នាយករដ្ឋមន្រ្តីអាល្លឺម៉ង់ទៅបំពេញទស្សនកិច្ចនៅប្រេស៊ីលដែលកំពុងផ្ទុះរឿងអាស្រូវពុករលួយ
លោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលផ្តើមទស្សនកិច្ចផ្លូវការក្នុងប្រទេសប្រេស៊ីលនាថ្ងៃព្រហស្បតិ៍ ទី២០ សីហា។ លោកស្រីមែរកិល និងរដ្ឋមន្រ្តីអាល្លឺម៉ង់ចំនួន ៦រូបបានរួមប្រជុំការងារជាមួយសមភាគីប្រេស៊ីលដែលដឹកនំាដោយលោកស្រីប្រធានាធិបតីឌីលម៉ា រូសសេហ្វ។ ប្រធានបទនៃកិច្ចប្រជុំបានផ្តោតសំខាន់លើវិនិយោគទុនរបស់រោងចក្រ សហគ្រាសអាល្លឺម៉ង់ក្នុងប្រទេសប្រេស៊ីល ទំនាក់ទំនងសេដ្ឋកិច្ច និងការផ្លាស់ប្តូរអាកាសធាតុនៅក្នុងបរិយាកាស។ អ្វីជាការកត់សម្គាល់ វត្តមានរបស់ប្រមុខរដ្ឋាភិបាលអាល្លឺម៉ង់នៅប្រេស៊ីលពេលនេះបានធ្វើឡើង ចំពេលដែលប្រេស៊ីលកំពុងជួបប្រទះនឹងរឿងអាស្រូវពួករលួយ និងវិបត្តិសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គឺលោកស្រីប្រមុខរដ្ឋាភិបាលអាល្លឺម៉ង់អង់ហ្កឺឡា មែរកិលជាអ្នកដែលបានធ្វើសំណើទៅកាន់លោកស្រីប្រធានាធិបតីប្រេស៊ីលឌីលម៉ា រូសសេហ្វឲ្យរៀបចំកិច្ចប្រជុំការងារអន្តរក្រសួងរវាងអាល្លឺម៉ង់ និងប្រេស៊ីលពេលនេះ។ គឺជាកិច្ចប្រជុំពិសេសមួយដែលប្រទេសអាល្លឺម៉ង់បានរៀបចំសម្រាប់តែ ៩ប្រទេសក្នុងលោកប៉ុណ្ណោះ និងដែលលោកស្រីឌីលម៉ា រូសសេហ្វបានយល់ព្រមដោយគ្មានការរារែក។ តែអ្វីដែលគួរបញ្ជាក់នោះគឺថា កិច្ចប្រជុំការងារពិសេសរវាងអាល្លឺម៉ង់ និងប្រេស៊ីលពេលនេះបានធ្វើឡើង ចំពេលដែលប្រេស៊ីលកំពុងផ្ទុះឡើងនូវរឿងអាស្រូវពុករលួយ និងវិបត្តិសេដ្ឋកិច្ច។
ជាក់ស្តែងនាចុងសប្តាហ៍កន្លងទៅ មានប្រជាជនប្រេស៊ីលរាប់សិបម៉ឺននាក់បានដង្ហែក្បួនបាតុកម្មទាមទារឲ្យលោកស្រីឌីលម៉ា រូសសេហ្វចុះចេញពីតំណែងដោយសារតែរឿងពុករលួយ។ ដូច្នេះឃើញថា វត្តមានរបស់លោកស្រីប្រមុខរដ្ឋាភិបាលអាល្លឺម៉ង់ក្នុងទឹកដីប្រេស៊ីលពេលនេះ ពិតជានិមិត្តរូបនៃការគំាទ្រយ៉ាងសំខាន់ចំពោះលោកស្រីឌីលម៉ា រូសសេហ្វ ពិសេសចំពេលដែលប្រជាប្រិយភាពរបស់លោកស្រីបានធ្លាក់ដល់បាត។ តាមលទ្ធផលនៃការស្ទង់មតិចុងក្រោយឲ្យដឹងថា លោកស្រីឌីលម៉ា រូសសេហ្វទទួលបានគំាទ្រពីប្រជាជនតែ ៨% ប៉ុណ្ណោះ ពោលជាប្រធានាធិបតីប្រេស៊ីលម្នាក់ដែលកំពុងមានអប្រជាប្រិយភាពជាងគេ គិតតំាងពីក្រោយការបញ្ចប់របបផ្តាច់ការយោធា។
គឺនៅក្នុងន័យនេះហើយបានជាក្រសួងការបរទេសប្រេស៊ីលបានឆ្លៀតនិយាយដាក់ផ្លែផ្កាដោយលើកដំកើងរដ្ឋាភិបាលរបស់លោកស្រីឌីលម៉ា រូសសេហ្វថា បើប្រជាជនអាល្លឺម៉ង់គ្មានទំនុកចិត្តលើរដ្ឋាភិបាលប្រេស៊ីលបច្ចុប្បន្នទេ ម្ល៉េះលោកស្រីនាយករដ្ឋមន្រ្តីអាល្លឺម៉ង់នឹងមិនដឹកនំាគណៈប្រតិភូមកទស្សនកិច្ចនៅប្រេស៊ីលទេ។ គួរជម្រាបជូនថា ទស្សនកិច្ចរបស់ប្រមុខរដ្ឋាភិបាលអាល្លឺម៉ង់នៅប្រេស៊ីល គឺដើម្បីលើកដំកើងបន្ថែមនូវរូបភាពប្រទេសអាល្លឺម៉ង់ក្នុងនាមជាមហាអំណាចពិភពលោកផ្នែកផលិតកម្មបច្ចេកវិទ្យា និងអភិវឌ្ឍន៍យូរអង្វែង។
បច្ចុប្បន្ន គ្រាន់តែនៅក្នុងទីក្រុងសៅ ប៉ូឡូមួយនៃប្រទេសប្រេស៊ីល មានវត្តមានរោងចក្រ សហគ្រាសអាល្លឺម៉ង់ដល់ទៅ ១ ៤០០ និងបានជួយផ្តល់ការងារឲ្យពលរដ្ឋប្រេស៊ីលចំនួនជាង ២៥០ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ