អង្គការសហប្រជាជាតិជំរុញឲ្យមានការចរចាសន្តិភាពនៅស៊ីរី ចំណែករុស្ស៊ីផ្តល់អាទិភាពលើការប្រយុទ្ធប្រឆាំងក្រុមជីហាត
បេសកជនពិសេសរបស់អង្គការសហប្រជាជាតិបានធ្វើដំណើរ ទៅដល់ប្រទេសស៊ីរី កាលពីល្ងាចថ្ងៃព្រហស្បតិ៍។ ក្នុងទីក្រុងដាម៉ាស លោកស្តេហ្វង់ មីស្ទៀរ៉ា ប្រេសិតរបស់អង្គការសហប្រជាជាតិ មានបេសកកម្មពិសេស មួយ គឺបញ្ចុះបញ្ចូលភាគីរដ្ឋាភិបាលស៊ីរីឲ្យរកដំណោះស្រាយសន្តិភាព ដើម្បីបិទបញ្ចប់វិបត្តិ និងសង្រ្គាមស៊ីវិល ដែលបានហែកហួរ បំផ្លាញ ស៊ីរី សម្លាប់មនុស្សជាង ២សែននាក់ និងបណ្តាលឲ្យមានរលកជនភៀសខ្លួន ចូលទៅក្នុងទឹកដីអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
វត្តមានរបស់ប្រេសិតអង្គការសហប្រជាជាតិ នៅប្រទេសស៊ីរី កាលពីថ្ងៃព្រហស្បតិ៍ សំខាន់ជាងពេលណាៗទាំងអស់ ព្រោះវាធ្វើឡើង នៅក្នុងបរិបទមួយ ដែលអឺរ៉ុបកំពុងជួបវិបត្តិរលកជនភៀសខ្លួនស៊ីរី និងនៅក្នុងពេលដែលរុស្ស៊ីកំពុងបង្ហាញ ឲ្យឃើញកាន់តែច្បាស់ពីជំហរគាំទ្រគ្មានងាករេ ផ្នែកយោធា ដល់រដ្ឋាភិបាលស៊ីរី។
លោកប្រេសិតស្តេហ្វង់ មីស្ទៀរ៉ា ត្រូវដើរតួជាអាជ្ញាកណ្តាល។ ម្យ៉ាងលោកត្រូវបញ្ចុះបញ្ចូលរដ្ឋាភិបាលស៊ីរីរបស់លោកប្រធានាធិបតីបាស្ហា អាល់អាសាដ ឲ្យទទួលយកសំណើរបស់ប្រទេសលោកខាងលិច ដែលចង់ឲ្យមានការចរចារវាងភាគីជម្លោះ ដើម្បីនាំសន្តិភាពមកឲ្យស៊ីរី។ ចំនុចគន្លឹះដែលនឹងអាចទប់ស្កាត់រលកជនភៀសខ្លួន ដែលពេលនេះ កំពុងក្លាយជាវិបត្តិ ឈឺក្បាល របស់អឺរ៉ុប។ ដើម្បីចរចារកសន្តិភាពឲ្យបានឆាប់ៗ ដែលនឹងអាចបិទបញ្ចប់វិបត្តិជនភៀសខ្លួនស៊ីរី ប្រទេសលោកខាងលិច ត្រូវគេមើលឃើញថា កំពុងបន្ទន់ជំហរ សុខចិត្តធ្វើសម្បទាន ដែលនៅក្នុងនោះ គេនឹងយល់ព្រម ចាត់ទុកលោកបាស្ហា អាល់អាសាដ ជាភាគីចរចាមួយដែរ គឺលែងទាមទារដាច់ខាត ឲ្យលោកចុះចេញពីតំណែងប្រធានាធិបតីដូចមុនទៀតហើយ។
សំណើរបស់ប្រទេសលោកខាងលិចត្រូវពើបប្រទះនឹងជំហររបស់លោកប្រធានាធិបតីស៊ីរី និងរុស្ស៊ី ជាសម្ព័ន្ធមិត្ត ដែលចង់ផ្តល់អាទិភាពទៅលើការប្រយុទ្ធប្រឆាំងនឹងក្រុមជីហាត ជាជាង ការចរចាស្វែងរកសន្តិភាព។ សម្រាប់រដ្ឋាភិបាលក្រុងដាម៉ាស គាំទ្រដោយរដ្ឋាភិបាលរុស្ស៊ី ជនភៀសខ្លួនធ្វើដំណើរចេញទៅរកកន្លែងជ្រកកោននៅអឺរ៉ុប ដោយសារតែការសង្រ្គាមបង្កឡើងដោយក្រុម ជីហាត អង្គការរដ្ឋអ៊ីស្លាម។ កាលពីថ្ងៃព្រហស្បតិ៍ ប្រភពកងទ័ពស៊ីរី បាននិយាយជាថា កងទ័ពបានចាប់ផ្តើមប្រើប្រភេទអាវុធថ្មីដែលរុស្ស៊ី ទើបផ្តល់ឲ្យ។ នៅថ្ងៃព្រហស្បតិ៍ ដដែល អ្នកតាមដានសិទ្ធិមនុស្សនៅស៊ីរី បានរាយការណ៍ថា កងទ័ពស៊ីរី បានបញ្ជូនយន្តហោះ ចម្បាំង យ៉ាងតិច ១១ដង ទៅទម្លាក់គ្រាប់លើទីក្រុងរ៉ាកា ដែលជាទីតាំងរដ្ឋបាលសំខាន់របស់ក្រុមជីហាត អង្គការរដ្ឋអ៊ីស្លាម នៅក្នុងទឹកដីស៊ីរី។
តាមទីក្រុងវ៉ាស៊ីនតោនវិញ ជំនួយយោធារបស់រុស្ស៊ី សម្រាប់ស៊ីរី មិនមែនមានត្រឹមអាវុធ នោះទេ ព្រោះថា ចាប់តាំងពីដើមខែកញ្ញា អាមេរិកបានកត់សំគាល់ឃើញវត្តមានទាហានរុស្ស៊ី នៅក្នុងមូលដ្ឋានទ័ពអាកាស ស៊ីរី ដែលស្ថិតនៅក្បែរទីតាំងរបស់លោកបាស្ហា អាល់ អាសាដ។ ស្ងប់ស្ងាត់ រហូតមក រុស្ស៊ី នៅពេលនេះ ចាប់ផ្តើមបញ្ជាក់ការគាំទ្រយ៉ាងចេញមុខ ដល់ទីក្រុងដាម៉ាស។ តាមលោករដ្ឋមន្រ្តីការបរទេសអាមេរិក ចន ឃេរី ទីក្រុងម៉ូស្គូ នៅបានស្នើឲ្យមានការជួបគ្នា រវាងមន្រ្តីយោធា អាមេរិក និងរុស្ស៊ី ដើម្បី ពិភាក្សាពីជម្លោះនៅស៊ីរី ពោលគឺនិយាយឲ្យត្រូវ ដើម្បី ជៀសវាងកុំឲ្យមាន ឧប្បត្តិហេតុ ការប៉ះទង្គិចគ្នា នៅក្នុងសមរភូមិ ជាទី ដែលទាំងរុស្ស៊ី និងអាមេរិកកំពុងដឹកនាំការវាយប្រហារទៅលើក្រុមជីហាត រដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ