ខ្យល់កខ្វក់សម្លាប់មនុស្សជាង៥លាននាក់ក្នុងមួយឆ្នាំៗ នៅលើ់ពិភពលោក
ខ្យល់កខ្វក់ក្នុងបរិយាការជាឃាតករសម្លាប់មនុស្ស ឱ្យស្លាប់មុនអាយុអស់ប្រមាណ៥លាន៥សែននាក់ ក្នុងមួយឆ្នាំៗ។ នេះបើតាមការសិក្សារបស់អាមេរិក ដែលបានគូសបញ្ជាក់ទៀតថា ក្នុងចំណោមជនរងគ្រោះទាំងអស់នោះ មានជាងពាក់កណ្តាល (៥៥%) ជាជនជាតិចិននិងឥណ្ឌា។ ប្រទេសពីរដែលមានកំណើនសេដ្ឋកិច្ចលូតលាស់ខ្លាំងជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
បរិមាណខ្យល់ពុលក្នុងបរិយាកាសនៅក្រុងប៉េកាំងនិងញូវដេលី ថ្ងៃខ្លះឡើងដល់ ៣០០មីក្រូក្រាមក្នុងមួយម៉ែត្រគូបខ្យល់ ពោលគឺលើសពី៨ទៅ១០ដង នៃកំរិតខ្យល់ល្អចាំបាច់សម្រាប់ឱ្យពលរដ្ឋអាចស្រូបដង្ហើមដោយគ្មានផលប៉ះពាល់ដល់សួត និងដល់ប្រព័ន្ធសរសៃឈាមបេះដូង។ សម្រាប់ក្រុមអ្នកស្រាវជ្រាវអាមេរិក គឺខ្យល់កខ្វក់នេះឯងជាភ្នាក់ងារបង្កឱ្យមានការស្លាប់មុនអាយុ ព្រោះមានជំងឺសួតនិងប្រព័ន្ធសរសៃឈាមបេះដូង។
មជ្ឈមណ្ឌលអគ្គីសនី រោងចក្រ ផ្សែងឡានម៉ូតូ ចំហេះធ្យូងថ្ម និង អុស ជាប្រភពបង្កើនបរិមាណសារធាតុល្អិតៗឆ្មារៗ ក្នុងខ្យល់ និងដែលបង្កគ្រោះថ្នាក់បំផុតដល់សុខភាព។ នៅប្រទេសចិន ដែលមានមនុស្សស្លាប់មុនអាយុប្រមាណ១,៦លាននាក់ ចំហេះធ្យូងថ្មបានបំពុលខ្យល់បរិយាកាសខ្លាំងជាងគេ។ អ្នកស្រាវជ្រាវបរិស្ថាននៃសកលវិទ្យាល័យ Tsinghua នាទីក្រុងប៉េកាំង ក៏បានគុណគិតឃើញថាមានស្លាប់ពី ៩៩០០០០នាក់ទៅ១,៣សែននាក់ នៅឆ្នាំ២០៣០ ប្រសិនបើចិនគ្មានរិះរកវិធានការការពារបរិស្ថាន ប្រកបដោយមហិច្ឆតាទេ។
ចំណែកនៅឥណ្ឌា (ស្លាប់មុនអាយុ១,៤លាន ក្នុងមួយឆ្នាំៗ) ការប្រើអុស អាចម៍គោស្ងួត ឬជីវចម្រុះស្ងួតៗផ្សេងៗទៀត ជាទម្លាប់ដាំស្លរបស់ប្រជាជន គឺប្រភពចំបងដែលនាំឱ្យខ្យល់បរិយាកាសឡើងពុល។ និយាយជារួម បើតាមការសិក្សាអាមេរិកនេះ ពលរដ្ឋឥណ្ឌារាប់លានគ្រួសាររស់ប្រឈមនឹងសារធាតុពុលក្នុងផ្ទះឯង ជាប្រចាំថ្ងៃ។
ខ្យល់កខ្វក់ក្នុងបរិយាកាសជាមូលហេតុទីបួននៃមរណភាពនៅលើពិភពលោក និងជាមូលហេតុដំបូងនៃការបង្កើតបរិស្ថានជំងឺ។ កាត់បន្ថយការបំពុលខ្យល់បរិយាកាស គឺជាមធ្យោបាយដ៏ប្រសើរនិងមានប្រសិទ្ធិភាពបំផុតសម្រាប់រក្សាសុខភាពសាធារណៈឱ្យប្រសើរឡើង។ ៥០ឆ្នាំចុងក្រោយនេះ អាមេរិកខាងជើង អឺរ៉ុបខាងលិច និងជប៉ុន បានបញ្ចេញសកម្មភាពប្រយុទ្ធប្រឆាំងនឹងការបំពុលខ្យល់ ដោយប្រើប្រេង ប្រើឡានមិនសូវបញ្ចេញផ្សែង និងកំរិតការប្រើចំហេះធ្យូងថ្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ