ទារុណកម្មលើកុមារកម្ពុជាត្រូវកាសែតបរទេសចុះផ្សាយថា ជាទារុណកម្មលើកុមាររ៉ូហ៊ីងយ៉ា
ប្រព័ន្ធផ្សព្វផ្សាយបរទេស នៅសប្តាហ៍នេះបានចុះផ្សាយយ៉ាងព្រោងព្រាតរូបភាពវីដេអូកុមារម្នាក់ ដែលរងការបៀតបៀន ធ្វើទារុណកម្មពីមនុស្សធំ។ ព័ត៌មាន ទាំងភាសាអង់គ្លេស និងអារ៉ាប់ ដែលបានដកស្រង់វីដេអូពីបណ្តាញសង្គមហ្វេសប៊ុក បាននាំគ្នាសរសេរថា កុមារដែលរងទារុណកម្ម គឺជាកុមាររ៉ូហ៊ីងយ៉ាដែលរងការធ្វើទុក្ខបុកម្នេញពីជនជាតិភូមា កាន់ពុទ្ធសាសនា។ ប៉ុន្តែ តាមពិត ជាក់ស្តែង កុមារដែលរងទារុណកម្ម គឺជាកុមារដែលរស់នៅ ខេត្តមណ្ឌលគិរី ចំណែកបុរសចិត្តអប្រិយធ្វើបាបក្មេង គឺជាជនជាតិវៀតណាម ដែលត្រូវអាជ្ញាធរកំពុងឃាត់ខ្លួន ក្នុងទឹកដីវៀតណាម។
ចុះផ្សាយនៅថ្ងៃ៖
ស្តាប់ - ០២:១៩
តាំងពីថ្ងៃអង្គារមក រូបភាពវីដេអូ បុរសធ្វើបាបរូបរាងកាយកុមារតូច ដែលយំស្រែក ឈឺចាប់ដោយសារភ្លើងឆក់ ត្រូវបានប្រព័ន្ធផ្សព្វផ្សាយបរទេស និងអ្នកប្រើប្រាស់អ៊ីនធ័រនែត យកមកអត្ថាធិប្បាយ រិះគន់ និងសំដែងការខឹងសម្បារចំពោះជនពាលដែលធ្វើបានធ្វើបាបកូនក្មេងយ៉ាងព្រៃផ្សៃ។ វិបសៃតិ៍អង់គ្លេសDaily mail របស់អង់គ្លេស ដែលជំនាញខាងផលិតរឿងរសើប រឿងជីវិតផ្ទាល់ខ្លួន បានចុះផ្សាយមុនគេ ដោយថា កុមារដែលគេធ្វើទារុណកម្ម នៅក្នុងរូបភាពវីដេអូនោះ គឺជាកុមារជនជាតិភាគតិចរ៉ូហ៊ីងយ៉ា។
វិបសៃតិ៍ភាសាអារ៉ាប់ ដូចជាវិបសៃតិ៍ហ្សកដានីជាដើម បានចុះផ្សាយ បន្ត និងបញ្ជាក់ថា កុមារដែលយំស្រែក ដោយសារគេធ្វើបាបរាងកាយ ប្រាកដ ជាតិរ៉ូហ៊ីងយ៉ា នៅប្រទេសភូមា។ អ្នកប្រើប្រាស់អ៊ីនធ័រនែតអារ៉ាប់ ជាច្រើនរហូតសរសេរ ដោយការខឹងសម្បារថា ក្រុមអង្គការការពារសិទ្ធិកុមារអន្តរជាតិ ជួយតែកុមារដែលមិនកាន់សាសនាអ៊ីស្លាម។ ដល់ពេលដែល ក្មេងប្រុស ជនជាតិរ៉ូហ៊ីងយ៉ា ដែលមកពីសហគមន៍កាន់សាសនាអ៊ីស្លាម ត្រូវគេធ្វើបាប អង្គការការពារសិទ្ធិកុមារទាំងនោះ បិទភ្នែក មិនជួយអ្វីសោះ។
ការចុះផ្សាយរបស់វិបសៃតិ៍អារ៉ាប់ គឺជាយល់ខុសស្រឡះ។ តាម វិបសៃតិ៍ ផ្ទៀងផ្ទាត់ព័ត៌មានអារ៉ាប៊ី សាអូឌីត ដែលបានដកស្រង់កាសែតភាសាអង់គ្លេស The Cambodia Daily ចុះផ្សាយ កាលពីថ្ងៃពុធ រូបភាពកុមារដែលគេឆក់នឹងភ្លើង តាមពិតថតនៅប្រទេសកម្ពុជា។ កុមារដែលរងទារុណកម្ម មានអាយុ ២ឆ្នាំ នៅខេត្តមណ្ឌលគីរី គឺមិនមែនជាកុមារជាតិរ៉ូហ៊ីងយ៉ា នៅភូមានោះទេ។
តាមទីភ្នាក់ងារព័ត៌មានបារាំងអាអេហ្វប៉េ AFP បុរសអប្រិយដែលធ្វើបាបរាងកាយកុមារតូច គឺជាជាតិវៀតណាម ដែលត្រូវបានអាជ្ញាធរចាប់ឃាត់ខ្លួន នៅក្នុងទឹកដីវៀតណាម កាលពីថ្ងៃពុធ។ តាមកាសែតរដ្ឋវៀតណាម ឧក្រិដ្ឋជនរូបនេះបាននិយាយសារភាពថា គេប្រព្រឹត្តដូច្នេះ ដោយសារតែខ្លួនគេបានរងថ្នាំញៀន។ សូមបញ្ជាក់ថា តាំងពីថ្ងៃព្រហស្បតិ៍ មនុស្ស៣នាក់ ដែលក្នុងនោះ ម្នាក់ជាជនជាតិហូឡង់ និងជាម្ចាស់ចំការនៅមណ្ឌលគិរី ដែលម្តាយក្មេងតូចធ្វើការ។ នៅក្រោយការចុះផ្សាយដំណឹងនេះ Daily Mailបានដកអត្ថបទព័ត៌មានរបស់ខ្លួនចេញពីវិបសៃតិ៍ ជាបន្ទាន់ កាលពីថ្ងៃព្រហស្បតិ៍។
នៅភូមាវិញ រដ្ឋាភិបាលភូមាបានបដិសេធថា មិនបានធ្វើទុក្ខបុកម្នេញលើជនជាតិរ៉ូហ៊ីងយ៉ា ដូចដែលគេបានចោទប្រកាន់នោះទេ។ ដោយលើកយកករណី ការចុះផ្សាយ ដោយភ័ន្តច្រលំ លើកនេះ អាជ្ញាធរភូមាបានបរិហារ រិះគន់កាសែតបរទេស ជាពិសេស កាសែតអង់គ្លេស ថា បានធ្វើបុរេវិនិច្ឆ័យ ចុះផ្សាយព័ត៌មានមិនពិត ដើម្បីសម្អុយ ធ្វើឲ្យខូចមុខមាត់រដ្ឋាភិបាលភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ