រដ្ឋាភិបាលថៃ តាមប្រមាញ់អ្នកដែលបានចែកចាយ អត្ថបទកាសែតរិះគន់មហាក្សត្រថ្មី
ស្ត្រីសកម្មជនប្រជាធិបតេយ្យថៃម្នាក់ បានរត់គេចខ្លួន ចេញពីប្រទេសថៃ បន្ទាប់ពីនាងទទួលដំណឹងថា អាជ្ញាធរថៃ កំពុងតែដេញតាមប្រមាញ់អ្នកណា ដែលបានចែករំលែកអត្ថបទ សរសេររៀបរាប់ពីបុគ្គលិកលក្ខណៈរបស់មហាក្សត្រថៃថ្មី។ អត្ថបទដែល ត្រូវបានគេចុះផ្សាយ នៅលើគេហទំព័រ BBC ជាភាសាថៃ នឹងនៅតាមគេទំព័របណ្តាញព័ត៌មានអន្តរជាតិមួយចំនួន នេះ កំពុងត្រូវបានរដ្ឋាភិបាលថៃ ហាមឃាត់ និងប្រើគ្រប់មធ្យោបាយ រារាំង មិនឲ្យប្រជាជនថៃ បានឃើញ និងអានខ្លឹមសារ នៃអត្ថបទនេះទេ។
ចុះផ្សាយនៅថ្ងៃ៖
ស្តាប់ - ០២:៣៣
នាង ឆានុកកន រួមសាប អាយុ២៤ឆ្នាំ គឺជាសកម្មជនប្រជាធិបតេយ្យថៃ មួយរូប ដែលមានសេចក្តីក្លាហាន ហ៊ានរិះគន់អំពីចំណុចអវិជ្ជមានរបស់រដ្ឋាភិបាល និងស្ថាប័នព្រះមហាក្សត្រថៃ។ នៅថ្ងៃចន្ទ ទី២៩មករា នាងបានថ្លែងប្រាប់អ្នកយកព័ត៌មានបារាំង តាមទូរស័ព្ទថា នាងបានរត់ចេញពីប្រទេសថៃ ២សប្តាហ៍មកហើយ ហើយបច្ចុប្បន្នកំពុងស្នាក់នៅបណ្តោះអាសន្ន ក្នុងប្រទេសមួយនៅក្នុងតំបន់អាស៊ី។
នាងបានអះអាងថា នៅពេលដែលនាងទទួលបានសិទ្ធិជ្រកកោននយោបាយ ក្នុងប្រទេសនោះ នាងនឹងបន្តធ្វើសកម្មភាព បរិហារ រិះគន់ អំពីអំពើរំលោភបំពានសិទ្ធិ លទ្ធិប្រជាធិបតេយ្យ និងចំណុចអវិជ្ជមានរបស់រដ្ឋាភិបាកយោធាថៃ។ នាងបន្តថា នាងបានរត់គេចចេញពីប្រទេសថៃ ដោយសារនាងមិនចង់ជាប់ឃុំដោយសារតែរឿងនាង បានចែករំលែកបន្ត នូវអត្ថបទសរសេរជាភាសាថៃមួយ ផ្សាយដោយបណ្តាញព័ត៌មានBBC។ អត្ថបទនោះ សរសេររៀបរាប់ អំពីបុគ្គលិកលក្ខណៈដ៏មិនគួរឲ្យគោរព របស់មហាក្សត្រថ្មីគឺព្រះចៅ ម៉ាហា វិជ្ជរ៉ាឡុងកន។
សូមបញ្ជាក់ថា ក្នុងរយៈ២សប្តាហ៍កន្លងមក អត្ថបទសរសេរពីព្រះចៅ ម៉ាហា វិជ្ជរ៉ាឡុងកន មហាក្សត្រថ្មីរបស់ថៃនេះ ត្រូវបានមនុស្សរាប់ពាន់នាក់ ចែកចាយបន្តគ្នា នៅតាមបណ្តាញសង្គម។ រហូតមកត្រឹមពេលនេះ អាជ្ញាធរថៃ បានធ្វើការចាប់ឃាត់ខ្លួន និស្សិតម្នាក់ភេទប្រុស ហើយបានបញ្ជូនទៅតុលាការ ដែលបានសម្រេចផ្តន្ទាទោស ឲ្យជាប់ពន្ធនាគារ២ឆ្នាំ ពីបទប្រមាថព្រះចេស្តារបស់ព្រះមហាក្សត្រ។ យ៉ាងណាមិញ សូម្បីតែខ្លឹមសារ សរសេរដែលតុលាការ ចាត់ទុកថាជាការប្រមាថព្រះមហាក្សត្រនេះ ក៏អ្នកកាសែត នាៗមិនអាចស្រង់យកមកផ្សាយបានទេ ព្រោះពុំនោះទេ ប្រាកដជាទាប់ទោសពីបទប្រមាថព្រះមហាក្សត្រដែរ។
ដោយឡែក លោក វិប៊ុន ធិនវឌ្ឍនៈគុន តំណាងស្នងការដ្ឋានតំរួតថៃ បានអះអាងថា សមត្ថកិច្ចថៃ ពិតជាកំពុងតាមចាប់មនុស្សមួយចំនួន ពិតមែន។ ហើយក្នុងចំណោមនោះ បណ្តឹងមួយ ត្រូវបានរដ្ឋាភិបាលបញ្ជូនទៅតុលាការហើយ ដោយប្តឹងស្ត្រី ឈ្មោះឆានុកកន រូមសាប ពីបទមើលងាយព្រះចេស្តាមហាក្សត្រថៃ។
គួរកត់សម្គាល់ថា ថៃជាប្រទេសរាជានិយម ដែលមានច្បាប់ការពារព្រះមហាក្សត្រ ដ៏តឹងតែងបំផុត។ ទំនោររាជានិយមជ្រុលហួសហេតុនេះ កាន់តែឡើងខ្លាំង ចាប់តាំងពីក្រុមយោធាថៃ បានធ្វើរដ្ឋប្រហារឡើងកាន់អំណាច ក្នុងឆ្នាំ២០១៤។ បុគ្គលិកលក្ខណៈ និងរឿងរ៉ាវផ្ទាល់ខ្លួន របស់មហាក្សត្រថ្មីថៃ គឺជារឿងមួយដែលគេបិទខ្ទប់ ហើយដែលប្រជាជនសាមញ្ញ គ្មានសិទ្ធិដឹងឮ ឬអាចបញ្ចេញយោបល់បានឡើយ។ ផ្ទុយទៅវិញ មានកាសែតបរទេសព្រោតព្រាត បានចុះផ្សាយយ៉ាងសុះសាយ អំពីអត្តចរិកយូកូង បែបពាល អាងយ៉ាង អាងឋានៈ និងមាសប្រាក់ របស់ព្រះចៅ ម៉ាហា វិជ្ជរ៉ាឡុងកន ដែលអត្តចរិកបែបនេះ មិនសក្តិសម ឲ្យប្រជារាស្ត្រថៃមួយនគរ ឱនក្បាលក្រាប់ដល់ដី ថ្វាយបង្គំនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ