អាមេរិកថា កូរ៉េខាងជើងត្រៀមខ្លួនដើម្បីជជែកពីភាពគ្មាននុយក្លេអ៊ែរនៅឧបទ្វីបកូរ៉េ
នៅថ្ងៃអាទិត្យ ទី៨ មេសា អ្នកទទួលខុសត្រូវជាន់ខ្ពស់អាមេរិកចំនួន ២រូបក្នុងរដ្ឋបាលអាមេរិកបានប្រាប់ឲ្យដឹងថា នាគម្រោងជំនួបកំពូលរវាងមេដឹកនាំកូរ៉េខាងជើងលោកគីម ជុងអ៊ីល និងលោកប្រធានាធិបតីអាមេរិកដូណាល់ ត្រាំក្នុងខែឧសភាខាងមុខ ក្រុមព្យុងយ៉ាងបានបញ្ជាក់ប្រាប់ក្រុងវ៉ាស៊ីនតោនពីការត្រៀមខ្លួនរួចជាស្រេចដើម្បីជជែកពីភាពគ្មាននុយក្លេអ៊ែរនៅឧបទ្វីបកូរ៉េ។ នេះជាលើកទី១ ដែលកូរ៉េខាងជើងបានបញ្ជាក់ប្រាប់អាមេរិកជាផ្លូវការ។ តែគេនៅមិនទាន់ដឹងថា តើអ្នកទទួលខុសត្រូវជាន់ខ្ពស់អាមេរិកទាំង ២រូបទទួលបានព័ត៌មានពីប្រភពណាទេ។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងចំណោមអ្នកទទួលខុសត្រូវជាន់ខ្ពស់អាមេរិកទាំង ២រូបដែលមិនព្រមបញ្ចេញឈ្មោះ មានម្នាក់បាននិយាយថា រដ្ឋាភិបាលកូរ៉េខាងជើង និងរដ្ឋបាលអាមេរិកបានទាក់ទងគ្នាដោយផ្ទាល់ និងដោយសម្ងាត់នាពេលថ្មីៗកន្លងទៅ និងដែលនាឱកាសនោះ ក្រុងព្យុងយ៉ាងបានប្រាប់ដៃគូសន្ទនាត្រង់ៗថា នៅក្នុងគម្រោងជំនួបកំពូលរវាងលោកគីម ជុងអ៊ុន និងដូណាល់ត្រាំនាពេលខាងមុខ កូរ៉េខាងជើងបានត្រៀមខ្លួនរួចជាស្រេចដើម្បីជជែកពីភាពគ្មាននុយក្លេអ៊ែរនៅឧបទ្វីបកូរ៉េ។ ចំណែកអ្នកទី២ បានអះអាងពីការដែលរដ្ឋបាលអាមេរិកបានទទួលការបញ្ជាក់ជាផ្លូវការពីរូបលោកគីម ជុងអ៊ុនផ្ទាល់។
យ៉ាងណាក៏ដោយ គេនៅមិនទាន់អាចផ្ទៀងផ្ទាត់លើព័ត៌មានដែលលើកឡើងដោយអ្នកទទួលខុសត្រូវជាន់ខ្ពស់អាមេរិកទាំង ២រូបនេះទេ ហើយក៏នៅមិនទាន់ទទួលបានប្រតិកម្មយ៉ាងណាពីកូរ៉េខាងជើងដែរ។ អ្វីដែលគេដឹងមកដល់ពេលនេះ កូរ៉េខាងត្បូងបានដើរតួនាទីជាអាជ្ញាកណ្តាលរវាងអាមេរិក និងកូរ៉េខាងជើង ពិសេសការផ្តួចផ្តើមគំនិតឲ្យមានគម្រោងជំនួបរវាងលោកគីម ជុងអ៊ុន និងដូណាល់ ត្រាំនាពេលខាងមុខ ក៏ដូចជានៅក្នុងទំនាក់ទំនងផ្សេងទៀត។
ការដែលកូរ៉េខាងជើងចង់បានឧបទ្វីបកូរ៉េគ្មាននុយក្លេអ៊ែរពិតជាដំណឹងល្អ ព្រោះវាក៏ជាការចង់បានរបស់សហគមន៍អន្តរជាតិ ពិសេសសហរដ្ឋអាមេរិកដែរ។ តែសំណួរដែលកំពុងចោទនៅត្រង់ថា តើអ្វីដែលក្រុងព្យុងយ៉ាងចង់បានពិតជាដូចគ្នានឹងការចង់បានរបស់អាមេរិកដែរ ឬអត់។ ចូរកុំភ្លេចថា កូរ៉េខាងជើងធ្លាប់បានបញ្ជាក់ជាហូរហែថា ខ្លួនសន្យាពីលទ្ធភាពនៃការបោះបង់អាវុធនុយក្លេអ៊ែរ ប្រសិនបើអាមេរិកសុខចិត្តដកទ័ពរបស់ខ្លួនទាំង ២៨ ៥០០នាក់ពីទឹកដីកូរ៉េខាងត្បូង។
គម្រោងជំនួបកំពូលរវាងលោកគីម ជុងអ៊ុន និងលោកដូណាល់ ត្រាំនាដំណាច់ខែឧសភាខាងមុខជារឿងប្រវត្តិសាស្រ្ត និងដែលលោកត្រាំបាននិយាយថា លោកកំពុងរង់ចាំយ៉ាងអន្ទះសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ