កិច្ចចរចាលើសន្ធិសញ្ញាគ្រប់គ្រងការជួញដូរសព្វាវុធត្រូវទទួលបរាជ័យ
ការចរចាក្នុងក្របខ័ណ្ឌអ.ស.ប. ដើម្បីបង្កើតសន្ធិសញ្ញាគ្រប់គ្រងការជួញដូរសព្វាវុធ បានបិទបញ្ចប់កាលពីយប់ថ្ងៃសុក្រ ដោយមិនមានកិច្ចព្រមព្រៀងអ្វីទាំងអស់។ អគ្គលេខាធិការអ.ស.ប.បានសម្តែងនូវការខកចិត្តចំពោះបរាជ័យនេះ។ ចំណែកអ្នកការទូត និងសកម្មជនសិទ្ធិមនុស្សមួយចំនួនបានទម្លាក់ការទទួលខុសត្រូវទៅលើសហរដ្ឋអាមេរិកថាជាអ្នកធ្វើឲ្យការចរចានេះត្រូវជាប់គាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កិច្ចចរចា ដែលបានបើកធ្វើ កាលពីបួនសប្តាហ៍មុន ហើយដែលអ.ស.ប.បានព្យាយាមត្រៀមរៀបចំអស់រយៈពេលជាច្រើនឆ្នាំ គឺធ្វើឡើងក្នុងគោលដៅបង្កើតបទដ្ឋានជាលក្ខណៈអន្តរជាតិ ដើម្បីគ្រប់គ្រងការនាំចេញនាំចូលគ្រឿងសព្វាវុធ បង្កើននូវតម្លាភាព និងការទទួលខុសត្រូវ ចៀសវាងកុំឲ្យគ្រឿងសព្វាវុធទាំងនេះត្រូវគេយកទៅប្រើប្រាស់ ក្នុងផ្លូវអាក្រក់ បង្កការខូចខាតដល់ជនស្លូតត្រង់។
ក៏ប៉ុន្តែ នៅទីបំផុត រយៈពេលកំណត់នៃការចរចាបានផុត នៅអធ្រាតថ្ងៃសុក្រ ដោយគ្មានទទួលបាននូវកិច្ចព្រមព្រៀងអ្វីទាំងអស់។
អ្នកការទូតលោកខាងលិច និងសកម្មជនសិទ្ធិមនុស្សមួយចំនួនមកពីអង្គការ Amnesty International និង អង្គការ Oxfam America បានទម្លាក់កំហុសទៅលើសហរដ្ឋអាមេរិកថាជាដើមហេតុដែលនាំឲ្យការចរចានេះត្រូវទទួលបរាជ័យ។ អ្នកការទូតម្នាក់ ដែលសុំមិនបញ្ចេញឈ្មោះ បានប្រាប់ទីភ្នាក់ងារសារព័ត៌មានបារាំង AFP ថា អាមេរិកបានបដិសេធមិនព្រមចុះហត្ថលេខាលើសេចក្តីព្រាងសន្ធិសញ្ញា ដោយសុំទុកពេលចរចាបន្ថែមទៀត។ ឃើញបែបនេះប្រទេសផ្សេងទៀត រួមមាន ចិន និងរុស្ស៊ី ជាដើម ក៏បានបដិសេធមិនព្រមចុះហត្ថលេខាដូចអាមេរិកដែរ។
នៅទីបំផុត មានតែប្រទេសចំនួន ៩០ប៉ុណ្ណោះ ដែលបានចុះហត្ថលេខាលើសេចក្តីព្រាងសន្ធិសញ្ញាស្នើឡើងដោយអ.ស.ប. ក្នុងនោះ រួមមានប្រទេសមកពីសហភាពអឺរ៉ុប អាមេរិកឡាទីន និងអាហ្វ្រិក។ ដើម្បីអាចបង្កើតសន្ធិសញ្ញានេះបានគេត្រូវការកុងសង់ស៊ូសពីប្រទេសទាំង ១៩៣ ដែលជាសមាជិកអ.ស.ប.។
គេមើលឃើញថា ការដែលរដ្ឋាភិបាលអាមេរិកមិនព្រមចុះហត្ថលេខាលើសន្ធិសញ្ញាគ្រប់គ្រងការជួញដូរគ្រឿងសព្វាវុធនេះ គឺដោយសារតែបារម្ភខ្លាចសភាមិនព្រមផ្តល់សច្ចាប័នលើសន្ធិសញ្ញានេះ។ សមាជិកព្រឹទ្ធសភាអាមេរិកចំនួន ៥១រូប ក្នុងចំណោម ១០០រូប បានសរសេរលិខិតទៅលោកអូបាម៉ា និងលោកស្រីគ្លីនតុន ទាមទារកុំឲ្យចុះហត្ថលេខាលើសន្ធិសញ្ញានេះ។ សមាជិកសភាអាមេរិកទាំងនេះបានលើកឡើងថា សន្ធិសញ្ញានេះអាចនឹងធ្វើឲ្យប៉ះពាល់ដល់សិទ្ធិរបស់ពលរដ្ឋអាមេរិក ក្នុងការកាន់អាវុធ ដែលជាសិទ្ធិមានចែងក្នុងរដ្ឋធម្មនុញ្ញ។
ក៏ប៉ុន្តែ សកម្មជនសិទ្ធិមនុស្សបានអះអាងថា នៅក្នុងសេចក្តីព្រាងសន្ធិសញ្ញា ដែលស្នើឡើងដោយអ.ស.ប. បានចែងយ៉ាងច្បាស់ថា សន្ធិសញ្ញានេះមានគោលដៅគ្រប់គ្រងតែចំពោះការជួញដូរសព្វាវុធជាលក្ខណៈអន្តរជាតិប៉ុណ្ណោះ មិនពាក់ព័ន្ធនឹងការជួញដូរក្នុងប្រទេសនោះទេ។ ដូច្នេះ វាមិនមានអ្វីត្រូវប៉ះពាល់ដល់សិទ្ធិរបស់ពលរដ្ឋអាមេរិកនោះទេ។ សកម្មជនសិទ្ធិមនុស្សទាំងនេះបានស្តីបន្ទោសលោកអូបាម៉ាថា ខ្វះសេចក្តីក្លាហាន និងសុឆន្ទៈនយោបាយ ដែលបណ្តាលឲ្យសន្ធិសញ្ញាគ្រប់គ្រងការជួញដូរគ្រឿងសព្វាវុធនេះត្រូវជាប់គាំង ហើយបរាជ័យនេះនឹងធ្វើឲ្យជនស្លូតត្រង់រាប់ពាន់ រាប់ម៉ឺន ត្រូវបន្តបាត់បង់ជីវិត ក្នុងមួយឆ្នាំៗ ដោយសារអំពើហិង្សាប្រដាប់អាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ