ក្រុមហ៊ុននុយក្លេអ៊ែរកូរ៉េខាងត្បូង រងការវាយប្រហារតាមអ៊ីនធ័រនែត
ក្រុមហ៊ុនគ្រប់គ្រងមជ្ឈមណ្ឌលនុយក្លេអ៊ែរ របស់កូរ៉េខាងត្បូង KHNP ត្រូវបានក្រុមចោរអ៊ីនធ័រនែត ធ្វើការវាយប្រហារពីចំងាយ ដោយបានធ្វើឲ្យ ប្រព័ន្ធព័ត៌មានវិទ្យារបស់ក្រុមហ៊ុននេះ ត្រូវគាំង លែងដំណើរការទាំងស្រុង។ ទោះបីជាយ៉ាងណា ម៉ាស៊ីនប្រតិបត្តិការនុយក្លេអ៊ែរ របស់ក្រុមហ៊ុននេះ នៅតែដំណើរការជាធម្មតាទេ។ រដ្ឋាភិបាលកូរ៉េខាងត្បូង បានបង្កើនការប្រុងប្រយ័ត្នជាទូទៅ តាមបណ្តាញព័ត៌មានវិទ្យា នៅតាមស្ថាបន័ធំៗទាំងអស់ ដើម្បីចៀសវាង ការវាយប្រហារជាថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ក្រុមហ៊ុន Korea Hydro and Nuclear Power ដែលជាក្រុមហ៊ុនគ្រប់គ្រង់មជ្ឈមណ្ឌលនុយក្លេអ៊ែរទាំង ២៣កន្លែងរបស់កូរ៉េខាងត្បូង បានរងការវាយប្រហារតាមប្រព័ន្ធព័ត៌មានវិទ្យា ដែលធ្វើឲ្យបណ្តាញព័ត៌មានវិទ្យា របស់ក្រុមហ៊ុននេះ រាំងស្ទះ លែងដំណើរការ។
លោក ឆូ ស៊ិក នាយកប្រតិបត្តិរបស់ក្រុមហ៊ុន បានចេញមកធ្វើសន្និសីទកាសែតមួយ នៅថ្ងៃអាទិត្យទី ២៨ ធ្នូ នេះ ថា ថ្វីត្បិតតែប្រព័ន្ធព័ត៌មានវិទ្យារបស់ក្រុមហ៊ុន បានរងការខូចខាត ក៏បន្តែ ប្រព័ន្ធគ្រប់គ្រងម៉ាស៊ីនប្រតិបត្តិការនុយក្លេអ៊ែរ របស់ក្រុមហ៊ុន ទាំង២៣កន្លែង មិនបានរងការប៉ះពាល់ទេ ព្រោះថាជាប្រព័ន្ធដែលមានការការពារពិសេស ដែលបណ្តាញខាងក្រៅ មិនអាចចូលទៅចុះបានទេ។
លោកស្រី ប្រធានាធិបតី កូរ៉េខាងត្បូង ប៉ាក់ គុនហេ បានធ្វើការប្រកាសជាទូទៅ ថាឲ្យអាជ្ញាធរទាំងអស់ ធ្វើការប្រុងប្រយ័ត្ន ជាពិសេសតាមស្ថាប័នធំៗ និងស្ថាប័នគ្រប់គ្រងសេវាសាធារណៈកូរ៉េខាងត្បូង ព្រោះពួកចោរព័ត៌មានវិទ្យា អាចនឹងកំណត់មុខសញ្ញា វាយប្រហារថ្មីទៀត។ លោកស្រីបានចាត់ទុកថា នេះជាអំពើភេរវកម្មបែបថ្មី ដោយប្រើប្រាស់បណ្តាញព័ត៌មានវិទ្យា (Cyberterrorism)។
នគរបាលកូរ៉េខាងត្បូង ដែលកំពុងស៊ើបរកមុខក្រុមចោរ ដែលបានធ្វើប្រតិបត្តិការនេះ បានដាក់ការសង្ស័យទៅលើ កូរ៉េខាងជើង។ ក្រុមស៊ើបអង្កេតបាន ស្រាវជ្រាវ ដឹងពីប្រភពដើមរបស់អាស័យដ្ឋាន IP ដែលមានប្រភពមកពីក្រុង ហ្សិនយ៉ាង ភាគឥសានប្រទេសចិន ហើយនៅក្បែរព្រំដែនកូរ៉េខាងជើង។ អាជ្ញាធរកូរ៉េខាងត្បូង បានសុំការសហការពីអាជ្ញាធរចិន ដើម្បីធ្វើការស្រាវជ្រាវឲ្យបានច្បាស់។ ចោរម្នាក់ បានសរសេរនៅលើទំព័រ Twitter ដោយបានគម្រាមកូរ៉េខាងត្បូង ឲ្យបញ្ឈប់ដំណើរការ របស់ម៉ាស៊ីនប្រតិបត្តិការនុយក្លេអ៊ែរ ៣កន្លែង ពុំនោះទេ ពួកគេនឹងធ្វើការបំផ្លាញប្រព័ន្ធនុយក្លេអ៊ែររបស់កូរ៉េខាងត្បូង ទាំងមូលតែម្តង។
ចំណែកនៅ កូរ៉េខាងជើង ឯណោះវិញ ប្រព័ន្ធអ៊ីនធ័រនែត បានកាត់ផ្តាច់សាជាថ្មីម្តងទៀត នៅថ្ងៃអាទិត្យទី ២៨ ធ្នូនេះ។ សូមបញ្ជាក់ថា បណ្តាញអ៊ីនធ័រនែត របស់កូរ៉េខាងជើង ត្រូវបានផ្គត់ផ្គង់ ដោយក្រុមហ៊ុន China Unicom របស់ចិន។ គេសង្ស័យថា ចិនជាអ្នកកាត់ផ្តាច់អ៊ីធ័រនែតរបស់កូរ៉េខាងជើង ដើម្បីព្រមានកូរ៉េខាងជើង ឲ្យឈប់ប្រើប្រាស់ ការវាយប្រហារតាមអ៊ីនធ័រនែត តទៅទៀត ព្រោះថ្មីៗនេះ ចិនបានបដិសេធ មិនគាំទ្រ ការវាយប្រហារតាមប្រព័ន្ធព័ត៌មានវិទ្យា ជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ