អាមេរិកព្រមានលោកឌុយទែរតេរឿងងាករេចេញពីអាមេរិក
ជំហរងាករេ របស់ប្រធានាធិបតីហ្វីលីពីន គឺជាប្រភពនៃការព្រួយបារម្ភរបស់ពិភពលោក ! នេះជាការយល់ឃើញរបស់ លោក ដានីញ៉ែល រ៉ូសែល អនុរដ្ឋមន្ត្រីក្រសួងការពារជាតិអាមេរិកនិងជាអន្តរការីអាមេរិកប្រចាំតំបន់អាស៊ី។ លោកDaniel Russel ដែលបានអញ្ជើញទៅកាន់ប្រទេសហ្វីលីពីន និងបានជួបពិភាក្សាជាមួយរដ្ឋមន្ត្រីក្រសួងការពារជាតិនិងការបរទេសហ្វីលីពីន នៅថ្ងៃចន្ទនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
កាលពីពីរបីថ្ងៃមុន លោក ឌុយទែរតេ បានប្រកាសកាត់ផ្តាច់ សម្ព័ន្ធមេត្រីភាពជាមួយសហរដ្ឋអាមេរិក ពីទីក្រុងប៉េកាំង ដោយសម្រេចងាកទៅអោបចិនវិញ។ ព្រោះសំអាងថាលោកជាអ្នកសង្គមនិយម មាននិន្នាការជិតស្និទ្ធនឹងពួកកុម្មុយនិស្ត ចង់ដកខ្លួនឱ្យឆ្ងាយពីអាមេរិក ដើម្បីទៅខិតទៅជិតចិននិងរុស្ស៊ីវិញ។
ប៉ុន្តែពេលមកដល់ផ្ទះវិញ លោកបែរជាសុំដកពាក្យវិញ ដោយធានាអះអាងលោកមិនដែលចង់ឃើញសម្ព័ន្ធភាពចំណាស់៧០ឆ្នាំជាមួយអាមេរិកត្រូវបែកបាក់ឡើយ។ បើដូច្នេះមែនតើហេតុអ្វីបានជាលោកឌុយទែរតេ ចេះតែប្រឹងសម្ញែងកាយវិការនិងពាក្យសម្តីប្រឆាំងនឹងអាមេរិកធ្វើអី ?!
សម្រាប់លោកអនុរដ្ឋមន្ត្រីការពារជាតិអាមេរិក សេចក្តីប្រកាសនិងការធ្វើអត្ថាធិប្បាយបញ្ចាសបណ្តោយគ្នាយ៉ាងដូច្នេះ គឺពិតបង្កបង្កើតតែបរិបទមិនច្បាស់លាស់ ប្រទេសផ្សេងទៀតជាច្រើនសុទ្ធតែហួសចិត្តគ្មានវាចានឹងថ្លែងឡើយ និងលែងយល់ពីជំហររបស់ហ្វីលីពីន។ នរណាក៏យល់ដូច្នេះដែរ មិនថាអាមេរិក រដ្ឋាភិបាល ប្រជាពលរដ្ឋ ហ្វីលីពីនខ្លួនឯង ឬសហគមន៍ហ្វីលីពីនរស់នៅក្រៅប្រទេសឡើយ។ នេះ គឺមិនមែនជានិន្នាការវិជ្ជមានឡើយ។
លោករ៉ូសែល បានបញ្ជាក់ជាថ្មីប្រាប់ប្រមុខការទូតហ្វីលីពីនអំពីការព្រួយបារម្ភរបស់អាមេរិកចំពោះសង្គ្រាមប្រឆាំងនឹងឧក្រិដ្ឋកម្មគ្រឿងញៀនរបស់លោកឌុយទែរតេ និងបានព្រមានថាអាមេរិក ផ្តល់តម្លៃឱ្យដល់តែរដ្ឋមានច្បាប់ ព្រោះការគោរពសិទ្ធិពលរដ្ឋដើរតួនាទីយ៉ាងសំខាន់ក្នុងកិច្ចការពារប្រជាជន។
លោកឌុយទែរតេ តែងច្រឡោតខឹងជាញយដងប្រឆាំងនឹងការរិះគន់របស់អាមេរិក រហូតដល់ថ្នាក់ជេរលោកអូបាម៉ា ថាជាកូនស្រីសំផឹង ហើយបានប្រកាសងាកទៅឈរខាងចិននិងរុស្ស៊ី តែនៅថ្ងៃចន្ទនេះ រដ្ឋាភិបាលហ្វីលីពីន សុខចិត្តព្រមទទួលយន្តហោះជជុះអាមេរិកប្រភេទ C-១៣០ ដែលហ្វីលីពីនបានព្រមព្រៀងទិញក្នុងក្របខ័ណ្ឌកិច្ចសហប្រតិបត្តិការទ្វេភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ