រដ្ឋាភិបាលកូឡុំប៊ីនិងក្រុមឧទ្ទាមFARC ចរចាគ្នាឡើងវិញ នៅប្រទេសគុយបា
នៅថ្ងៃចន្ទនេះ រដ្ឋាភិបាលកូឡុំប៊ី និងក្រុមឧទ្ទាមប្រដាប់អាវុធបដិវត្តន៍កូឡុំប៊ី ហៅកាត់ថា FARC ត្រូវជួបពិភាក្សាគ្នាសារជាថ្មី ដើម្បីស្វែងរកដំណោះស្រាយសន្តិភាព។ ការចរចានេះត្រូវប្រព្រឹត្តទៅនៅប្រទេសគុយបា។ ការចរចាកន្លងមក ត្រូវជាប់គាំងស្ទះ ដោយសារតែពុំមានការចុះសម្រុងគ្នាទាក់ទងនឹងការចូលរួមរបស់ក្រុមឧទ្ទាមក្នុងឆាកនយោបាយកូឡុំប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
បើគិតទៅ មានរយៈពេល៩ខែហើយ ដែលក្រុមឧទ្ទាម FARC បានធ្វើការចរចាជាមួយរដ្ឋាភិបាលកូឡុំប៊ី នៅប្រទេសគុយបា ដើម្បីរកដំណោះស្រាយបញ្ចប់ជម្លោះនៅកូឡុំប៊ី ដែលបានសម្លាប់មនុស្សជាង២សែននាក់ ក្នុងរយៈពេល៥០ឆ្នាំមកនេះ។ ការចរចារវាងភាគីទាំងពីរនៅពុំទាន់សំរេចចេញកិច្ចព្រមព្រៀងសន្តិភាពណាមួយនៅឡើយទេ។
ក្នុងកិច្ចចរចាកន្លងមក ភាគីទាំងពីរបានព្រមព្រៀងគ្នាលើចំណុចអភិវឌ្ឍន៍តំបន់ជនបទ។ ប៉ុន្តែ ប្រធានបទបន្ទាប់មកទៀត ស្តីពីការចូលរួមរបស់ក្រុមឧទ្ទាមក្នុងកិច្ចការនយោបាយកូឡុំប៊ី បានជាប់គាំងស្ទះ។ កាលពីថ្ងៃសុក្រ ក្រុមឧទ្ទាមបានដើរចេញពីតុចរចា ព្រោះពួកគេត្រូវការពេលវេលា ដើម្បីសិក្សាលើសំណូមពររបស់ប្រធានាធិបតី Santos ជាមុនសិន។ ប្រធានាធិបតីកូឡុំប៊ី បានប្រកាសកាលពីសប្តាហ៍មុន ថាចង់អោយមានការបោះឆ្នោតប្រជាមតិ ប្រសិនបើភាគីចរចាទាំងពីរសំរេចបានកិច្ចព្រមព្រៀងសន្តិភាពជាយថាហេតុណាមួយ។ លោក Santos ចង់អោយការបោះឆ្នោតប្រជាមតិនេះ ធ្វើឡើងទន្ទឹមគ្នានឹងការបោះឆ្នោតសភា និងការបោះឆ្នោតប្រធានាធិបតី នៅឆ្នាំ២០១៤ខាងមុខ។ ក្រុមឧទ្ទាម FARC មិនយល់ស្របលើចំនុចនេះឡើយ។ ជាច្រើនខែមកនេះ ក្រុមឧទ្ទាមបានទាមទារអោយលើកពេលបោះឆ្នោតទៅពេលក្រោយ ដើម្បីចៀសវាងបង្អាក់ដំណើរការនៃការចរចាសន្តិភាព។
កិច្ចព្រមព្រៀងសន្តិភាពនេះ ប្រហែលជាពិបាកនឹងសំរេចបានភ្លាមៗណាស់។ ក្នុងពេលដែលក្រុមឧទ្ទាមកូឡុំប៊ី ចរចាជាមួយភាគីរដ្ឋាភិបាលនោះ អំពើហិង្សានៅតែបន្តមាន នៅកូឡុំប៊ី។ ទាហានកូឡុំប៊ី នៅតែបន្តប្រតិបត្តិការប្រយុទ្ធនឹងក្រុមឧទ្ទាម FARC ដដែល។ កាលពីថ្ងៃសៅរ៍កន្លងទៅ ក្រុមឧទ្ទាមបានសម្លាប់ទាហាន១៣នាក់ នៅព្រំដែនជាប់ជាមួយប្រទេសវេណេស៊ុយអេឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ