រដ្ឋាភិបាលកូឡុំប៊ី និងចលនាឧទ្ទាមហ្វាកបានឯកភាពគ្នាបង្កើតឲ្យមានគណៈកម្មការសច្ចៈ
រដ្ឋាភិបាលនៃប្រទេសកូឡុំប៊ី និងចលនាឧទ្ទាមហ្វាក (FARC) បានព្រមព្រៀងគ្នាក្នុងការបង្កើតឲ្យមានគណៈកម្មការសច្ចៈមួយនាពេលឆាប់ៗខាងមុខ។ សេចក្តីប្រកាសនេះត្រូវបានធ្វើឡើងនៅក្នុងទីក្រុងឡាហាវ៉ាន ប្រទេសគុយបាដែលតំណាងរដ្ឋាភិបាល និងតំណាងឧទ្ទាមហ្វាកបានជួបចរចាគ្នាតំាងពី ២ឆ្នំាកន្លះមកហើយ។ គោលដៅនៃកិច្ចចរចា គឺសំដៅបិទបញ្ចប់សង្រ្គាមស៊ីវិលដែលបានអូសបន្លាយអស់កន្លះសតវត្សកន្លងមក ដោយបានបណ្តាលឲ្យមានមនុស្សស្លាប់ជាង ២០ម៉ឺននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
កិច្ចព្រមព្រៀងក្នុងការបង្កើតឲ្យមានគណៈកម្មការសច្ចៈមួយបានកើតមានឡើងចំពេលល្អណាស់ ព្រោះកាលពី ២សប្តាហ៍មុន ក្រុមឧទ្ទាមហ្វាកបានប្រកាសពីការកាន់អាវុធប្រយុទ្ធជាថ្មី បន្ទាប់ពីកងទ័ពរដ្ឋាភិបាលបានធ្វើការទម្លាក់គ្រាប់បែកលើទីតំាងមួយរបស់ខ្លួន។ ប្រជាជនកូឡុំប៊ីភាគច្រើនថែមទំាងបារម្ភថា កិច្ចចរចាស្វែងរកសន្តិភាពដែលភាគីទំាងពីរកំពុងបន្តធ្វើសព្វថ្ងៃនឹងត្រូវចប់ត្រឹមនេះ។ ដូច្នេះ អ្វីដែលភាគីទំាងពីរបានឯកភាពគ្នាពេលនេះ គឺជាដំណឹងល្អមួយ ពិសេសនឹងអាចជួយផ្តល់សន្ទុះបន្ថែមនៅក្នុងកិច្ចចរចាសន្តិភាព។
គួរជម្រាបជូនថា នេះជាលើកទី១ហើយដែលប្រទេសកូឡុំប៊ីបានសម្រេចបង្កើតឲ្យមានគណៈកម្មការសច្ចៈមួយក្នុងគោលដៅស្វែងរកការពិតជុំវិញសង្រ្គាមស៊ីវិលដែលបានញំាញីប្រទេសអស់រយៈពេល ៥០ឆ្នំាកន្លងទៅ ដោយបានបណ្តាលឲ្យមានមនុស្សស្លាប់ជាង ២០ម៉ឺននាក់ និងបាត់ខ្លួនយ៉ាងតិច ៤៥ ០០០នាក់ ព្រមទំាងមានប្រជាជនជិត ១០% នៃប្រជាជនសរុបបានភៀសខ្លួនទៅជ្រកកោនកន្លែងផ្សេងដើម្បីគេចពីសង្រ្គាម។ គណៈកម្មការសច្ចៈដែលរដ្ឋាភិបាល និងចលនាឧទ្ទាមហ្វាកគ្រោងបង្កើតនោះ គឺជាស្ថាប័នឯករាជ្យមួយដែលមានសមាជិកជំនាញចំនួន ១១រូប។
គណៈកម្មការសច្ចៈមានតួនាទីជាអ្នកស្វែងរកការទទួលខុសត្រូវរបស់ភាគីនីមួយៗ មានរដ្ឋាភិបាល ចលនាឧទ្ទាមហ្វាក និងកម្លំាងប្រដាប់អាវុធផ្សេងទៀតដែលមានជាប់ពាក់ព័ន្ធនៅក្នុងជម្លោះហែកហួរគ្នានារយៈពេល ៥០ឆ្នំាកន្លងទៅ។ ទន្ទឹមគ្នានេះ គណៈកម្មការសច្ចៈក៏មានតួនាទីជាអ្នកវាយតម្លៃពីផលវិបាកកើតចេញពីសង្រ្គាម ពិសេសនៅក្នុងតំបន់ដែលបានទទួលរងគ្រោះខ្លំាងជាងគេ ពិសេសជួយជនរងគ្រោះឲ្យទទួលបានប្រាក់សំណងផ្លូវចិត្ត និងសម្ភារៈ។ គណៈកម្មការសច្ចៈនេះនឹងត្រូវបង្កើតឡើងសម្រាប់រយៈពេល ៣ឆ្នំា និងគ្មានសិទ្ធិអំណាចក្នុងការប្តឹងផ្តល់ ឬចាប់បញ្ជូនអ្នកទទួលខុសត្រូវណាម្នាក់ទៅកាត់ទោសនៅតុលាការទេ។
យ៉ាងណាក៏ដោយ គណៈកម្មការសច្ចៈនឹងអាចបង្កើតបាន លុះត្រាណាតែភាគីជម្លោះបានចុះហត្ថលេខាលើកិច្ចព្រមព្រៀងសន្តិភាពជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ