ជំនួបកំពូលចិន-អាហ្វ្រិកក្នុងបរិបទនៃកំណើនសេដ្ឋកិច្ចចិនបន្ថយល្បឿន
ជំនួបកំពូលស្តីពីកិច្ចសហប្រតិបត្តិការចិនអាហ្វ្រិក រយៈពេលពីរថ្ងៃ បានចាប់បើកទ្វារនៅថ្ងៃនេះនិងរហូតដល់ថ្ងៃស្អែក។ ផ្តួចផ្តើមនិងរៀបចំដោយប៉េកាំង តែបាននិងកំពុងប្រព្រឹត្តទៅនៅក្រុងចូនណាស្បួ ប្រទេសអាហ្វ្រិកខាងត្បូង។ អ្នកវិភាគខ្លះយល់ថា នេះសារសន្យារបស់ចិនចំពោះអាហ្វ្រិក ដែលរំពឹងយ៉ាងស្លាប់រស់លើចិន។ លោក ស៊ីជិនពីង ប្រធានាធិបតីចិននឹងត្រូវប្រកាសចុះហត្ថលេខាលើកិច្ចព្រមព្រៀងពាណិជ្ជកម្មមួយចំនួនធំ បើទោះបីជាកំណើនសេដ្ឋកិច្ចថយចុះ ការវិនិយោគបានបន្ថយល្បឿនយ៉ាងខ្លាំងក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៥
ចិនគឺជាដៃគូពាណិជ្ជកម្មទីមួយរបស់អាហ្វ្រិក (វ៉ាឈ្នះអាមេរិកតាំងពីឆ្នាំ២០០៩មក) ដោយមានការផ្តោះប្តូរពាណិជ្ជកម្មទំហំជាង ២០០ពាន់លានអឺរ៉ូ ក្នុងមួយឆ្នាំ មានពលករធ្វើការនៅលើទ្វីបអាហ្វ្រិក ជាងមួយលាននាក់ និងមានក្រុមហ៊ុនដល់ទៅជាង២០០០តាំងទីនៅទីនោះ។ ប៉ុន្តែ ការផ្តោះប្តូរពាណិជ្ជកម្មមានលក្ខណៈផុយស្រួយ ! អនាគតចិន-អាហ្វ្រិកហាក់ដូចជាចុះស្រអាប់ ! កំណើនសេដ្ឋកិច្ចចិនបន្ថយល្បឿនបានធ្វើឱ្យវិនិយោគចិននៅអាហ្វ្រិក ធ្លាក់ចុះអស់ ៤០% គិតក្នុងរយៈពេលមួយឆមាសដំបូងឆ្នាំ ២០១៥ ដែលការនេះ បានគំរាមកំហែងយ៉ាងខ្លាំងរដ្ឋអាហ្វ្រិកមួយភាគធំ។ ប្រទេសដែលរស់រំពឹងស្ទើរតែទាំងស្រុងលើចិន លើការនាំចេញវត្ថុធាតុដើមលក់ទៅឱ្យចិន។ កំណើតសេដ្ឋកិច្ចអាហ្វ្រិកបានធ្លាក់ចុះជាទូទៅ មកត្រឹមតែ១,៧%។
ហេតុដូច្នេះហើយបានជាជំនួបកំពូលនេះ ត្រូវមានអត្ថន័យជាពិសេស ! នៅថ្ងៃនេះលោក ស៊ី ជីនពីង បានធ្វើជាអធិបតីបើកជំនួបកំពូលចិន-អាហ្វ្រិក ដែលក្នុងរបៀបវារៈ ត្រូវជជែកពិភាក្សា មើលអនាគតនៃការវិនិយោគរបស់ចិននៅអាហ្វ្រិក ដែលធ្លាប់ល្អូកល្អើនតាំងពីដើមសតវត្ស ប្រមូលទិញវត្ថុធាតុដើម ដូចជា ប្រេង រ៉ែដែក ទង់ដែង រហូតធ្វើឱ្យវត្ថុទាំងនេះឡើងថ្លៃយ៉ាងខ្លាំង។ កិច្ចសហប្រតិបត្តិការដ៏ផ្អែមល្អែម ចិន-អាហ្វ្រិកនឹងត្រូវបានរក្សា។ ចិនបន្តជួយអភិវឌ្ឍន៍អាហ្វ្រិក ព្រោះចិន មិនមែនមានត្រឹមតែសមត្ថភាពទេ តែមានទាំងឆន្ទៈនយោបាយ គាំទ្រនិងស្រោចស្រង់ការអភិវឌ្ឍន៍អាហ្វ្រិកដោយឯករាជ្យនិងនិរន្តរភាព។ ជំនួបរៀបចំដោយផ្ទាល់លើទឹកដីអាហ្វ្រិក ពិតជាមិនមែនជម្រើសដោយចៃដន្យឡើយ។
គ្រោះនៃការរំពឹងខ្លាំងលើចិន
ចិនកណ្តាស តែអ្នកគ្រុន គឺអាហ្វ្រិក ! គ្រាន់តែកំណើនសេដ្ឋកិច្ចចិនធ្លាក់ក្រោម៧% នៅត្រីមាសទីបីនេះ ភ្លាម ទ្វីបអាហ្វ្រិកសៀវស្រាញ សេដ្ឋកិច្ចបាត់ទៅហើយ។
នេះជាការធម្មតាទេ ចិនគឺជាអតិថិជនដ៏ធំរបស់អាហ្វ្រិក ! បើចិនបន្ថយការចាយវាយ ទិញដូររបស់របរតែបន្តិច អាហ្វ្រិកត្រូវរងផល់ប៉ះពាល់ដោយផ្ទាល់ភ្លាម ព្រោះពួកគេរំពឹងលើចិនខ្លាំងពេក។
ជាតួលេខ ផ្តល់ដោយក្រសួងពាណិជ្ជកម្ម ការនាំចូលចិនមកពីទ្វីបអាហ្វ្រិកបានធ្លាក់ចុះជិត៤៣% នៅរវាងពីខែមករា ដល់ខែមិថុនា ២០១៥។ ការធ្លាក់ចុះនេះបានរុញច្រានការវិនិយោគចិននៅទ្វីបអាហ្វ្រិកឱ្យធ្លាក់ចុះ៤០%ដែរ ព្រោះប្រទេសអាហ្វ្រិកគ្មានឥទ្ធិពលលើតម្លៃវត្ថុធាតុដើម នៅលើទីផ្សារអន្តរជាតិទេ។
ប្រទេសដែលរងគ្រោះខ្លាំងជាងគេ គឺក្រុមប្រទេសអ្នកនាំចេញរ៉ែផ្លាទីន ទង់ដែង រ៉ែដែក ប្រេងឆៅ ដូចជាហ្សំប៊ី (-៦០%) សាធារណរដ្ឋកុងហ្កោ នីហ្សេរីយ៉ា និងលីបេរីយ៉ា ល។ និង។ល។
ពង្រីកភាពចម្រុះនៃសេដ្ឋកិច្ច
មិនមែនមកពីតម្លៃវត្ថុធាតុដើមចុះថ្លៃ ឬមកពីទំនាក់ទំនងជាមួយចិន ចិនដើរខ្សែលើខ្លាំងពេកនោះទេ តែមកពីរចនាសម្ព័ន្ធអាហ្វ្រិក ! នេះបើតាមអ្នកវិភាគយុទ្ធសាស្ត្រអភិវឌ្ឍន៍អាហ្វ្រិក ជាតិកូដឌីវ័រ ដែលទាមទារឱ្យអាហ្វ្រិកសើរើរចនាសម្ព័ន្ធសេដ្ឋកិច្ចឡើងវិញ។ និងកុំរំពឹងទាំងភ្នែនលើការនាំចេញ ទៅចិន។ ជាមួយចិន ថ្វីបើចិនជាអតិថិជនដ៏ចំបង ទិញវត្ថុធាតុដើម រ៉ែដែក រ៉ែទង់ដែង ដែកថែប ម៉ង់កាណែស .... ដល់ទៅ ជិតពាក់កណ្តាលមែន ប៉ុន្តែ ក្រុមហ៊ុនចិន ត្រួតត្រាធនធានរ៉ែតែប្រមាណ២%ប៉ុណ្ណោះ ទល់នឹង២៥%ជារបស់ក្រុមហ៊ុនអង់គ្លេស។ ពេលចិន លូតលាស់ខ្លាំងនារយៈពេលប៉ុន្មានទសវត្សចុងក្រោយនេះ អាហ្វ្រិកគ្មានបានឆ្លៀតយកចំណេញអ្វីបានពីចិនទេ ឆ្កឹះរ៉ែបាននាំចេញបាត់ទៅលក់ឱ្យចិន ... បានវត្ថុធាតុដើមចិនផលិតជារបស់របរលក់ថោកៗមកឱ្យអាហ្វ្រិក តែគ្មានឥទ្ធិពលផ្ទាល់លើឧស្សាហកម្មនៅលើទ្វីបសោះ។
ដូច្នេះ ក្នុងពេលចិនកំពុងបន្ថយល្បឿនសេដ្ឋកិច្ច អាហ្វ្រិកត្រូវតែសើរើមើលទំនាក់ទំនងពាណិជ្ជកម្មចិន-អាហ្វ្រិកឡើងវិញ កុំរំពឹងខ្លាំងតែលើការនាំចេញវត្ថុធាតុដើមជាមួយចិនពេក ត្រូវមានការវិនិយោគលើវិស័យផ្សេងទៀត ជាសេដ្ឋកិច្ចចម្រុះច្រើនបែប។ នីហ្សេរីយ៉ា សង្ឃឹមថានឹងស្នើសុំបានជំនួយហិរញ្ញវត្ថុពីចិន ក្នុងជំនួបនេះ ដើម្បីទៅអភិវឌ្ឍន៍សេដ្ឋកិច្ចកុំឱ្យផ្អែកតែលើការនាំប្រេងតែមួយមុខ។ ចំណែកខាងចិនក៏ចង់ចាប់អារម្មន៍នឹងភាពចម្រុះនៃសេដ្ឋកិច្ចអាហ្វ្រិកដែរ។
នៅថ្ងៃនេះលោក ស៊ី ជីនពីងបានប្រកាសបង្ហាញគម្រោងអភិវឌ្ឍន៍ ១០ចំណុច តម្លៃ៦០ពាន់លានដុល្លារ ដល់សមភាគីអាហ្វ្រិក មកពីប្រមាណជាង៤០ប្រទេស។ កាលពីថ្ងៃពុធ ជាឧទារហ៍ជាក់ស្តែងមួយទៀត ជាមួយអាហ្វ្រិកខាងត្បូងប្រធានាធិបតីចិន ស៊ី ជីនពីង បានចុះហត្ថលេខាលើកិច្ចសហការក្នុងវិស័យឧស្សាហកម្ម កសិកម្ម ហេដ្ឋារចនាសម្ព័ន្ធ ឬកិច្ចសហប្រតិបត្តិការសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ