ជនជាតិអ៊ុយហ្គួរពី៤០០០ទៅ៥០០០នាក់មកពីប្រទេសចិន កំពុងប្រយុទ្ធប្រឆាំងនៅក្នុងប្រទេសស៊ីរី
ឯកអគ្គរដ្ឋទូតស៊ីរីប្រចាំប្រទេសចិន ទើបបានអះអាងម្សិលមិញថា ជនជាតិភាគតិចអ៊ុយហ្គួរមកពីតំបន់ Xingjiang ភាគខាងលិចនៃប្រទេសចិន ចំនួនពី ៤០០០ទៅ៥០០០នាក់ កំពុងធ្វើការប្រយុទ្ធប្រឆាំងនៅក្នុងប្រទេសស៊ីរី ក្នុងក្រុមពួកឧទ្ទាមផ្សេងៗ។
ចុះផ្សាយនៅថ្ងៃ៖ កែប្រែថ្ងៃទី៖
អាជ្ញាធរចិន មានការព្រួយបារម្ភថាសមាជិកនៃសហគមន៍ជនជាតិភាគតិចអ៊ុយហ្គួដែលកាន់សាសនាអ៊ីស្លាមនិងនិយាយភាសាតួកគីប្រហែលជាបានធ្វើដំណើរទៅកាន់ប្រទេសស៊ីរីនិងអ៊ីរ៉ាក់ដើម្បីធ្វើការប្រយុទ្ធក្នុងនាមជាពួកឧទ្ទាម ក្រោយពីបានឆ្លងកាត់ដោយខុសច្បាប់នៅក្នុងបណ្តាប្រទេសអាស៊ីមួយចំនួនដែលក្នុងនោះក៏មានតួកគីដែរ។
បើយោងតាមការវាយតម្លៃរបស់ឯកអគ្គរដ្ឋទូតស៊ីរីប្រចាំទីក្រុងដល់ទីភ្នាក់ងារReuters នៅក្រៅវេទិកានៃអ្នកកិច្ចការជំនួញមួយនៅប៉េកាំង ពួកជីហាតដែលចេញមកពីតំបន់ Xinjiang មានគ្នាពី ៤០០០ទៅ ៥០០០នាក់។ ឯកអង្គរដ្ឋទូតស៊ីរី ថែមទាំងបានគូសបញ្ជាក់ទៀតថា ប្រទេសចិនក៏ដូចជាប្រទេសដទៃទៀតដែរ ត្រូវតែគិតគូរពីបញ្ហាខាងលើនេះដោយយក ចិត្ត ទុកដាក់ជាទីបំផុត។
តែចំពោះអង្គការការពារសិទ្ធមនុស្សនិងជនភៀសខ្លួនអ៊ុយហ្គួរ វិញ ជនជាតិភាគតិចអ៊ុយហ្គួរកំពុងជ្រកកោននៅក្នុងទឹកដីតួកគីនោះ គឺដើម្បី គេចខ្លួន ពីការគាបសង្កត់ពីសំណាក់អាជ្ញាធរចិននៅក្នុងតំបន់ Xinjiang តែប៉ុណ្ណោះ តែការអះអាងនេះ ត្រូវបានប៉េកាំងបដិសេធ។
សូមរំលឹកថាអង្គការរដ្ឋអ៊ីស្លាម ធ្លាប់បានអះអាងបញ្ជាក់ពីមរណៈភាពនៃចំណាប់ខ្មាំងម្នាក់សញ្ជាតិចិនកាលពីឆ្នាំ ២០១៥នោះ ថាជាស្នាដៃរបស់ពួកគេ។ ព្រឹត្តិការណ៍នេះហើយ ដែលជំរុញឲ្យទីក្រុងប៉េកាំង ព្រួយបារម្ភ នៅលើការចូលរួមរបស់ជនជាតិភាគតិចអ៊ុយហ្គួរនៅក្នុងការប្រយុទ្ធប្រឆាំងនៅតំបន់មជ្ឈិមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ