ផលវិបាកនៃការដកខ្លួនរបស់អង់គ្លេស ចេញពីអឺរ៉ុប
ក្រោយលទ្ធផលបង្ហាញថា ពលរដ្ឋអង់គ្លេសមិនព្រមអោយអង់គ្លេសបន្តជាសមាជិកអឺរ៉ុប ថ្ងៃសុក្រនេះ មេដឹកនាំអឺរ៉ុបធំៗនៅសហភាពអឺរ៉ុប កំពុងមមាញឹករកវិធានការកុំអោយជំងឺស្អប់អឺរ៉ុបមួយ បន្តរាលដាលនៅតាមប្រទេសអឺរ៉ុបផ្សេងៗទៀត។ ពេលនេះ ក្រុមប្រឆាំងនយោបាយអឺរ៉ុបធំៗ នៅសហភាពអឺរ៉ុប តាមប្រទេសដូចជា បារាំង អ៊ីតាលី រឺក៏ហូឡង់ កំពុងតែទាមទារធ្វើប្រជាមតិដូចអង់គ្លេសដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៨
ព្រឹកថ្ងៃសុក្រនេះ ក្រុមប្រឹក្សារដ្ឋមន្ត្រីបារាំងបានប្រញាប់ប្រញាល់បើកកិច្ចប្រជុំ លើបញ្ហាប្រិចស៊ីត ដោយមានវត្តមានរបស់ប្រធានាធិបតី និងថ្នាក់ដឹកនាំកំពូលៗរបស់បារាំង។ មុននេះ លោកហ្វ្រង់ស៊័រ ហូឡង់ ក៏បានទូរសព្ទជជែកបញ្ហាជាមួយប្រមុខដឹកនាំអាល្លឺម៉ង់ លោកស្រី មែរគែល និងប្រធានក្រុមប្រឹក្សាអឺរ៉ុប លោក ដូណាល់ ថាស្ក ផងដែរ។ នៅក្រុងប៊ែរឡាំង ថ្ងៃចន្ទនេះ លោកស្រី មែរគែល លោកហូឡង់ លោកថាស្ក និង នាយករដ្ឋមន្ត្រីអ៊ីតាលីនឹងជួបពិភាក្សាគ្នា។ ថ្នាក់ដឹកនាំអឺរ៉ុបធំៗ ក៏បើកកិច្ចប្រជុំបន្តបន្ទាប់ទៅទៀតដែរ។
ត្បិតថា អង់គ្លេសសម្រេចដើរចេញពីអឺរ៉ុបក៏ពិតមែន ក៏មិនមែនមានន័យថា អង់គ្លេសមិនជួបផលវិបាកដែរ។ ម្សិលមិញ ប្រជាជនស្កុតឡែនដ៍ និងប្រជាជនអៀឡង់ខាងជើងសុទ្ធតែបោះឆ្នោតគាំទ្រ អោយអង់គ្លេសបន្តជាសមាជិកអឺរ៉ុប។ ដើម្បីបំពេញបំណងប្រជាជនក្នុងស្រុកដែលស្រលាញ់សហភាពអឺរ៉ុប ស្កុតឡែនដ៍ និងអៀឡង់ខាងជើងក៏អាចរៀបចំប្រជាមតិផ្តាច់ខ្លួនពីអង់គ្លេស ទៅវិញដែរ។
ក្រុមប្រឆាំងនយោបាយអឺរ៉ុបអបអរសាទរលទ្ធផលបោះឆ្នោតអង់គ្លេស
នៅតាមបណ្តាប្រទេសដូចជា បារាំង ហូឡង់ ដាណឺម៉ាក អ៊ីតាលីបានអបអរសាទរការសម្រេចរបស់ពលរដ្ឋអង់គ្លេស ដែលចង់អោយអង់គ្លេសដើរចេញពីសហភាពអឺរ៉ុប។ សម្រាប់លោកស្រី ម៉ារីន ឡឺពេន ជាប្រធានបក្សស្តាំជ្រុលនិយមបារាំង ការសម្រេចរបស់ពលរដ្ឋអង់គ្លេសសបង្ហាញពីជោគជ័យនៃសេរីភាព។
គណបក្សស្តាំនិយមជ្រុលមួយនេះបានទាមទារអោយមានប្រជាមតិនៅបារាំងដូចគ្នា។ តែរដ្ឋាភិបាលបារាំងប្រហែលជាមិនអាចបំពេញសំណូមពរបក្សស្តាំជ្រុលមួយនេះទេ ព្រោះបក្សលោកស្រីឡឺពេនគ្រាន់តែជាបក្សតូចមួយប៉ុណ្ណោះ។
នៅប្រទេសហូឡង់វិញ បក្សស្តាំនិយមជ្រុលបានចាត់ទុកថ្ងៃប្រជាមតិ២៣មិថុនា ជាថ្ងៃប្រវត្តិសាស្ត្រ ជាថ្ងៃដែលអង់គ្លេសទទួលឯករាជ្យពីសហភាពអឺរ៉ុប។ ជាថ្ងៃដែលអង់គ្លេសបង្ហាញផ្លូវអនាគតដល់អឺរ៉ុប។ ក្រុមស្តាំជ្រុលនិយមហូឡង់ចង់អោយហូឡង់ដកខ្លួនចេញពីអឺរ៉ុប ដូចអង់គ្លេសដែរ ដើម្បីអាចអោយហូឡង់ដោះស្រាយនយោបាយអន្តោប្រវេសន៍ នយោបាយព្រំដែនរបស់ជាតិខ្លួនផ្ទាល់ ជាជាងដើរតាមតែនយោបាយអឺរ៉ុប។
នៅអ៊ីតាលីវិញ បក្សសម្ព័ន្ធខាងជើងដែលជាបក្សស្អប់នយោបាយអឺរ៉ុបដែរនោះ បានលើកសរសើរពីភាពក្លាហានរបស់ពលរដ្ឋអង់គ្លេសដែលហ៊ានបោះឆ្នោតដើរចេញពីអឺរ៉ុប។ បក្សនេះបានលើកឡើងថា បន្ទាប់ពីប្រិចស៊ីតរបស់អង់គ្លេស ឥឡូវនេះ ដល់ពេលអ៊ីតាលីវិញម្តង។
នៅដាណឺម៉ាក ក្រុមប្រឆាំងអឺរ៉ុបចង់ធ្វើប្រជាមតិដែរ តែមិនមែនប្រជាមតិដើម្បីដើរចេញពីអឺរ៉ុបដូចអង់គ្លេសទេ។ គឺជាការបោះឆ្នោតប្រជាមតិដែលតំរូវអោយអឺរ៉ុបបន្ថយលក្ខន្តិកៈតឹងតែងផ្សេងៗចំពោះដាណឺម៉ាក សម្រាប់កិច្ចសហប្រតិបត្តិការរវាងដាណឺម៉ាកនិងអឺរ៉ុប។ ដូចគ្នាដែរ បក្សឆ្វេងនិយមនៅស៊ុយអែតវិញ បានទាមទារអោយរដ្ឋាភិបាលចរចាឡើងវិញ លើលក្ខខណ្ឌនៃការចូលជាសមាជិករបស់ស៊ុយអែត។
ផលវិបាកផ្ទៃក្នុងអង់គ្លេស
ពលរដ្ឋអង់គ្លេសសម្រេចអោយអង់គ្លេសដើរចេញពីអឺរ៉ុប ជាជោគជ័យធំធេងសម្រាប់ក្រុមប្រឆាំងនយោបាយអឺរ៉ុប។ តែគេក៏កំពុងតែចោទសួរដែរថា បន្ទាប់ពីនេះទៅ តើអង់គ្លេសអាចរឹងមាំដែរទេ ព្រោះថា បើអង់គ្លេសមានសិទ្ធិធ្វើប្រជាមតិផ្តាច់ខ្លួន ពីអឺរ៉ុប ស្កុតឡិននិងអៀឡង់ខាងជើងក៏មានសិទ្ធិធ្វើប្រជាមតិផ្តាច់ខ្លួនពីអង់គ្លេសដូចគ្នាដែរ។
គួរបញ្ជាក់ថា ត្បិតថា អ្នកបោះឆ្នោតអង់គ្លេសជិត៦២ភាគរយ ចង់អោយអង់គ្លេសដើរចេញពីអឺរ៉ុបក៏ពិតមែន តែប្រជាជននៅស្កុតឡិន និងអៀឡង់ខាងជើងសន្ធឹកសន្ធាប់ណាស់ដែលចង់អោយអង់គ្លេសបន្តធ្វើជាសមាជិកអឺរ៉ុប។ យោងតាមតួលេខ ប្រជាជនស្កុតឡិន៦២ភាគរយ បានបោះឆ្នោតអោយអង់គ្លេសបន្តនៅក្នុងអឺរ៉ុប។
នាយករដ្ឋមន្ត្រីស្កុតឡែនដ៍ លោកស្រី នីកូឡា ស្តឺចុន បានព្រមាននៅថ្ងៃសុក្រនេះថា ស្កុតឡែនដ៍នៅតែចង់ឃើញអនាគតខ្លួន នៅក្នុងសហភាពអឺរ៉ុប។ កាលពីជិត២ឆ្នាំមុន ប្រជាជនស្កុតឡែនដ៍ធ្លាប់បានបោះឆ្នោតប្រជាមតិ មិនចង់ផ្តាច់ខ្លួនពីអង់គ្លេសទេ។ ប៉ុន្តែ ពេលនេះ អង់គ្លេសបានសម្រេចដើរចេញពីសហភាពអឺរ៉ុប។ ដូច្នេះ ស្កុតឡែន៍ក៏អាចរៀបចំប្រជាមតិដើរចេញពីអង់គ្លេសបានដែរ ដើម្បីអាចសុំខ្លួនបន្តស្ថិតនៅអឺរ៉ុបតទៅទៀតបាន។
ដូចស្កុតឡែនដ៍ដែរ អ្នកបោះឆ្នោត៥៦ភាគរយនៅអៀឡង់ខាងជើងបានសម្រេចចិត្តអោយអង់គ្លេសបន្តនៅជាសមាជិកអឺរ៉ុប។ អៀឡង់ខាងជើងមិនភ្លេចគុណសហភាពអឺរ៉ុប ដែលបានជួយខ្លួនរាប់ពាន់លានអឺរ៉ូ កាលពីឆ្នាំ១៩៩៨ទេ។ កាលនោះ អឺរ៉ុបបានជួយអៀឡង់ខាងជើងអោយបិទបញ្ចប់ជម្លោះសាសនា ៣ទសវត្ស រវាងក្រុមកាតលិក និងប្រូតេស្តង់។ ជាជម្លោះដែលបានធ្វើអោយមនុស្សជាង៣០០០នាក់បាត់បង់ជីវិត។
ឆ្លៀតពេលឃើញអៀឡង់ខាងជើងរបស់អង់គ្លេសចង់អោយអង់គ្លេស បន្តនៅជាសមាជិកអឺរ៉ុប បក្សសាធារណរដ្ឋរបស់ប្រទេសអៀឡង់មួយទៀត ដែលនៅក្បែរនោះ បានអំពាវនាវអោយអៀឡង់រួបរួមគ្នា ជាប្រទេសអៀឡង់តែមួយឡើងវិញ។ នេះក៏ជាឱកាសអនុញ្ញាតអោយអៀឡង់បានរួបរួមគ្នាឡើងវិញ ក្លាយជាប្រទេសដ៏ខ្លាំងក្លាមួយបាន។
ស្កុតឡែនដ៍ អៀឡង់ខាងជើងប្រកាសជំហរចង់ផ្តាច់ខ្លួនពីអង់គ្លេស នេះជាផលវិបាកមួយទៀត ដែលអង់គ្លេសត្រូវប្រឈមមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ