ប្រធានាធិបតីអាមេរិក លោក ដួណាល់ ត្រាំ បំពេញទស្សនកិច្ចផ្លូវការ លើកដំបូង នៅចិន
បន្ទាប់ពីកូរ៉េខាងត្បូង លោកដូណាល់ត្រាំ បានអញ្ជើញទៅដល់ប្រទេសចិនហើយនៅថ្ងៃពុធនេះ ដើម្បីបំពេញទស្សនកិច្ច ផ្លូវរដ្ឋរយៈពេលពីរថ្ងៃ។ នេះជាដំណាក់កាលទស្សនកិច្ចដែលមានលក្ខណៈស្មុគស្មាញជាងគេ ព្រោះលោកត្រាំ ត្រូវសាកល្បងស្វែងរកជំនួយសាមគ្គីភាពជាធ្លុងមួយពីចិន ដើម្បីប្រឆាំងនឹងមហិច្ឆតានុយក្លេអ៊ែររបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅថ្ងៃនេះ លោកត្រាំបានអញ្ជើញទៅបំពេញទស្សនកិច្ចផ្លូវរដ្ឋ នៅក្នុងចិន ប្រទេសមួយ ដែលលោកតែងចាត់ទុកជាប្រភពនៃបញ្ហា ! ជាអ្នកលួចការងារអាមេរិក ! កាលលោកនៅជាបេក្ខជនប្រធានាធិបតី។ ប៉ុន្តែថ្ងៃនេះ មួយឆ្នាំគត់ក្រោយពីបានជាប់ឆ្នោតជាប្រធានាធិបតី លោកត្រាំ បានប្តូរសម្លេង។
អមដំណើរដោយប្រតិភូជាអ្នកមុខអ្នកការ ជាប្រធានក្រុមហ៊ុនសហគ្រាស ក្នុងវិស័យកសិកម្ម និងថាមពល ដំណើរទស្សនកិច្ចរបស់លោកត្រាំ នៅចិន ជាឱកាសដ៏ប្រពៃនៃការជជែកពិភាក្សាអំពីការផ្តោះប្តូរពាណិជ្ជកម្ម ព្រោះចិនទើបបានសន្យាបើកទ្វារទទួលអ្នកវិនិយោគបរទេស។
ការប្តូរសំឡេង ក៏ព្រោះតែសំណុំរឿងនុយក្លេអ៊ែរកូរ៉េខាងជើង។ ចិនជាប្រទេសគន្លឹះ ក្នុងការដាក់សម្ពាធលើរបបព្យុងយ៉ាង ព្រោះចិនជាតំណាង៩០%នៃពាណិជ្ជកម្មរបស់កូរ៉េខាងជើង។ ចិនបានសន្យាអនុវត្តយ៉ាងហ្មត់ចត់ តាមសេចក្តីសម្រេចរបស់អង្គការសហប្រជាជាតិ ដាក់ទណ្ឌកម្មប្រឆាំងកូរ៉េខាងជើង ប៉ុន្តែច្រានចោលដាច់ខាតដំណោះស្រាយតាមបែបគំរាមកំហែងរបស់លោកត្រាំ និងបានទាមទារឱ្យជ្រើសរើសផ្លូវចរចា។
ដូច្នេះដើម្បីបានជំនួយពីប៉េកាំង លោកត្រាំ ត្រូវតែចេះយកចិត្តលោក ស៊ី ជីនពីង។ មុននឹងចាកចេញពីទីក្រុងសេអ៊ូល ប៉ុន្មានម៉ោង លោកត្រាំបានបង្ហោះសារថា លោកអន្ទះសារចង់ជួបលោកប្រធានាធិបតីចិន ស៊ី ជីនពីង ដែលទើបមានជោគជ័យនយោបាយថ្មី (ជាប់ឆ្នោតជាប្រធានបក្សកុម្មុយនិស្តជាថ្មី)។ ក្រោយពីបានព្រមានកូរ៉េខាងជើងម្តងទៀត ពីសេអ៊ូល លោកត្រាំ ក៏បានលាដៃហៅ គីម ជុងអ៊ុន ដកខ្លួនចេញពីភាពឯកា ដើម្បីសាងអនាគតឱ្យប្រសើរ និងបានអំពាវនាវទៅកាន់ប្រជាជាតិដែលមានទំនួលខុសត្រូវទាំងអស់ ដោយលើកចំៗឈ្មោះប្រទេសចិន និងរុស្ស៊ី ឱ្យកាន់ដៃគ្នា រួមជាធ្លុងមួយ ផ្តាច់ចំណងពាណិជ្ជកម្ម និងបច្ចេកវិទ្យាជាមួយរបបស្តាលីន ដើម្បី រុញច្រានព្យុងយ៉ាងឱ្យបោះបង់មហិច្ឆតានុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ