាប់ និង ១៧នាក់ រងរបួសធ្ងន់ ក្នុងហេតុការណ៍បាញ់រះមួយ ក្នុងក្រុង សាន់ ប៊ែកណាឌីណូ រដ្ឋកាលីហ្វ័រញ៉ា សហរដ្ឋអាមេរិក។ ហេតុការណ៍ បានកើតឡើងនៅវេលាម៉ោងប្រហែលជាជាង ១១ព្រឹក នៅពេលមនុស្សពីរនាក់ ប្រុសម្នាក់ស្រីម្នាក់ ស្លៀកពាក់ ប៉ារ៉ា ប្រដាប់ដោយកាំភ្លើង Fusil d’Assaut បានចូលមកបាញ់ ទៅលើក្រុមមនុស្ស ដែលកំពុងតែជួបជុំគ្នា នៅក្នុងការិយាល័យទទួលបន្ទុកជនពិការ។
រហូតមកត្រឹមពេលនេះ គេនៅមិនទាន់អាចសន្និដ្ឋានបាន អំពីមូលហេតុ ដែលបណ្តាល ឲ្យជនដៃដល់ទាំង២ ធ្វើសកម្មភាពដ៏ឃោរឃៅនេះ នៅឡើយទេ។ លោកអនុប្រធាន FBI ប្រចាំរដ្ឋកាលីហ្វ័រញ៉ា បានបញ្ជាក់ថា គេមិន អាចទាត់ចោលការសង្ស័យ លើមូលហេតុភេរវកម្មទេ។ ជនសង្ស័យទីបី ម្នាក់ទៀត ត្រូវបានចាប់ខ្លួន ក៏ប៉ុន្តែគេមិនដឹងថា កំរិតនៃការជាប់ពាក់ព័ន្ធជាមួយនឹង ជនដៃដល់ទាំងពីរខាងលើ មានទំហំប៉ុណ្ណានោះទេ។
ជនដៃដល់ទាំងពីរ មិនត្រូវបានគេស្គាល់ថា ជាអ្នកកាន់សាសនាអ៊ីស្លាមទេ ហើយក៏មិនមានឈ្មោះ នៅក្នុងបញ្ជីជនបង្ករគ្រោះថ្នាក់ដែរ។ យោងតាមការផ្តល់ដំណឹងជាបឋម ជនដៃដល់ទាំងពីរនាក់ ជាប្តីប្រពន្ធនឹងគ្នា មានកូនមួយអាយុ៦ខែ។ ប្រុសឈ្មោះ Syed Farook អាយុ ២៨ឆ្នាំ និងស្រីឈ្មោះ Tashfeen Malik អាយុ២៧ឆ្នាំ។ ជនដៃដល់ជាប្តី គឺជាបុគ្គលិកបំរើការនៅការិយាល័យសុខភាពសាធារណៈ នៃក្រុងSan Bernardo ហើយដែលមានវត្តមាននៅក្នុងពេលជួបជុំគ្នានេះដែរ។
បើតាមបុគ្គលិកផ្សេងទៀត ដែលជាសាក្សី បានបញ្ជាក់ថា ជនដៃដល់ មានវត្តមានក្នុងពេលជួបប្រជុំគ្នា ប៉ុន្តែបានដើរចេញ បន្ទាប់ពីបានបង្ហាញអាកប្បកិរិយា ខឹងសម្បារ នឹងនរណាម្នាក់ រឺអ្វីម្យ៉ាង។ ភ្លាមៗ ក្រោយការផ្តល់ដំណឹងនេះ ក្រុមប៉ូលីស ដោយមានការសហការពីក្រុម FBI បានតាមដានទៅដល់ផ្ទះ របស់ជនដៃដល់ទាំងពីរ ហើយបានបើកឡានប្រដេញជាមួយជនដៃដល់ រហូតមានការបាញ់តបតគ្នា។ ជនដៃដល់ប្តីប្រពន្ធទាំងពីរ ត្រូវប៉ូលីសបាញ់សម្លាប់ នៅតាមផ្លូវ បន្ទាប់ពីបានបាញ់តដៃជាមួយប៉ូលីស។
សូមបញ្ជាក់ថា ករណីបាញ់រះសម្លាប់មនុស្ស មានកើតឡើងនៅសហរដ្ឋអាមេរិក ជាញឹកញាប់។ គិតពីដើមឆ្នាំ ២០១៥មក មានករណីបាញ់រះសម្លាប់មនុស្សជាក្រុមរបៀបនេះ ចំនួន ៣៥៤ករណី នៅសហរដ្ឋអាមេរិក ហើយសម្លាប់មនុស្ស ១២១៩១នាក់។ នេះក៏ដោយសារតែការទិញដូរ និងកាន់កាប់អាវុធ នៅសហរដ្ឋអាមេរិក ពុំមានច្បាប់ហាមឃាត់តឹងរឹងទេ។ លោក បារ៉ាក់ អូបាម៉ា ជាថ្មីម្តងទៀត បានថ្លែងបន្ទោសសមាជិកសភា ដែលតែងតែព្យាយាមប៉ែងជើងរដ្ឋាភិបាលលោក ក្នុងការបង្កើតច្បាប់គ្រប់គ្រងអាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ