ប្រមុខការទូតអាមេរិកចាប់ផ្តើមទស្សនកិច្ចនៅអាស៊ី ប្រឈមការគំរាមពីកូរ៉េខាងជើង
ពីថ្ងៃពុធ១៥មីនា រហូតដល់ថ្ងៃអាទិត្យ១៩មីនា ប្រមុខការទូតថ្មីនៃសហរដ្ឋអាមេរិក លោករិច ធីលឡឺសាន់ Rex Tillerson បំពេញទស្សនកិច្ចនៅជប៉ុន កូរ៉េខាងត្បូង និងចិន។ ទិសដៅចំបងគឺដើម្បីរកវិធីកុំអោយកូរ៉េខាងជើងអាចបង្កសង្គ្រាមនុយក្លេអ៊ែរក្នុងតំបន់។ ថ្ងៃអង្គារ១៤មីនានេះ ក្រុងព្យុងយ៉ាងបានព្រមានថានឹងវាយប្រហារអាមេរិកឥតប្រណីដៃឡើយ ប្រសិនបើអាមេរិកប៉ះពាល់ដល់ភាពថ្លៃថ្នូររបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ទស្សនកិច្ចរបស់ប្រមុខការទូតអាមេរិក រិច ធីលឡឺសាន់ នៅអាស៊ី សប្តាហ៍នេះ មានសារៈសំខាន់ណាស់ សម្រាប់រដ្ឋាភិបាលប្រធានាធិបតីដូណាល់ ត្រាំ ដែលកំពុងប្រឈមការគំរាមកំហែងនុយក្លេអ៊ែរពីកូរ៉េខាងជើង។ ប្រមុខការទូតអាមេរិកនឹងចាប់ផ្តើមទស្សនកិច្ចនៅជប៉ុនមុនគេ រួចបន្តទៅកូរ៉េខាងត្បូង មុននឹងបញ្ចប់ដំណើរនៅចិន។
ប្រឈមការគំរាមពីកូរ៉េខាងជើង ទ័ពអាមេរិកនិងជប៉ុនទើបនឺងបានធ្វើសមយុទ្ធជើងទឺករួមគ្នា កាលពីសប្តាហ៍មុនប៉ុណ្ណោះ។ អាមេរិកនិងជប៉ុនដឹងថា ដែនដីខ្លួនជាផ្ទាំងស៊ីបរបស់ក្រុងព្យុងយ៉ាងច្បាស់ណាស់។ សម្រាប់ទស្សនកិច្ចនៅក្រុងសេអ៊ូល ប្រមុខការទូតធីលឡឺសាន់នឹងជួបប្រធានាធិបតីស្តីទីកូរ៉េខាងត្បូង លោកវ៉ាំង ក្យូអាន់ និងរដ្ឋមន្ត្រីការបរទេស យុង ប្យុនសឺ ព្រោះថា លោកស្រីប៉ាក់ គុនហេ ត្រូវបានដកហូតតំណែងហើយ។
ការបិទបញ្ចប់ទស្សនកិច្ចនៅចិន ជាដំណាក់កាលសំខាន់ជាងគេ។ អាមេរិកមិនអាចមើលរំលងចិនទេ ត្បិតថា លោកត្រាំធ្លាប់រិះគន់ចិនកន្លងមកក៏ដោយ។ ចិនជាសម្ព័ន្ធមិត្តរបស់កូរ៉េខាងជើង។ ប៉ុន្មានខែចុងក្រោយនេះ ចិនបានបង្ហាញបំណងល្អ ដោយបានដំឡើងសម្លេងដាក់កូរ៉េខាងជើង។ ចិនធ្លាប់ស្នើការសម្របសម្រួលមួយ ដោយអោយកូរ៉េខាងជើងព្យួរកម្មវិធីនុយក្លេអ៊ែរ ហើយជាថ្នូរ អាមេរិកនិងកូរ៉េខាងត្បូងត្រូវឈប់ធ្វើសមយុទ្ធរួមគ្នាតទៅទៀត។ តែសប្តាហ៍មុននេះ អាមេរិកបានបដិសេធសំណើរបស់ចិន។ មិនដឹងថា រដ្ឋមន្ត្រីការបរទេសធីលឡឺសាន់ ត្រូវជជែកយ៉ាងណាជាមួយចិនដើម្បីរកដំណោះស្រាយនុយក្លេអ៊ែរកូរ៉េខាងជើងទេ ព្រោះអាមេរិកទើបនឹងធ្វើអោយចិនខឹងខ្លាំង ដោយសារតែបានដាក់ពង្រាយខែលមីស៊ីលប្រឆាំងមីស៊ីល នៅកូរ៉េខាងត្បូង កាលពីសប្តាហ៍មុន។ លើសពីនេះទៀត អាមេរិកទើបប្រកាសពង្រាយដ្រូនមីស៊ីលនៅកូរ៉េខាងត្បូងថែមទៀត។
ជាមួយមធ្យោបាយយោធាអាមេរិកដ៏គគ្រឺកគគ្រេង នៅអាស៊ី ចុងក្រោយនេះ បើអាមេរិកមិនអាចសម្រួលកំហឹងចិនបាន ចិនក៏ប្រហែលពិបាកមានចិត្តជួយអាមេរិកទៅដំឡើងសម្លេងដាក់កូរ៉េខាងជើងទៀតដែរ។ ថ្ងៃអង្គារនេះ ក្រុងព្យុងយ៉ាងទើបនឺងព្រមានវាយប្រហារអាមេរិកដោយឥតសំចៃ ករណីអាមេរិកហ៊ានប៉ះពាល់ដល់ភាពថ្លៃថ្នូររបស់កូរ៉េខាងជើង។ ក្រុងព្យុងយ៉ាងយល់ថា ការមកដល់នៃបណ្តានាវាផ្ទុកយន្តហោះអាមេរិក ក្នុងតំបន់ គឺជាការឃុបខិតដើម្បីវាយប្រហារកូរ៉េខាងជើង។ កូរ៉េខាងជើង បានលើកឡើងដែរថា គ្រាន់តែថ្ងៃ១១មីនាតែមួយថ្ងៃប៉ុណ្ណោះ មានយន្តហោះសត្រូវច្រើនគ្រឿងបានហោះក្បែរដែនអាកាសរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ