រុស្ស៊ីគំរាមចាត់វិធានការប្រឆាំងនឹងអាមេរិក ក្រោយព្រឹទ្ធសភាចេញច្បាប់ដាក់ទណ្ឌកម្មប្រឆាំងនឹងម៉ូស្គូ
ព្រឹទ្ធសភាអាមេរិកបានយល់ព្រមព្រៀងគ្នា ជាឯកច្ឆន្ទ កាលពីយប់ថ្ងៃសៅរ៍ទី ១៣ធ្នូ ដើម្បីបង្កើនការដាក់ទណ្ឌកម្មសេដ្ឋកិច្ចប្រឆាំងនឹងរុស្ស៊ី និងផ្តល់អាវុធដល់កងទ័ពអ៊ុយក្រែន។ នៅមួយថ្ងៃមុនជំនួបរវាងប្រមុខការបរទេសអាមេរិក និងរុស្ស៊ី នៅទីក្រុងរ៉ូម នៅថ្ងៃអាទិត្យនេះ ក្រេមឡាំងបានព្រមានរួចហើយថា នឹងចាត់វិធានការប្រឆាំងសងសឹក នឹងអាមេរិកដែលបានបោះឆ្នោតបន្ថែមទណ្ឌកម្មទៅលើរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥២
សភាទាំងពីរជាន់ថ្នាក់របស់អាមេរិកកំពុងដើរនយោបាយ ដាក់សម្ពាធទៅលើរដ្ឋបាលលោកអូបាម៉ា។ កាលពីយប់ថ្ងៃសៅរ៍ ព្រឹទ្ធសភាអាមេរិកបានគាំទ្រជំហររបស់សភាអ្នកតំណាងរាស្ត្រ ដោយបានបោះឆ្នោត គាំទ្រលើអត្ថបទមួយដែលចែងពីការគាំទ្រសេរីភាពនៅអ៊ុយក្រែន។ អត្ថបទគាំទ្ររដ្ឋាភិបាលអ៊ុយក្រែនមានចែងពីការដាក់ទណ្ឌកម្មបន្ថែមប្រឆាំងនឹងរុស្ស៊ី និងការផ្តល់សព្វាវុធ តម្លៃ៣៥០លានដុល្លារ ដល់កងទ័ពអ៊ុយក្រែន។ អត្ថបទច្បាប់ដើម្បីសេរីភាពអ៊ុយក្រែនត្រូវបានបោះឆ្នោតគាំទ្រដោយសភាអាមេរិក ប៉ុន្តែ ដើម្បីចូលជាធរមាន នៅពេលនេះ គេត្រូវរង់ចាំការចុះហត្ថលេខាយល់ព្រម ឬការបោះឆ្នោតវេតូប្រឆាំងពីលោកប្រធានាធិបតីអាមេរិក បារ៉ាក់ អូបាម៉ា។
សភាអាមេរិកបានដាក់គំនាបទៅលើលោកអូបាម៉ា ក្នុងវិបត្តិអ៊ុយក្រែន។ សភាអាមេរិកគាំទ្រឲ្យមានការផ្តល់ អាវុធដល់កងទ័ពអ៊ុយក្រែន ប៉ុន្តែ លោកអូបាម៉ានៅរារែក មិនទាន់ចង់ឲ្យអាមេរិកផ្តល់អាវុធដល់អ៊ុយក្រែន។ កាលពីថ្ងៃព្រហស្បតិ៍ តាមលោកប្រធានាធិបតីអាមេរិក បានពន្លយឲ្យដឹងរួចហើយថា លោកនឹងប្រឆាំងរាល់គំនិតចង់ដាក់ទណ្ឌកម្មសេដ្ឋកិច្ចទៅលើរុស្ស៊ី។ សម្រាប់ប្រធានាធិបតីអាមេរិក នយោបាយនាំមុខអឺរ៉ុប ដើម្បីដាក់ទណ្ឌកម្មសេដ្ឋកិច្ចទៅលើរុស្ស៊ី នឹងមិនផ្តល់ផលចំណេញដល់អាមេរិក។
នៅថ្ងៃនេះ ទីក្រុងម៉ូស្គូ តាមរយៈអនុរដ្ឋមន្រ្តីការបរទេស បានព្រមានទីក្រុងវ៉ាស៊ីនតោនដែលចង់ដាក់ទណ្ឌកម្មសេដ្ឋកិច្ចថ្មី ប្រឆាំងនឹងរុស្ស៊ី។ ច្បាស់ណាស់ថា គេនឹងមិននៅឈរឱបដៃ ទុកឲ្យអាមេរិកធ្វើអ្វីស្រេចនឹងចិត្តនោះទេ។ នេះបើតាមលោកSeigei Ryabkov ដែលបាននិយាយប្រាប់ទីភ្នាក់ងាររុស្ស៊ី នៅថ្ងៃអាទិត្យនេះ។
នៅថ្ងៃអាទិត្យនេះដែរ ប្រមុខការបរទេសអាមេរិក ត្រូវជួបពិភាក្សាជាមួយរដ្ឋមន្រ្តីការបរទេសរុស្ស៊ី នៅក្នុងទីក្រុងរ៉ូម ប្រទេសអ៊ីតាលី។ គេរំពឹងថា មន្រ្តីជាន់ខ្ពស់ទាំងពីរនឹងផ្តោតទៅលើវិបត្តិដើមបូព៌ា និងវិបត្តិអ៊ុយក្រែន ដែលភាគីអាមេរិកបានទាមទារឲ្យមានការគោរពបទឈប់បាញ់ដ៏ពិតប្រាកដមួយ។ ប៉ុន្តែ ការសម្រេចរបស់ព្រឹទ្ធសភាអាមេរិកដើម្បីដាក់ទណ្ឌកម្មសេដ្ឋកិច្ចបន្ថែមទៅលើរុស្ស៊ី កាលពីយប់ថ្ងៃសៅរ៍ នឹងជៀសមិនផុតពីត្រូវប្រមុខការទូតទាំងពីរលើកយកទៅជជែក ដោះស្រាយ នៅថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ