តំបន់អាស៊ីអាគ្នេយ៍ជាបេះដូងយុទ្ធសាស្ត្របារាំង នៅអាស៊ី
ថ្នាក់ដឹកនាំបារាំងបង្កើនទស្សនកិច្ចកាន់ច្រើនឡើងៗ ក្នុងតំបន់អាស៊ី។ បន្ទាប់ពីនាយករដ្ឋមន្ត្រី លើកនេះដល់វេនរដ្ឋមន្ត្រីក្រសួងការបរទេសបារាំងម្តង។ ថ្ងៃម្សិលមិញ លោក ឡូរ៉ង់ ហ្វាប្យ៊ូស (Laurent Fabius) ស្នាក់នៅប្រទេសឥណ្ឌូនេស៊ី នឹងត្រូវទៅប្រទេសវៀតណាម នៅថ្ងៃសៅរ៍នេះ។ លោកប្រមុខការទូតបារាំង បានប្រកាសពង្រឹងវត្តមានបារាំង នៅតំបន់អាស៊ីអាគ្នេយ៍នេះ តំបន់យុទ្ធសាស្ត្រ ដែលកំពុងរីកលូតលាស់ខ្លាំង ប៉ុន្តែត្រូវគេមើលរំលង ព្រោះតែបាំងដោយស្រមោលមហាយក្សចិន និងឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
បារាំងត្រូវតែមានវត្តមាន ដូចគ្នានឹងអាមេរិក នៅក្នុងតំបន់អាស៊ីប៉ាស៊ីហ្វិក ! នេះជាប្រសាសន៍របស់លោកប្រមុខការទូតបារាំង Laurent Fabius ក្នុងឱកាសបំពេញទស្សនកិច្ចមួយជុំខ្លី នៅប្រទេសឥណ្ឌូនេស៊ី និងវៀតណាម។ សម្រាប់លោករដ្ឋមន្ត្រីការបរទេស ពិភពលោកនាពេលអនាគត ត្រូវមកផ្តុំនៅតំបន់អាស៊ីអាគ្នេយ៍នេះហើយ ! បារាំងមានទាំងចេតនា និងទាំងសកម្មភាពជាក់ស្តែង ៖ លោកប្រធានាធិបតីបារាំង បានធ្វើដំណើរមកកាន់តំបន់នេះដល់៤ដង គិតចាប់ពីបានទទួលតំណែងនៅខែឧសភា២០១២មក។ ឯលោកនាយករដ្ឋមន្ត្រីវិញ ក៏ទើបបញ្ចប់ទស្សនកិច្ចនៅម៉ាឡេស៊ីដែរ។
អាស៊ី ដែលជាតំបន់អាទិភាពរបស់រដ្ឋាភិបាលបារាំងថ្មី មិនមែនសំដៅតែលើប្រទេសចិន ឬឥណ្ឌា ដូចធ្លាប់គិតក្នុងអតីតកាលឡើយ គឺជាតំបន់អាស៊ីទាំងមូល ! នេះជាការគូសបញ្ជាក់បន្ថែមរបស់លោក Laurent Fabius ដែលជាសមាជិករដ្ឋាភិបាលបារាំងដំបូងគេបង្អស់ មកទស្សនាទីស្នាក់ការសមាគមប្រជាជាតិអាស៊ីអាគ្នេយ៍ ឬអាស៊ាន។ អាស៊ាន ដែលមានប្រជាជនសរុបជាង៦០០លាននាក់ មានសកម្មភាពសេដ្ឋកិច្ចរស់រវើកគួរឱ្យកត់សម្គាល់ និងមានការនាំចេញមកបារាំង ក្នុងទំហំប្រហាក់ប្រហែលនឹងការនាំចេញទៅចិនដែរ។ ប៉ុន្តែនៅមានសក្តានុពលសេដ្ឋកិច្ចខ្លាំងទៀត ព្រោះទំនាក់ទំនងបារាំងនិងប្រទេសជាសមាជិក ពិសេសឥណ្ឌូនេស៊ី មិនទាន់ឈានដល់កំរិតកំពូលផង។
បន្ទាប់ពីជួបពិភាក្សាជាមួយអគ្គលេខាធិការសមាគមអាស៊ាន និងអនុប្រធានាធិបតីឥណ្ឌូនេស៊ី នៅទីក្រុងហ្សាការតាម្សិលមិញមក លោកឡូរ៉ង់ ហ្វាប្យ៊ូស ត្រូវអញ្ជើញដល់ វៀតណាមនៅថ្ងៃសៅរ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ