អាមេរិកបរាជ័យ មិនអាចបង្កើតទ័ពជើងគោកនៅស៊ីរី ដើម្បីប្រឆាំងនឹងក្រុមអង្គការរដ្ឋអ៊ីស្លាម
អ្នកនាំពាក្យ របស់សេតវិមានបានប្រកាស កាលពីថ្ងៃព្រហស្បតិ៍ទី ថា អាមេរិកត្រៀមខ្លួន ដើម្បីចូលតុពិភាក្សា ជាមួយរុស្ស៊ី នៅក្នុងវិបត្តិស៊ីរី។ ការប្រកាសរបស់អ្នកនាំពាក្យសេតវិមានធ្វើឡើង បន្ទាប់ពី កាលពីថ្ងៃពុធ រដ្ឋមន្រ្តីការបរទេសអាមេរិក លោកចន ឃេរី បាននិយាយប្រាប់អ្នកកាសែតថា ទីក្រុងម៉ូស្គូទើបបានលើកស្នើឲ្យមានការចរចាផ្នែកយោធា រុស្ស៊ី អាមេរិក ដែលកំពុងដឹកនាំប្រតិបត្តិការយោធា ប្រឆាំងនឹងក្រុមជីហាត រដ្ឋអ៊ីស្លាម នៅក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០៧:១៧
អ្នកនាំពាក្យរបស់សេតវិមានបាននិយាយកាលពីថ្ងៃព្រហស្បតិ៍ថា អាមេរិកត្រៀមនិយាយជាមួយរុស្ស៊ី ពីយុទ្ធសាស្រ្ត និងការអនុវត្តជាក់ស្តែង តាំងពីក្នុងប្រតិបត្តិការយោធា នៅស៊ីរី និងការប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម។
សេតវិមានបង្ហាញឲ្យឃើញជំហររបស់ខ្លួន បន្ទាប់ពី រដ្ឋមន្រ្តីការបរទេស អាមេរិកបានអះអាងថា ភាគីរុស្ស៊ី បានទូរស័ព្ទ មកលោក ដើម្បី ស្នើឲ្យមានជំនួបមន្រ្តីយោធាជាន់ខ្ពស់រវាងអាមេរិក និងរុស្ស៊ី។
នៅក្នុងរយៈពេល៤ឆ្នាំ សង្រ្គាមស៊ីវិល នៅស៊ីរី រុស្ស៊ី បានប្រើនយោបាយបោះយុថ្កា ពង្រឹងឥទ្ធិពលរបស់ខ្លួន ទាំងផ្នែកការទូត និងយោធា នៅដើមបូព៌ា ដោយចាប់ផ្តើមដំបូងជាមួយប្រទេសស៊ីរី។ រុស្ស៊ី ក្នុងលេសចូលរួមប្រយុទ្ធប្រឆាំងនឹងក្រុមជីហាតរដ្ឋអ៊ីស្លាមនៅស៊ីរី បានបញ្ជូនយន្តហោះយោធា ដែលតាមអាមេរិក គឺមានដឹកទាហានរុស្ស៊ី ទៅក្នុងទឹកដីស៊ីរី។ បន្ទាប់ពីបដិសេធជាច្រើនដង នៅទីបំផុត រុស្ស៊ីបានទទួលស្គាល់ថា ខ្លួនបានបញ្ជូនអាវុធ និងបន្ទាប់មក គឺទីប្រឹក្សាយោធារុស្ស៊ី ដើម្បីទៅជួយកងទ័ពស៊ីរី ក្នុងការវាយប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម។
អាមេរិករិះគន់មែន ការដាក់ទ័ពរុស្ស៊ី ក្នុងទឹកដីស៊ីរី ប៉ុន្តែ ជាមួយគ្នានេះ វត្តមានទ័ពរុស្ស៊ីក្នុងទឹកដីស៊ីរីក៏នឹងហុចប្រយោជន៍ច្រើនសម្រាប់អាមេរិកដែលដឹកនាំប្រតិបត្តិការវាយប្រហារជើងអាកាសទៅលើក្រុមជីហាត នៅស៊ីរីដែរ។
អាមេរិកដែលផ្តាច់ទំនាក់ទំនងយោធាជាមួយ រុស្ស៊ី តាំងពីវិបត្តិគ្រីមេ នៅអ៊ុយក្រែន នៅឆ្នាំ ២០១៤ ទំនងជានឹងអាចត្រលប់មកសហការវិញជាមួយរុស្ស៊ី ដែលជាមហាអំណាចយោធាមួយដែរក្នុងពិភពលោក និងដែលជាភាគី ដើរតួសំខាន់ នៅក្នុងវិបត្តិស៊ីរី។ ម្យ៉ាងក៏ដោយមកតែពីរុស្ស៊ីបានបោះដៃ ចង់ពិភាក្សា ពីយុទ្ធសាស្រ្តយោធាជាមួយអាមេរិកនោះ។
មានតែ ទាហាន៤ ឬ ៥នាក់ របស់ក្រុមប្រឆាំងស៊ីរីដែលបានទទួលការបណ្តុះបណ្តាលរបស់អាមេរិក និងដែលកំពុងប្រយុទ្ធប្រឆាំងនឹងក្រុមជីហាត
ជិតមួយឆ្នាំនេះ មកហើយ ដែលអាមេរិក និងសម្ព័ន្ធមិត្តអារ៉ាប់ បានបញ្ជូនយន្តហោះចម្បាំង ទៅវាយប្រហារលើទីតាំងក្រុមជីហាត អង្គការរដ្ឋអ៊ីស្លាម នៅស៊ីរី។ គេមិនឃើញក្រុមអង្គការរដ្ឋអ៊ីស្លាម ថមថយកម្លាំង។ ផ្ទុយទៅវិញ ក្រុមនេះ ដែលមានសំបូរទាំងអាវុធ និងធនធានមនុស្ស រឹតតែពង្រីកដែនដី គ្រប់គ្រងរបស់ខ្លួន មិនឈប់ ក្នុងទឹកដីស៊ីរី និងអ៊ីរ៉ាក់។
តាំងពីដើមមក អាមេរិកបានទទួលស្គាល់ថា គេមិនអាចប្រើតែយន្តហោះចម្បាំង ដើម្បី វាយកម្ចាត់ដោយជោគជ័យ លើក្រុមជីហាតនោះទេ។ គេត្រូវការចាំបាច់ទាហានជើងគោក។ ប៉ុន្តែ រដ្ឋាបាលលោកអូបាម៉ា ដែលបដិសេធ ដាច់អហង្កា មិនបញ្ជូនកងទ័ពជើងគោកអាមេរិកទៅ ធ្វើសង្រ្គាមក្នុងទឹកដីស៊ីរី និងអ៊ីរ៉ាក់ បានប្រើយុទ្ធសាស្រ្តបណ្តុះបណ្តាលក្រុមប្រឆាំងស៊ីរី ដែលកំពុងប្រយុទ្ធប្រឆាំងនឹងទាហានរដ្ឋាភិបាលស៊ីរីផងដែរ និងក្រុមជីហាតរដ្ឋអ៊ីស្លាមផង។ ព្រឹទ្ធសភាអាមេរិកបានបោះឆ្នោតកញ្ចប់ថវិកា ៥០០លានដុល្លារ សម្រាប់ បណ្តុះបណ្តាល និងបំពាក់ ក្រុមប្រឆាំងស៊ីរី ដែលជាផ្នែកមួយ នៃយុទ្ធសាស្រ្តអាមេរិក សម្រាប់ប្រយុទ្ធប្រឆាំងនឹងក្រុមអង្គការរដ្ឋអីស្លាម។ ប៉ុន្តែ នៅក្នុងសប្តាហ៍នេះ នៅក្នុងសវនការសួរដេញដោល នៅគណៈកម្មការព្រឹទ្ធសភា មេបញ្ជាការអាមេរិក លោកLloyd Austin និយាយថា រហូតមកដល់ពេលនេះ មានតែទាហានប្រឆាំងស៊ីរីប្រមាណ តែ ៤ ឬ ៥នាក់ប៉ុណ្ណោះ ដែលបានទទួលការបណ្តុះបណ្តាល និងកំពុងប្រយុទ្ធប្រឈមនឹងក្រុមជីហាត។ មេបញ្ជាការទ័ពអាមេរិក ទទួលស្គាល់ដែរថា ទាហានប្រឆាំងស៊ីរី ជាង ៥០នាក់ ដែលត្រូវបានបណ្តុះបណ្តាលរួចហើយ ទើប តែត្រូវបានក្រុមអាល់នូស្រា ដែលជាបណ្តាញរបស់អាល់កៃដា ចាប់ខ្លួន កាលពីខែកក្កដា កន្លងទៅ។
សម្រាប់លោកស្រី Christine Wormuth អនុរដ្ឋលេខាធិការក្រសួងការពារជាតិ វាមិនមែនជារឿងងាយស្រួលឡើយ ដែលគេជ្រើសរើស បញ្ចូល មនុស្សឲ្យធ្វើទាហានប្រយុទ្ធប្រឆាំងនឹងក្រុមជីហាតនោះ ព្រោះថា តាមច្បាប់អាមេរិក គេបណ្តុះបណ្តាលតែក្រុមប្រឆាំងស៊ីរី គឺមិនទាហានរដ្ឋាភិបាលស៊ីរីទេ។ ក្នុងចំណោមក្រុមប្រឆាំង ដំណើរការរើសមនុស្សឲ្យទទួលការបណ្តុះបណ្តាលទៀតសោត គឺត្រូវធ្វើឡើងយ៉ាងតឹងតែងបំផុត ព្រោះគេខ្លាចថា នឹងមានក្រុមដែលគាំទ្រក្រុមជីហាតបន្លំចូលមកទទួលការបណ្តុះបណ្តាល។ កន្លងមក គេចាប់បានកុមារដែលបន្លំអាយុ ឬ ប្រើអត្តសញ្ញាណក្លែងក្លាយ ដើម្បីអាចចូលក្នុងវគ្គបណ្តុះបណ្តាលយោធារបស់អាមេរិក។
បរាជ័យ របស់អាមេរិក ដើម្បីបង្កើតទ័ពប្រឆាំង នឹងក្រុមជីហាត លើដីគោក គឺអាចជាចលករមួយ រុញច្រានឲ្យអាមេរិកត្រូវការរុស្ស៊ី ដែលអាចប្រើទ័ពជើងគោក ក្នុងទឹកដីស៊ីរី។
រុស្ស៊ី និងអាមេរិកមានគោលដៅដូចគ្នាទេ នៅក្នុងសំណុំរឿងស៊ីរីនេះ….
អាមេរិក និងរុស្ស៊ី មានយុទ្ធសាស្រ្តយោធាដើរផ្ទុយស្រឡះគ្នា។ រុស្ស៊ី ដែលអះអាងថា ផ្តល់ជំនួយយោធា ទៅស៊ីរី ដើម្បី ប្រយុទ្ធប្រឆាំងនឹងក្រុមជីហាត ប៉ុន្តែ គាំទ្រ ផងដែរ ទ័ពរដ្ឋាភិបាលស៊ីរី ដែលតាមពិត កំពុងប្រើសព្វាវុធរុស្ស៊ី ដើម្បីវាយប្រហារទៅលើក្រុមប្រឆាំងស៊ីរី ដែលតាមពិត ជាក្រុមគាំទ្រ ដោយប្រទេសលោកខាងលិច និងសម្ព័ន្ធអារ៉ាប់។ សត្រូវរបស់អាមេរិក គឺក្រុមជីហាត នៃអង្គការរដ្ឋអ៊ីស្លាម។ ប៉ុន្តែ សម្រាប់អាមេរិក វាច្បាស់ណាស់ថា គេអាចយកឈ្នះ លើក្រុមអង្គការរដ្ឋអ៊ីស្លាម បាន បើសិនគេអាចស្រាយបញ្ចប់វិបត្តិនយោបាយ មានន័យថា រកសន្តិភាពឲ្យស៊ីរី។ រុស្ស៊ីវិញយល់ស្របជាមួយអាមេរិក ថា គឺមានតែការចរចាការទូត ដែលនឹងបញ្ចប់វិបត្តិនយោបាយនៅស៊ីរី។
រុស្ស៊ី ចង់ដើរតួសំខាន់ ចង់បង្ហាញគេឯងថា ខ្លួនអាចចូលរួមចំណែកបិទបញ្ចប់ជម្លោះ ទំនាស់ នៅស៊ីរី។ ប៉ុន្តែ មហាអំណាចរុស្ស៊ី គឺខ្លាំងតែយោធាទេ ប៉ុន្តែ មិនខ្លាំងនយោបាយការទូតនោះទេ។ ដរាបណារុស្ស៊ី នៅតែគាំទ្រលោកបាស្ហា អាល់អាសាដ ឲ្យរក្សាអំណាចនៅស៊ីរី តើរុស្ស៊ី នឹងអាចដឹកដៃក្រុមប្រឆាំងស៊ីរី ឲ្យចូលតុចរចាបានយ៉ាងម៉េច។ សម្រាប់ក្រុមប្រឆាំង គេមិនអាចចរចាសន្តិភាពជាមួយមេពេជ្ឈឃាត បាតដៃប្រលាក់ឈាម ប្រជាជនឯងដូចជាលោកបាស្ហាអាល់ អាសាដនោះ។ បើលោកអាសាដនៅតែស្ថិតក្នុងតុចរចា នោះក្រុមប្រឆាំងស៊ីរីនឹងនៅតែបន្តប្រយុទ្ធប្រឆាំង។ ដូច្នេះ គ្មានទេស្ថិរភាពនៅស៊ីរី។ អស្ថិភាព នយោបាយនៅស៊ីរី នឹងហុចផលចំណេញដល់ក្រុមភេរវនិយម ដែលមានតាំងពីអាល់កៃដា និងក្រុមអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ