ហ្វីលីពីន៖តំណាងរដ្ឋាភិបាលបានអំពាវនាវឲ្យសម្លាប់ពួកជួញដូរគ្រឿងញានបន្ថែមទៀត
នៅក្នុងប្រទេសហ្វីលីពីន លោកហ្សូហ្សេ កាលីដា មេធាវីទទួលបន្ទុកកិច្ចការតុលាការរបស់រដ្ឋាភិបាលបានអំពាវនាវនៅថ្ងៃចន្ទ ទី១១ កក្កដាឲ្យកម្លាំងប៉ូលិសសម្លាប់ពួកជួញដូរគ្រឿងញានឲ្យបានច្រើនបន្ថែមទៀត។ យោងតាមរូបលោកមេធាវីដដែល យុទ្ធនាការសម្លាប់ពួកជួញដូរគ្រឿងញាន គឺជាពាក្យសន្យារបស់លោកប្រធានាធិបតីឌុយទែរតេនៅក្នុងឱកាសយុទ្ធនាការឃោសនាបោះឆ្នោតរបស់លោក។ តែក្រុមអ្នកការពារសិទ្ធិមនុស្ស និងក្រុមគណបក្សប្រឆាំងកំពុងបន្តបរិហារយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តាមតួលេខផ្លូវការគិតតាំងពីថ្ងៃជាប់ឆ្នោតរបស់លោកឌុយទែរតេក្នុងខែឧសភាមកដល់ថ្ងៃនេះ មានអ្នកជួញដូរគ្រឿងញានជាង ១១០នាក់ត្រូវបានប៉ូលិសសម្លាប់ចោល។ គឺជាទង្វើមួយដែលក្រុមអង្គការអ្នកការពារសិទ្ធិមនុស្ស និងក្រុមអ្នកតំណាងរាស្រ្តរបស់បក្សប្រឆាំងកំពុងទាញសញ្ញាអាសន្ន។ តែលោកហ្សូហ្សេ កាលីដា មេធាវីទទួលបន្ទុកកិច្ចការតុលាការរបស់រដ្ឋាភិបាលបានចេញមុខបកស្រាយនៅក្នុងសន្និសីទកាសែតមួយថា ការស្លាប់ពួកជួញដូរគ្រឿងញានពីសំណាក់កម្លាំងប៉ូលិសជារឿងស្របច្បាប់ ព្រមទាំងជួយគាំទ្រកម្លាំងប៉ូលិសឲ្យបន្តយុទ្ធនាការសម្លាប់តទៅទៀត និងឲ្យបានច្រើនជាងនេះ។
លោកកាលីដាបានយល់ឃើញថា សម្លាប់ពួកជួញដូរគ្រឿងបានជាង ១១០នាក់នៅមានកម្រិតតិចតួចខ្លាំងណាស់ ព្រោះនៅក្នុងប្រទេសហ្វីលីពីនសព្វថ្ងៃ មានអ្នកជួញដូរគ្រឿងញាន និងអ្នកប្រើប្រាស់គ្រឿងញានច្រើនណាស់។ យោងតាមលោកកាលីដា មានភូមិ ឬស្រុកខ្លះកំពុងក្លាយជាទីកន្លែងជួញដូរ និងប្រើប្រាស់គ្រឿងញានតែម្តង។ សូមជម្រាបជូនថា លោកប្រធានាធិបតីហ្វីលីពីនឌុយទែរតេដែលទើបចូលកាន់តំណែងធ្លាប់បានសន្យានៅក្នុងយុទ្ធនាការឃោសនាបោះឆ្នោតថា នឹងចាត់វិធានការចាស់ដៃបង្រ្កាបពួកជួញដូរគ្រឿងញានដើម្បីរារាំងហ្វីលីពីនកុំក្លាយជារដ្ឋជួញដូរគ្រឿងញាន។
ក៏ប៉ុន្តែ វិធានការចាស់ដៃរបស់លោកឌុយទែរតេកំពុងទទួលរងការរិះគន់ ទិតៀនយ៉ាងខ្លាំងពីសំណាក់ក្រុមអង្គការសិទ្ធិមនុស្ស និងឥស្សរជននយោបាយមួយចំនួន ពិសេសពួកគណបក្សប្រឆាំង។ លោកហ្សូហ្សេ ម៉ានុយអែល ឌីយ៉ូណូ មេធាវីសិទ្ធិមនុស្សបានចោទលោកឌុយទែរតេពីបទបានបង្កើតឲ្យមានបរិយាកាសហិង្សាប្រកបដោយអាណាធិបតេយ្យ និងបង្កើតរដ្ឋមួយដែលគ្មានចៅក្រម។ ចំណែកអតីតអ្នកព្រឹទ្ធសភាហ្វីលីពីនម្នាក់ក៏បានបញ្ចេញប្រតិកម្មដោយចោទជាសំណួរថា តើមុននឹងសម្លាប់អ្នកជួញដូរគ្រឿងញានណាម្នាក់ ប៉ូលិសមានបើកការស៊ើបអង្កេត និងគោរពតាមនិតិវិធីច្បាប់ត្រឹមត្រូវដែរ ឬទេ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ