នៅក្រោមសម្ពាធរបស់ចិន អេស្ប៉ាញធ្វើច្បាប់រឹតបន្តឹងអំណាចតុលាការសកល
កាលពីថ្ងៃព្រហស្បតិ៍ ទី ២៧ កុម្ភៈ សភាអេស្ប៉ាញបានបោះឆ្នោតអនុម័ត ច្បាប់ថ្មីមួយ ដើម្បីកាត់បន្ថយអំណាចរបស់ចៅក្រម ក្នុងការស៊ើបអង្កេតសំណុំរឿងដែលកើតឡើង នៅបរទេស និងជំនុំជម្រះជនបរទេស ដែលជាប់ចោទពីបទឧក្រិដ្ឋកម្មអន្តរជាតិ។ គណបក្សប្រឆាំងបានរិះគន់ និងបរិហារថា គណបក្សកាន់អំណាចបោះបង់ចោលសិទ្ធិអំណាចរបស់ខ្លួន ដើម្បីចាប់យកប្រយោជន៍សេដ្ឋកិច្ច និងនយោបាយការទូត។
ចុះផ្សាយនៅថ្ងៃ៖
ស្តាប់ - ០២:០៦
សម្ពាធរបស់ចិនពិតជាមានប្រសិទ្ធិភាព។ នៅពីរសប្តាហ៍ក្រោយទីក្រុងប៉េកាំងបានបញ្ចេញជំហរមិនសប្បាយចិត្តនឹងការសម្រេចរបស់តុលាការអេស្ប៉ាញ សភាអេស្ប៉ាញដែលដឹកនាំដោយគណបក្សកាន់អំណាចបានសម្រេចបោះឆ្នោត នៅថ្ងៃម្សិលមិញ ដើម្បីរឹតបន្តឹងទៅលើប្រព័ន្ធតុលាការសកល របស់អេស្ប៉ាញ។
សូមរំលឹកថា កាលពីថ្ងៃទី ១០កុម្ភៈ ចៅក្រមអេស្ប៉ាញបានចេញដីកាចាប់ខ្លួន អតីតមេដឹកនាំចិនចំនួន៥នាក់ ដែលក្នុងនោះ មានលោកចាង ហ្សេមីន អតីតប្រធានាធិបតីចិន ពីបទប្រល័យពូជសាសន៍ នៅទីបេ ពីឆ្នាំ១៩៨០ ដល់ឆ្នាំ ១៩៩០។ ប៉ុន្តែ នៅមួយថ្ងៃក្រោយមក រដ្ឋាភិបាលចិន បានបញ្ចេញប្រតិកម្មមិនសប្បាយចិត្ត និងស្នើសុំឲ្យរដ្ឋាភិបាលអេស្ប៉ាញចាត់ការឲ្យបានសមរម្យ ចំពោះសំណុំរឿងនេះ។ ចិនដែលជាដៃគូសេដ្ឋកិច្ចដ៏សំខាន់របស់អេស្ប៉ាញបានវាយតម្លៃថា ចំណាត់ការរបស់ចៅក្រមអេស្ប៉ាញអាចប៉ះពាល់ដល់ទំនាក់ទំនងដ៏ល្អរវាងប្រទេសចិន និងអេស្ប៉ាញ។
តាមគោលការណ៍ “យុត្តាធិការសកល” ដែលមានចែងក្នុងច្បាប់អេស្ប៉ាញ តុលាការអេស្ប៉ាញមានសមត្ថកិច្ចស៊ើបអង្កេត និងជំនុំជម្រះ ទៅលើរាល់បទឧក្រិដ្ឋធំៗមួយចំនួន ដូចជាបទប្រល័យពូជសាសន៍ ជាដើម បើទោះបីជាបទល្មើសនេះត្រូវបានប្រព្រឹត្ត នៅក្រៅទឹកដីអេស្ប៉ាញ ហើយទាំងជនរងគ្រោះ និងជនសង្ស័យ មិនមែនជាពលរដ្ឋអេស្ប៉ាញក៏ដោយ។
ប៉ុន្តែ អត្ថបទច្បាប់ថ្មី ដែលមានតែសមាជិកសភារបស់គណបក្សកាន់អំណាចបោះឆ្នោតគាំទ្រ កាលពីថ្ងៃព្រហស្បតិ៍ បានបង្រួមអំណាចរបស់យុត្តាធិការសកល ដោយបានចែងកាត់បន្ថយចំនួនមនុស្ស និងលក្ខខណ្ឌចំាបាច់ មួយចំនួន ដែលធ្លាប់ជួយឲ្យចៅក្រមអេស្ប៉ាញអាចបើកការស៊ើបអង្កេតលើករណីប្រល័យពូជសាសន៍ ឬបទឧក្រិដ្ឋប្រឆាំងមនុស្សជាតិ ដែលកើតឡើង នៅបរទេស។
គណបក្សប្រឆាំង និងអង្គការការពារសិទ្ធិមនុស្សបានរិះគន់ និងចោទប្រកាន់បក្សស្តាំនិយម បក្សកាន់អំណាចថា កំពុងលះបង់ចោលសិទ្ធិអំណាចរបស់ខ្លួន ដើម្បីចាប់យកប្រយោជន៍សេដ្ឋកិច្ច។ គណបក្សកាន់អំណាចវិញបានការពារជំហររបស់ខ្លួន ដោយពន្យល់ថា សំណុំរឿងប្តឹងផ្តល់ នៅក្នុងក្របខ័ណ្ឌ ដែនយុត្តាធិការសកល កម្រនឹងចេញជារូបរាង។ ដោយប្រើយុត្តាធិការសកល អេស្ប៉ាញកំពុងបើកការស៊ើបអង្កេតចំនួន១២ ប្រឆាំងនឹងអ្នកប្រព្រឹត្តបទល្មើសនៅក្រៅអេស្ប៉ាញ ដូចជាមេដឹកនាំផ្តាច់ការនៅអាមេរិកឡាទីន ឬអ្នកទទួលខុសត្រូវជាន់ខ្ពស់របស់ទាហានអាមេរិក នៅអ៊ីរ៉ាក់។ ប៉ុន្តែ រហូតមក ការស៊ើបអង្កេតមិនបានឈានទៅដល់ការចាប់ខ្លួនជនល្មើសយកមកជំនុំជម្រះទេ។
ដូច្នេះ ជាមួយនឹងច្បាប់ថ្មីនេះ បក្សកាន់អំណាច ចង់ឲ្យគេស៊ើបអង្កេតតែទៅលើករណីណាដែលអាចជំនុំជម្រះបានតែប៉ុណ្ណោះ។ ពោលគឺ តុលាការអេស្ប៉ាញអាចចាត់ការតែលើសំណុំរឿងណា ដែលមានប្រជាជន មានសញ្ជាតិ អេស្ប៉ាញពាក់ព័ន្ធ ឬជាអ្នកប្រព្រឹត្តបទល្មើស ហើយបទឧក្រិដ្ឋប្រឆាំងមនុស្សជាតិទៀតសោត ត្រូវកើតឡើង នៅលើទឹកដីអេស្ប៉ាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ