តំណាងរាស្ត្រជប៉ុនជាង១០០នាក់ទៅវិហារយ៉ាស៊ុគុនី ដោយមិនខ្វល់ខ្វាយពីប្រតិកម្មរបស់ចិន
កាលពីថ្ងៃអង្គារម្សិលមិញ លោកនាយករដ្ឋមន្ដ្រីជប៉ុន ស៊ីនហ្សូ អាបេ បានផ្ញើដង្វាយទៅកាន់វិហារយ៉ាស៊ុគុនី ដ៏ចម្រូងចម្រាស់។ សកម្មភាពរបស់ប្រមុខរដ្ឋាភិបាលជប៉ុននេះ បានធ្វើឲ្យចិនផ្ទុះកំហឹង និងបានបញ្ចេញប្រតិកម្មវាយប្រហារយ៉ាងធ្ងន់ៗ។ មួយថ្ងៃបន្ទាប់ពីនោះ គឺនៅថ្ងៃពុធនេះតែម្ដង តំណាងរាស្ត្រជប៉ុនជាង១០០នាក់ បានទៅគោរពវិញ្ញាណក្ខន្ធទាហានជប៉ុន នៅវិហារយ៉ាស៊ុគុនី ដោយមិនខ្វល់ខ្វាយពីប្រតិកម្មរបស់ចិនឡើយ។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងឱកាសពិធីបុណ្យនិទាឃរដូវប្រចាំឆ្នាំរបស់ជប៉ុន តំណាងរាស្ត្រជប៉ុនចំនួន១០៦នាក់ នៅថ្ងៃពុធទី២២ខែមេសានេះ បានទៅកាន់វិហារយ៉ាស៊ុគុនី ដើម្បីគោរពវិញ្ញាណក្ខន្ធទាហានជប៉ុនដែលបានលះបង់ជីវិតដើម្បីជាតិមាតុភូមិ។ ទាហានជប៉ុនដែលបានបាត់បង់ជីវិតក្នុងសង្គ្រាមប្រមាណជិត២លាន៥សែននាក់ ត្រូវបានកត់ត្រាឈ្មោះទុកនៅវិហារយ៉ាស៊ុគុនី។
មុននេះមួយថ្ងៃ គឺនៅថ្ងៃអង្គារទី២១ខែមេសា លោកនាយករដ្ឋមន្ដ្រីជប៉ុន ស៊ីនហ្សូ អាបេ បានផ្ញើដង្វាយទៅកាន់វិហារយ៉ាស៊ុគុនី។ សកម្មភាពរបស់ប្រមុខរដ្ឋាភិបាលជប៉ុននេះ បានទទួលរងការរិះគន់យ៉ាងចាស់ដៃពីសំណាក់ប្រទេសចិន។ សម្រាប់ចិន ប្រទេសជិតខាងដែលធ្លាប់រងការត្រួតត្រាឈ្លានពានរបស់ជប៉ុន វិហារយ៉ាស៊ុគុនីនេះ គឺជាតំណាងអំពើឈ្លានពានវាតទីនិយមរបស់ជប៉ុន ក្នុងសម័យសង្គ្រាមលោកលើកទីពីរ។
អ្នកនាំពាក្យក្រសួងការបរទេសចិន លោក Hong Lei បានព្រមានលោកស៊ីនហ្សូអាបេ អំពីសារៈសំខាន់ជានិមិត្តរូប នៃខួបឆ្នាំនេះ។ ជាខួបគម្រប់៧០ឆ្នាំ នៃការបិទបញ្ចប់សង្គ្រាមលោកលើកទី២។ បើតាមលោក Hong Lei មេដឹកនាំជប៉ុន ត្រូវតែបង្ហាញពីជំហានដ៏រឹងមាំមួយ ដើម្បីគោរពដល់ការប្ដេជ្ញាចិត្ត ក្នុងការឆ្លុះបញ្ចាំងទៅលើប្រវត្តិសាស្ត្រនៃការឈ្លានពានរបស់ខ្លួន។ និងជាពិសេស ដើម្បីដោះស្រាយបញ្ហាពាក់ព័ន្ធ និងទទួលបានការជឿទុកចិត្តពីសំណាក់ប្រទេសជិតខាង និងសហគមន៍អន្ដរជាតិ។
គួររំលឹកថា វិហារយ៉ាស៊ុគុនីដែលឋិតនៅក្នុងទីក្រុងតូក្យូ គឺជាទីកន្លែងតម្កល់ឈ្មោះទាហាន ជប៉ុនដែលបានពលីជីវិតដើម្បីមាតុភូមិ។ ប៉ុន្តែ នៅទីនោះក៏មានដាក់តម្កល់ផងដែរ ឈ្មោះរបស់ក្រុមនាយទាហាន ដែលជាឧក្រិដ្ឋជនសង្គ្រាមលោកលើកទីពីរ ដូចជាឧត្តមសេនីយ៍ Tojo Hideki ដែលជានាយករដ្ឋមន្ត្រីជប៉ុនពីឆ្នាំ១៩៤១ដល់ឆ្នាំ១៩៤៤។ ដូច្នេះហើយបានជា ប្រទេសចិនតែងតែផ្ទុះកំហឹងជានិច្ច នៅពេលដែលឃើញអ្នកដឹកនាំជាន់ខ្ពស់របស់ប្រទេសជប៉ុនទៅគោរពនៅវិហារយ៉ាស៊ុគុនីម្ដងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ