ឥណ្ឌូណេស៊ី និងម៉ាឡេស៊ីប្រកាសផ្តល់ជំរកបណ្តោះអាសន្ន ដល់ជនអន្តោប្រវេសន៍តាមទូក
ឥណ្ឌូណេស៊ី និងម៉ាឡេស៊ី នៅថ្ងៃពុធទី ២០ឧសភា បានប្រកាសរួមគ្នាថា នឹងយល់ព្រមផ្តល់ជំរក និងជំនួយមនុស្សធម៌ ជាបណ្តោះអាសន្ន ដល់ជនអន្តោប្រវេសន៍ ដែលភាគច្រើន ជាជនជាតិរ៉ូហ៊ីងយ៉ា ធ្វើដំណើរមកពីភូមា។ តាំងពីយប់ថ្ងៃអង្គារ ចូលដល់ថ្ងៃពុធនេះ អ្នកនេសាទឥណ្ឌូណេស៊ី បានជួយ ស្រង់ជនអន្តោប្រវេសន៍ ប្រមាណ ៤០០នាក់ បន្ថែមទៀត ឲ្យទៅនៅលើដីគោក ក្នុងខេត្តអាឈេ របស់ប្រទេសឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥៩
នៅក្រោយកិច្ចប្រជុំត្រីភាគី ថៃ ម៉ាឡេស៊ី និងឥណ្ឌូណេស៊ី នៅថ្ងៃពុធនេះ រដ្ឋមន្រ្តីការបរទេសម៉ាឡេស៊ី និងឥណ្ឌូណេស៊ី បានប្រកាសរួមគ្នាថា នឹងឈប់រុញច្រានទូកដឹកជនអន្តោប្រវេសន៍ ឲ្យចេញពីដែនទឹករបស់ខ្លួន និងយល់ព្រម ទទួលយកជនអន្តោប្រវេសន៍ឲ្យស្នាក់នៅ បណ្តោះអាសន្ន ក្នុងប្រទេសរបស់ពួកគេ។
នៅប៉ុន្មានសប្តាហ៍នេះ ម៉ាឡេស៊ី និងឥណ្ឌូណេស៊ី បានទទួលជនអន្តោប្រវេសន៍តាមទូក ប្រមាណ ៣ពាន់នាក់រួចហើយ ឲ្យចូលដីគោករបស់ខ្លួន។ ជនអន្តោប្រវេសន៍ជាច្រើនពាន់នាក់ ត្រូវបានគេព័រណ៌នាថា កំពុងរស់នៅក្នុងភាពអត្តខាត់ ខ្វះអាហារ និងមានសុខភាពខ្សត់ខ្សោយ នៅក្នុងទូកដែលកំពុងអណ្តែតត្រសែត ក្នុងសមុទ្រ។ ទូករបស់ពួកគេត្រូវជាប់គាំងអស់រាប់សប្តាហ៍ ក្នុងសមុទ្រ ដោយសារតែពួកមេឈ្មួញបោះបង់ចោល និងដោយសារតែទូករបស់ពួកគេត្រូវអាជ្ញាធរម៉ាឡេស៊ី ឥណ្ឌូណេស៊ី និងថៃ បានរុញច្រាន ជាបន្តបន្ទាប់គ្នា មិនឲ្យចូលជិតច្រាំង។
សហគមន៍អន្តរជាតិបានរិះគន់ និងថ្កោលទោស ទង្វើរបស់ថៃ ម៉ាឡេស៊ី និងឥណ្ឌូណេស៊ី។ កិច្ចប្រជុំត្រីភាគីរបស់ថៃ ម៉ាឡេស៊ី និងឥណ្ឌូណេស៊ីធ្វើឡើងនៅថ្ងៃពុធនេះ ក្នុងបំណងដោះស្រាយរកច្រកចេញសម្រាប់វិបត្តិទូកជនអន្តោប្រវេសន៍ខុសច្បាប់ ដែលបានធ្វើដំណើរកាន់តែច្រើន សំដៅ ម៉ាឡេស៊ី និងឥណ្ឌូណេស៊ី។
នៅក្នុងសន្និសីទកាសែតរួមគ្នា នៅថ្ងៃនេះ រដ្ឋមន្រ្តីការបរទេសម៉ាឡេស៊ី និងឥណ្ឌូណេស៊ី បានប្រកាសថា ម៉ាឡេស៊ី និងឥណ្ឌូណេស៊ី នឹងលែងរុញច្រានទូកដឹកជនអន្តោប្រវេសន៍ ដូចមុន។ អាជ្ញាធររបស់ប្រទេសទាំងពីរនឹងបើកទ្វារទទួល ជនអន្តោប្រវេសន៍ ទាំង ៧ពាន់នាក់ ដែលរហូតមកដល់សព្វថ្ងៃនេះ កំពុងជាប់គាំង នៅក្នុងសមុទ្រនៅឡើយ។ តាមរដ្ឋមន្រ្តីការបរទេសម៉ាឡេស៊ី លោក Anifah Aman ថៃនៅមិនទាន់ប្រកាសពីជំហររបស់ខ្លួន ដោយសារតែរដ្ឋាភិបាលថៃត្រូវពិនិត្យមើលនយោបាយក្នុងស្រុក ស្តីពីជនអន្តោប្រវេសន៍សិន។
នៅក្នុងសេចក្តីប្រកាសព័ត៌មានរួមគ្នា ម៉ាឡេស៊ី និងឥណ្ឌូណេស៊ី បានបញ្ជាក់ដែរថា ប្រទេសទាំងពីរយល់ព្រម ទទួលជនអន្តោប្រវេសន៍ ឲ្យស្នាក់នៅ ក្នុងទឹកដីរបស់ខ្លួន ប៉ុន្តែ ត្រូវមានលក្ខខណ្ឌ។ មានន័យថា ម៉ាឡេស៊ី និងឥណ្ឌូណេស៊ី នឹងផ្តល់ជំរកបណ្តោះអាសន្ន តែសម្រាប់ជនអន្តោប្រវេសន៍ ដែលកំពុងស្ថិតនៅក្នុងសមុទ្រ។ នៅក្នុងរយៈពេលមួយឆ្នាំ ដែលម៉ាឡេស៊ី និងឥណ្ឌូណេស៊ី ទទួលជនអន្តោប្រវេសន៍ ឲ្យស្នាក់នៅ ជាបណ្តោះអាសន្ន សហគមន៍អន្តរជាតិ រួមទាំងអង្គការសហប្រជាជាតិ ត្រូវរកប្រទេសទីបីណាមួយ ដែលអាចទទួលបន្ត ជនអន្តោប្រវេសន៍ ឬមួយក៏ត្រូវរកមធ្យោបាយយ៉ាងណា ដើម្បីបញ្ជូនជនអន្តោប្រវេសន៍ទាំងនោះឲ្យត្រលប់ចូលទៅទឹកដីកំណើតវិញ ភូមា និងបង់ក្លាដែស។
លក្ខខណ្ឌ របស់ម៉ាឡេស៊ី និងឥណ្ឌូណេស៊ី សុទ្ធតែជាលក្ខខណ្ឌ ដែលគេពិបាកនឹងអាចធ្វើបាន
ជនអន្តោប្រវេសន៍តាមទូកជាច្រើន ជាជនជាតិរ៉ូហ៊ីងយ៉ា ដែលរត់គេចចេញពីអំពើហិង្សា និងការធ្វើទុក្ខបុកម្នេញរបស់អាជ្ញាធរក្នុងប្រទេសភូមា។ មួយចំនួនទៀត ជាជនជាតិបង់ក្លាដែស ដែលផ្សងគ្រោះថ្នាក់ក្នុងសមុទ្រ ដើម្បីគេចចេញពីភាពក្រីក្រ និងចង់ស្វែងរកជីវភាពរុងរឿង ក្នុងទឹកដីម៉ាឡេស៊ី ឬឥណ្ឌូណេស៊ី។
រដ្ឋាភិបាលឥណ្ឌូណេស៊ី ជាពិសេស រដ្ឋាភិបាលម៉ាឡេស៊ី ដឹងច្បាស់ថា ប្រទេសរបស់ខ្លួន ជាគោលដៅ ចង់បានរបស់ជនអន្តោប្រវេសន៍ ដោយសារតែហេតុផលសេដ្ឋកិច្ច និងសាសនាអ៊ីស្លាម។ ប្រទេសទាំងពីរសុខចិត្តទទួលយកជនអន្តោប្រវេសន៍ឲ្យស្នាក់នៅបណ្តោះអាសន្ន ពិតមែន ប៉ុន្តែ មិនចង់ទទួលខុសត្រូវ រ៉ាប់រងតែម្នាក់រហូតនោះទេ។ ការទទួលយកជនអន្តោប្រវេសន៍ប៉ុន្មានពាន់នាក់ ដែលមានកាន់សាសនាអ៊ីស្លាមដូចខ្លួន មិនមែនជាបញ្ហាធ្ងន់ធ្ងរដែលឥណ្ឌូណេស៊ី និងម៉ាឡេស៊ីមិនអាចធ្វើបាននោះទេ។ ប៉ុន្តែ បញ្ហានៅត្រង់ថា បើគេទទួលជនអន្តោប្រវេសន៍តាមទូក នោះមានន័យថា គេនឹងជំរុញ លើកទឹកចិត្តឲ្យជនអន្តោប្រវេសន៍ផ្សេងទៀត ធ្វើដំណើរដោយខុសច្បាប់ តាមទូក ចូលទៅក្នុងឥណ្ឌូណេស៊ី និងម៉ាឡេស៊ី ទៅថ្ងៃអនាគត។
ភាគីម៉ាឡេស៊ីបាននិយាយរួចហើយថា ដើម្បីដោះស្រាយបញ្ហាជនអន្តោប្រវេសន៍តាមទូក គេត្រូវដោះស្រាយបញ្ហា នៅប្រភពដើមរបស់វា។ កាលពីថ្ងៃសៅរ៍ នាយករដ្ឋមន្រ្តីម៉ាឡេស៊ី លោកណាហ្ស៊ីប រ៉ាហ្សាក់ បាននិយាយថា ម៉ាឡេស៊ីបានទាក់ទងទៅរដ្ឋាភិបាលភូមារួចហើយ ដើម្បីនិយាយពីវិបត្តិជនអន្តោប្រវេសន៍ និងកំពុងរង់ចាំចម្លើយវិជ្ជមានពីភូមា។ ឮ
ប៉ុន្តែ រដ្ឋាភិបាលភូមាធ្លាប់បានប្រកាសរួចហើយថា ខ្លួនគ្មានចំណែកទទួលខុសត្រូវលើរឿងជនអន្តោប្រវេសន៍តាមទូកទេ ហើយជនជាតិរ៉ូហ៊ីងយ៉ា មិនមែនជាជនជាតិភាគតិចរបស់ភូមាដែរ។ ម៉ាឡេស៊ី ដែលដើរតួជាប្រធានរៀបចំកិច្ចប្រជុំកំពូលអាស៊ាននៅឆ្នាំនេះ បានព្រមានភូមារួចហើយថា នឹងបើកកិច្ចប្រជុំជាបន្ទាន់មួយដើម្បីនិយាយពីបញ្ហាជនអន្តោប្រវេសន៍តាមទូក។
ភូមាដែលត្រូវគេមើលឃើញថា ជាប្រភពចាកចេញរបស់ជនអន្តោប្រវេសន៍រ៉ូហ៊ីងយ៉ា កំពុងទទួលរងការដាក់សំពាធពីប្រទេសជិតខាង និងសហគមន៍អន្តរជាតិ។ រដ្ឋាភិបាលភូមា តាមរយៈក្រសួងការបរទេស នៅថ្ងៃពុធនេះបានសំដែងកង្វល់ ពីវិបត្តិជនអន្តោប្រវេសន៍តាមទូក។ ភូមាបានប្រកាសផ្តល់ជំនួយមនុស្សធម៌ដល់ជនជាតិរ៉ូហ៊ីងយ៉ានៅលើទូក។
ភូមាផ្តល់តែជំនួយមនុស្សធម៌ ប៉ុន្តែ មិនបានបញ្ជាក់ច្បាស់ថា នឹងយល់ព្រមទទួលជនជាតិរ៉ូហ៊ីងយ៉ា ដែលនៅលើទូក នោះ ឲ្យត្រលប់ទៅរស់នៅក្នុងទឹកដីភូមាវិញទេ។ តាមអ្នកវិភាគខ្លះ រដ្ឋាភិបាលភូមាមិនបានអើពើ រវល់ជួយជនជាតិរ៉ូហ៊ីងយ៉ា តាំងពីនៅក្នុងប្រទេសម្ល៉េះ។ ដូច្នេះ នៅពេលជនជាតិរ៉ូហ៊ីងយ៉ាចាកចេញផុតពីទឹកដីភូមា អាជ្ញាធររបស់ប្រទេសនេះ ទំនងកំពុងចាក់បណ្តោយតាមខ្សែទឹក គឺបញ្ជូនជនជាតិរ៉ូហ៊ីងយ៉ាឲ្យចេញផុតពីដៃ ពីការទទួលខុសត្រូវរបស់ខ្លួន និងទម្លាក់ទៅឲ្យប្រទេសជិតខាង ក៏ដូចអង្គការសហប្រជាជាតិ ទទួលបន្ទុកវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ