លោកស្រីអ៊ុងសាន ស៊ូជីនាំតំណាងរាស្រ្តចុះរើសសំរាម
នៅព្រឹកថ្ងៃអាទិត្យ ទី១៣ធ្នូ លោកស្រីអ៊ុងសាន ស៊ូជី និងសមាជិកតំណាងរាស្រ្តក្នុងមណ្ឌល បាននាំគ្នា រើសសំរាមតាមដងផ្លូវ នៅទីក្រុងរ៉ង់ហ្គូន។ ចាប់តាំងពីគណបក្សរបស់លោកស្រីឈ្នះឆ្នោត គ្រប់គ្រងអាសនៈភាគច្រើន នៅរដ្ឋសភា ភូមា នេះជាលើកទី ១ ដែលលោកស្រី ប្រមុខបក្សប្រឆាំង លេចមុខនៅកន្លែងសាធារណៈ និងធ្វើយុទ្ធនាការបោសសម្អាតផ្លូវ ដើម្បីបញ្ជាក់ពីការប្តេជ្ញាចិត្តរបស់គណបក្សរបស់លោកស្រី ក្នុងការដោះស្រាយបញ្ហាសេវាសាធារណៈនៅប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សំរាមគឺជាបញ្ហាចោទដ៏ធំមួយនៅប្រទេសភូមា ដែលនៅខ្វះខាតច្រើន ធុង និងកន្លែងចាក់សំរាមត្រឹមត្រូវ ។ នៅក្រោយជ័យជំនះ ដ៏ធំធេង នៅក្នុងការបោះឆ្នោត លោកស្រីអ៊ុងសាន ស៊ូជីបាននិយាយទៅអ្នកតំណាងរាស្រ្តថ្មី មកពីគណបក្សរបស់លោកស្រី ឲ្យចេះថែរក្សាអនាម័យ នៅក្នុងមណ្ឌលគ្រប់គ្រងរបស់ពួកគេ។
“ការរើសសំរាមគឺជាសកម្មភាពដំបូងបង្អស់ដែលយើងអាចធ្វើ ដើម្បីបំរើប្រជាជនភូមា” នេះជាការលើកឡើង របស់លោកថេត ថេត ឃីនសមាជិកតំណាងរាស្រ្តថ្មី មកពីក្រុងរ៉ង់ហ្គូន។ តាមអ្នកតាមដាននយោបាយនៅភូមា គណបក្សសម្ព័ន្ធជាតិដើម្បីប្រជាធិបតេយ្យ ដែលទើបឈ្នះឆ្នោត លើគណបក្សកាន់អំណាច កំពុងរិះរកមធ្យោបាយដើម្បីដោះស្រាយបញ្ហាសេដ្ឋកិច្ច និងវិបត្តិសង្គម ដែលប្រជាជនភូមាកំពុងរងប្រឈមនាពេលបច្ចុប្បន្ននេះ។ ច្បាស់ណាស់ថា គណបក្សរបស់លោកស្រីអ៊ុងសាន ស៊ូជី មិនចង់ឲ្យប្រជាជនភូមា ខកចិត្ត នៅក្រោយពេលបោះឆ្នោតគាំទ្រគណបក្សប្រឆាំងនោះទេ។
មួយវិញទៀត តាមរយៈ ការចុះរើសសំរាម នៅតាមដងផ្លូវ លោកស្រីអ៊ុងសាន ស៊ូជី អាចចង់បង្ហាញថា លោកស្រីនិងសមាជិករបស់គណបក្ស ថ្វីបើឈ្នះឆ្នោត ចូលកាន់អំណាច នៅប៉ុន្តែ នឹងនៅតែប្រកាន់ខ្លួនជាថ្នាក់ដឹកនាំ គំរូ និងនៅជិតស្និទ្ធជាមួយនឹងប្រជាជនភូមាជានិច្ច។
សូមបញ្ជាក់ថា នៅក្នុងការបោះឆ្នោតជាតិ កាលពីថ្ងៃទី ៨វិច្ឆិកា គណបក្សសម្ព័ន្ធជាតិដើម្បីប្រជាធិបតេយ្យ បានឈ្នះឆ្នោត ដោយទទួលបានសំឡេងគាំទ្រ ៨០ភាគរយ។ ហើយដោយមិនធ្លាប់មានពីមុនមក ក្រុមយោធា ភូមាបានទទួលស្គាល់ជ័យជំនះ និងគាំទ្រគណបក្សប្រឆាំង ឲ្យចូលកាន់អំណាចនៅភូមា។ ជំហរប្រែប្រួលរបស់យោធា ហើយនិងជំនួបទ្វេភាគី បន្តបន្ទាប់ រវាងលោកស្រី ជាមួយ ប្រមុខដឹកនាំកំពូលរបស់យោធាភូមា បានធ្វើឲ្យអ្នកគាំទ្របក្សប្រឆាំងមួយចំនួនសង្ស័យ និងបារម្ភ ថា លោកស្រីអ៊ុងសាន ស៊ូជី ទោះជាឈ្នះឆ្នោត និងត្រូវក្រុមយោធាបើកផ្លូវឲ្យចូលដឹកនាំភូមាមែន ប៉ុន្តែ លោកស្រី នឹងនៅស្ថិតនៅក្រោមឥទ្ធិពលរបស់ក្រុមយោធា ដែលនៅតែមានអំណាចរឹងមាំ និងគ្រប់គ្រង ដោយស្វ័យប្រវត្តិ សំឡេង ២៥ភាគរយនៅសភា ទាំង២ជាន់ថ្នាក់ នៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ