រដ្ឋាភិបាលជប៉ុនរងការរិះគន់ នៅថ្ងៃប្រារព្ធខួប ៧២ឆ្នាំ នៃការទម្លាក់គ្រាប់បែកនុយក្លេអ៊ែរ លើណាកាសាគី
ប្រជាជនជប៉ុន នៅថ្ងៃពុធ នេះប្រារព្ធខួប ៧២ឆ្នាំ នៃការទម្លាក់គ្រាប់បែកនុយក្លេអ៊ែរ ទៅលើទីក្រុងណាកាសាគី។ ពិធីបុណ្យរំលឹកវិញ្ញាណក្ខន្ធដល់ជនរងគ្រោះជប៉ុន ដែលស្លាប់ ដោយសារគ្រាប់បែកនុយក្លេអ៊ែរ អាមេរិក ធ្វើឡើង នៅចំពេលដែលអាមេរិក និងកូរ៉េខាងជើង កំពុងតានតឹង និងគំរាមដាក់គ្នា ដោយសារតែរឿងផលិតអាវុធនុយក្លេអ៊ែរ។ ចៅហ្វាយក្រុងណាកាសាគីវិញ បានទាមទារ ឲ្យរដ្ឋាភិបាលជប៉ុនប្រឹងរូតរះ ចូលរួម នៅក្នុងសន្ធិសញ្ញា របស់អង្គការសហប្រជាជាតិ ដែលហាមឃាត់មិនឲ្យមានអាវុធនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការប្រារព្ធខួបលើកទី ៧២ នៃការទម្លាក់គ្រាប់បែកនុយក្លេអ៊ែរលើក្រុងណាកាសាគី កត់សំគាល់ ដោយ សារដាក់សម្ពាធ ទៅលើរដ្ឋាភិបាលជប៉ុន។ លោកចៅហ្វាយក្រុង តូមីហីសា តាវអូ នៅថ្ងៃនេះ បានប្រើពាក្យខ្លាំង រិះគន់រដ្ឋាភិបាលរបស់លោកស៊្ហីនហ្សូ អាបេ ដែលបើតាមលោក បានអវត្តមាន មិនចូលរួម នៅក្នុងសន្ធិសញ្ញា ហាមឃាត់អាវុធនុយក្លេអ៊ែរ របស់អង្គការសហប្រជាជាតិ។
នៅដើមខែកក្កដានេះ ប្រទេសសមាជិកអង្គការសហប្រជាជាតិ ចំនួន ១២២ បានបោះឆ្នោតគាំទ្រសន្ធិសញ្ញាហាមឃាត់នុយក្លេអ៊ែរ ប៉ុន្តែ ជប៉ុន ក៏ដូចជា ប្រទេសមហាអំណាចនុយក្លេអ៊ែរ អាមេរិក រុស្ស៊ី ចិន បារាំង អ៊ីស្រាអែល និងកូរ៉េខាងជើង បានធ្វើពហិការ មិនចូលរួម នៅក្នុងការចរចារបស់អង្គការសហប្រជាជាតិ។
“សម្រាប់ប្រជាជន ណាកាសាគី ដែលធ្លាប់ រងគ្រោះ ឈឺចាប់ ដោយសារគ្រាប់បែកបរិមាណូ គេមិនអាចយល់បានទាល់តែសោះ ពីជំហររបស់រដ្ឋាភិបាលជប៉ុនសព្វថ្ងៃ។ នេះជាការថ្លែងរបស់ចៅហ្វាយក្រុងណាកាសាគី ដែលបានអំពាវនាវផងដែរ ឲ្យរដ្ឋាភិបាលជប៉ុន ផ្លាស់ប្តូរនយោបាយ លែងពឹងផ្អែក រស់ឆ័ត្រការពារនុយក្លេអ៊ែររបស់អាមេរិកតទៅទៀត។
ពិធីបុណ្យរំលឹកខួបលើកទី ៧២នៃការទម្លាក់គ្រាប់បែកនុយក្លេអ៊ែររបស់អាមេរិក កើតមាននៅចំពេលដែលជប៉ុន និងអាមេរិកកំពុងបារម្ភភ័យខ្លាចដោយសារការគំរាមកំហែងប្រើអាវុធនុយក្លេអ៊ែររបស់កូរ៉េខាងជើង។ នៅក្នុងស្ថានភាពតានតឹងបែបនេះ ចៅហ្វាយក្រុងណាកាសាគី បានអំពាវនាវសុំឲ្យក្រុងណាកាសាគី ត្រឹមជាក្រុងចុងក្រោយ ដែលរងគ្រោះដោយសារគ្រាប់បែកនុយក្លេអ៊ែរ។
មានវត្តមាន ក្នុងពិធីបុណ្យរំលឹកវិញ្ញាណក្ខន្ធនៅណាកាសាគី នៅថ្ងៃនេះ ប្រមុខរដ្ឋាភិបាលជប៉ុន លោកស្ហ៊ីនហ្សូ អាបេ មិនបាននិយាយដល់សន្ធិសញ្ញាហាមឃាត់នុយក្លេអ៊ែរ ដែលចៅហ្វាយក្រុងណាកាសាគី បានលើកឡើងនោះទេ។ ផ្ទុយទៅវិញ លោកបានអះអាងថា ជប៉ុនប្តេជ្ញា ដើរតួនាទី នៅជួរមុខគេ ធ្វើការជាមួយប្រទេសមហាអំណាចនុយក្លេអ៊ែរ និងប្រទេសគ្មាននុយក្លេអ៊ែរ ដើម្បីធ្វើឲ្យពិភពលោកគ្មានអាវុធនុយក្លេអ៊ែរ។
នៅថ្ងៃពុធនេះ នៅវេលា ម៉ោង ១១ និង២នាទី ស្នូរជួង បន្ទរលឺ គ្រប់កន្លែង ក្នុងក្រុង ណាកាសាគី ភាគនិរតីប្រទេសជប៉ុន។ កាលពី៧២ឆ្នាំមុន គឺនៅម៉ោងនេះ នាទីនេះ នៅថ្ងៃទី ៩សីហា ឆ្នាំ ១៩៤៥ ដែលយន្តហោះអាមេរិកាំងបានទម្លាក់គ្រាប់បែកនុយក្លេអ៊ែរ សម្លាប់ជនជាតិជប៉ុន ៧ម៉ឺន ៤នាក់ នៅណាកាសាគី ពោលគឺនៅបីថ្ងៃក្រោយ យន្តហោះអាមេរិកាំង ទម្លាក់គ្រាប់បែកនុយក្លេអ៊ែរ សម្លាប់មនុស្ស ១សែន ៤ម៉ឺននាក់ នៅហ៊ីរ៉ូស្ហ៊ីម៉ា។ ជប៉ុនជាប្រទេសតែមួយ លើលោក ដែលរងគ្រោះ បាត់បង់ជីវិតមនុស្ស ដោយសារគ្រាប់បែកនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ